Alibaba мен Қытайдың басқа ІТ-алыптарының акциялары арзандады
Осы аптада арзандаған Alibaba, сондай-ақ Baidu мен JD.com сияқты қытайлық интернет-алыптардың акциялары инвесторлар үшін тиімді сәт туғызды деп жазады Barron’s. 17 қазанда Гонконг биржасында Alibaba акциялары күрт төмендеді, бірақ АҚШ-та олардың бағасы Дональд Трамптың жаңа мәлімдемесінен кейін қайта өсе бастады.
Егжей-тегжейі
Гонконгтағы саудада жұма күні Alibaba мен Baidu акциялары 4,2%-ға, ал JD.com қағаздары 3%-ға арзандады. Кейінгі бес сауда күнінде Alibaba акциялары шамамен 3%-ға құнын жоғалтты.
Deutsche Bank сарапшысы Питер Сидоровтың айтуынша, АҚШ пен Қытай арасындағы сауда шиеленісі инвесторлардың сеніміне кері әсер етіп отыр.
АҚШ-тағы сауда кезінде Alibaba-ның депозитарлық қағаздары алғашында 2,4%-ға төмендеген, бірақ кейін өсім көрсетіп, 0,9%-ға көтерілді. Бұл өзгеріске, шамасы, Дональд Трамптың мәлімдемесі себеп болды: ол Қытай тауарларына 100%-дық баж салығы «ұзақ мерзімде тұрақты бола алмайды» деді және екі аптадан кейін Оңтүстік Кореяда ҚХР төрағасы Си Цзиньпинмен кездесуді жоспарлап отырғанын мәлімдеді.
Неліктен Barron’s сатып алуды ұсынады?
Қытайдың ірі технологиялық компаниясы Alibaba соңғы жылдары бұлтты технологиялар мен жасанды интеллект бағытында белсенді дамып келеді. Barron’s жазуынша, сарапшылар компанияның келешегіне әлі де сенімді. Жыл басынан бері Alibaba акциялары 95%-ға өскен, және көптеген маман бұл өсім алдағы уақытта да жалғасуы мүмкін деп санайды.
Компания кейінгі жылдары реттеуші қысым, геосаяси қауіптер және Қытай экономикасының баяулауы сияқты себептерден кейінгі тоқыраудан біртіндеп шығып келеді. Компания бағасын қайта бағалауға жасанды интеллект үлкен серпін берді. CNBC мәліметінше, компания вице-президенті Кайфу Чжан Alibaba онлайн-саудада ЖИ-ға жұмсалған инвестицияларын қайтара бастағанын айтқан. Barron’s пікірінше, бұл инвесторлардың күдігін азайтып, акциялардың өсуіне түрткі болуы мүмкін.
Nomura банкінің сарапшылары Цзялун Ши мен Рэйчел Го жазғандай, Alibaba-ның ЖИ-ға салған инвестициялары тек техникалық құралдармен шектелмейді. Ол Қытайдағы ірі тілдік модельдер нарығында жетекші ойыншыға айналды. Nomura Alibaba акцияларының мақсатты бағасын 170 доллардан 215 долларға дейін көтеріп, бұл көрсеткіш өткен бейсенбі күнгі жабылу бағасынан шамамен 30% жоғары екенін хабарлады. Банк сондай-ақ «сатып алу» ұсынымын растады.
