Tesla акциялары 4%-ға өсті: Маскқа жаңа бонус төлеу жолы қарастырылуда
Tesla компаниясының бас директоры Илон Маск шамамен 100 млрд $ болатын 12% акцияға опцион алуы тиіс еді, бірақ бұл төлемді сот тоқтатқан болатын.
Financial Times деректеріне сүйенсек, компания Маскқа жаңа опциондар беру мүмкіндігін қарастырып жатыр. Бұл жаңалықтан кейін инвесторлар Tesla акцияларын белсенді сатып алып, оның бағасы 4%-ға көтерілді.
Егжей-тегжейі
14 мамырдағы сауда кезінде Tesla акциялары 4%-ға қымбаттап, 347,6 долларға жетті. Бұл өсуге Financial Times жариялаған ақпарат түрткі болды: Tesla директорлар кеңесі Маскқа жаңа опцион түріндегі бонусты қарастыру үшін арнайы комитет құрған. Бұл бастама 2018 жылы бекітілген, бірақ сотпен тоқтатылған өтемақы жоспарының орнына келуі мүмкін. Егер компания Делавэр Жоғарғы сотында істен жеңілсе, бұрынғы жоспар күшіне енбей қалмақ.
Комитет құрамына директорлар кеңесінің төрайымы Робин Денхолм мен мүшесі Кэтлин Уилсон-Томпсон енген. Қарастырылып жатқан нұсқалардың бірі — Маскқа жаңа акция опциондарын беру. Бұл үшін Tesla нақты қаржылық және нарықтық көрсеткіштерге жетуі тиіс. Сонымен қатар, Маск бұрынғы жетістіктері үшін де кешіктіріп сыйақы алуы мүмкін. Айта кетейік, Маск Tesla-дан жалақы алмайды.
Контекст
2018 жылы Tesla Маскқа арналған ерекше бонустық жоспар бекіткен еді. Ол бойынша Маск компанияның капитализациясы әр 50 млрд долларға артқанда, Tesla акцияларының 1%-ын иеленіп отырады. Бұл 12 рет жалғасатын болады. Осылайша, ол компанияның 12%-ына дейін бақылау алуы тиіс болатын. Бұл жоспардың құны бастапқыда 56 млрд $ болса, қазір 98 млрд долларға жетті.
Алайда 2023 жылы Делавэр соты бұл жоспарды компания басқаруындағы тәуелсіздікке күмән келтіре отырып, жарамсыз деп тапты. 2024 жылы акционерлер бұл шешімді қайта мақұлдап, Tesla бас кеңсесін Техасқа көшіруді қолдағанымен, Делавэр соты келісімді қайта күшіне енгізуден бас тартты. Енді бұл іс Жоғарғы соттың қарауында.
Инвесторлар үшін не маңызды?
Кейінгі бес сауда күнінде Tesla акциялары 25%-ға қымбаттады. Дегенмен, жыл басынан бері олар әлі де 14%-ға төмен тұр. Бұл қысымның негізгі себептері — жаңа модельдердің болмауы, Еуропа мен Қытайдағы сатылымның құлдырауы, сондай-ақ Илон Масктың саяси белсенділігі. Масктың Германиядағы оңшыл күштерді қолдауы бірқатар елде брендке бойкот жариялауға және наразылықтарға ұласқан. Осыған байланысты акционерлердің сынын естіген Маск жұмыс орнында жиі болуға және Ақ үймен байланысын шектеуге уәде берді.
Биыл наурызда компания акциялары үш ай ішінде шарықтау шегінен 40%-дан астам төмендеген кезде Маск қызметкерлерге акцияларын сатпауға кеңес берді. Бірақ Tesla директорлар кеңесінің төрайымы Робин Денхолм соңғы алты айда компания акцияларын сатып, 198 млн $ пайда тапқан. The New York Times басылымы мұны оның Tesla-ның болашағына деген сеніміне күмән ретінде бағалауға болатынын атап өткен.
Соған қарамастан, сарапшылардың көбі Tesla-ға сенеді: MarketWatch дерегінше, талдаушылардың 30-ы акцияны сатып алуға (Buy және Overweight), 15-і ұстауға (Hold), 11-і сатуға (Sell) кеңес береді. Уолл-стриттің консенсус-болжамы бойынша, Tesla акциясының әділ құны — 304,7 $. Бұл 13 мамырдағы жабылу бағасынан шамамен 9%-ға төмен.
