АҚШ Boeing ұшақтарын сатып алу шартымен Швейцария тауарларына бажды азайтады
АҚШ пен Швейцария швейцариялық тауарларға салынатын кедендік баж салығын 39%-дан 15%-ға дейін төмендету бойынша сауда келісіміне «іс жүзінде» қол жеткізді. Бұл туралы АҚШ-тың сауда өкілі Джеймсон Грир Bloomberg-ке мәлімдеді.
Грирдің айтуынша, бұл келісім аясында Швейцария Дональд Трамптың президенттік мерзімі ішінде АҚШ экономикасына 200 миллиард доллар инвестиция салуға келісті. Оның 70 миллиарды келесі жылы фармацевтика мен алтын өңдеу сияқты салаларға бағытталады. Сонымен қатар, Швейцария Boeing ұшақтарын сатып алуды арттыруға келіскен.
Бұл келісім Швейцария үшін жеңілдік болмақ. Себебі Трамп әкімшілігі бұл елге дамыған мемлекеттер арасындағы ең жоғары баж салығын енгізген еді. 2025 жылдың тамызында қабылданған 39%-дық баж салығы Еуроодақ елдеріне қарағанда екі есе жоғары болды. Соның салдарынан сағат өндірісі, машина жасау және дәлдік құралдарын шығару сияқты маңызды салалар қиындыққа тап болған.
Грир Швейцарияның бірқатар өндірісті АҚШ аумағына көшіруді жоспарлап отырғанын айтты. Бұл — фармацевтика, алтын аффинажы және теміржол жабдықтарын өндіру салаларына қатысты.
Трамп әкімшілігі бұл жоғары баж салығын АҚШ пен Швейцария арасындағы $40 миллиард көлеміндегі сауда теңгерімсіздігіне жауап ретінде енгізгенін түсіндірген болатын.
