Crocs брендінің сатылымы бес жыл ішінде алғаш рет төмендеді, себебі неде
Аяқ киім өндірушісі Crocs бес жыл ішіндегі алғашқы сатылымының төмендеуі туралы хабарлады. Компанияның есебіне сәйкес флагмандық брендтің табысы үшінші тоқсанда 2,5%-ға азайып, 836 млн долларға дейін төмендеген. Бұл — 2020 жылдың екінші тоқсанынан бергі алғашқы теріс нәтиже, деп жазады MarketWatch. Ағымдағы тоқсанда компания Crocs бренді бойынша тағы да шамамен 3% төмендеуді күтеді.
Топтың жалпы табысы өткен жылмен салыстырғанда 6,2%-ға азайған, себебі күнделікті аяқ киім шығаратын Heydude бренді сатылымы бірден 21,6%-ға құлдырады. Соған қарамастан, Crocs-тың жиынтық табысы FactSet деректері бойынша аналитиктердің орташа бағалауынан жоғары болды.
Crocs акциялары бейсенбі күні 2,5%-ға төмендеп, $82,54 деңгейінде жабылды. Баға төрт ай қатарынан құлдырап келеді. Егер бұл үрдіс қазан айының соңғы сессиясына дейін жалғасса, бұл 2022 жылдан бергі ең ұзақ төмендеу кезеңі болмақ — ол кезде котировкалар жеті ай бойы, маусымға дейін төмендеген еді, деп еске салады MarketWatch.
Сатылым неліктен азайды
Сатылымның төмендеу себебі — Солтүстік Америкадағы жарнамалық белсенділіктің қысқаруы, деп түсіндірді бас директор Эндрю Риз инвесторлармен өткен конференц-қоңырау барысында (AlphaSense стенограммасы негізінде). Бұл көрсеткіш есепте айқын көрінеді: сатылым ең көп төмендеген аймақ — дәл осы Солтүстік Америка (-8,8%). Ал халықаралық табыс, керісінше, 4,2%-ға артқан.
Бұған қоса, компания жеңілдіктер санын азайтып, көтерме серіктестерге жеткізілімдерді қысқартқан — қоймадағы артық қорды азайту үшін. Crocs қолжетімді баға сегментінде жұмыс істейтіндіктен, жеңілдіктердің болмауы бағаға сезімтал клиенттердің сатып алу белсенділігіне айтарлықтай әсер етуі мүмкін, деп жазады MarketWatch.
Риздің айтуынша брендтің көптеген тұтынушылары өздерінің қаржылық жағдайының нашарлауына алаңдаулы, сондықтан олар шығындарын барынша қысқартып, тек ең қажетті тауарларды сатып алуда.
«Оларда бұрынғыдай еркін немесе икемді табыс деңгейі жоқ, сондықтан не алатынын мұқият таңдайды», — деді ол.
Crocs-тың өсу жоспары қандай
Қаржылық көрсеткіштер аналитиктердің күтулерінен жоғары болғанымен, компанияның өз күткен деңгейіне сәйкес келмеген, деді бас директор. Солтүстік Америка нарығында қайта өсу үшін Crocs өнім ассортиментін жаңартып, сандал үлгілерін және жаңа категорияларды кеңейтуді жоспарлап отыр. Төртінші тоқсанда компания 60 доллардан басталатын крафт сабо үлгілерін ұсынбақ. Сондай-ақ компания бар сабо-франшизаларды масштабтауға көңіл бөлуде.
Риздің пікірінше Crocs халықаралық нарықтарда үлесін арттыру үшін үлкен мүмкіндіктерге ие, себебі олардың көпшілігі әлі де ерте даму сатысында тұр. Оның айтуынша, Қытайдағы сатылымдар барлық арналары бойынша өсіп, өткен жылмен салыстырғанда шамамен 20%-ға артқан.
Бас директор сонымен қатар Crocs АҚШ-тағы TikTok Shop платформасында №1 аяқ киім бренді болып қала беретінін атап өтті.
«Біз бұл серіктестікті кеңейтіп, TikTok Shop-ты Ұлыбританияда, Германияда және Бразилияда іске қостық», — деді ол.
Сарапшылардың пікірі
Жыл басынан бері Crocs акциялары шамамен 25%-ға арзандаған. Компания акцияларын бақылайтын 17 аналитиктің ішінде сегізі оларды портфельде ұстауды (hold) ұсынады — яғни сатып алмауға да, сатпауға да кеңес береді. Жетеуі сатып алуға (Buy, Overweight) кеңес берсе, екеуі сатуды (Sell, Underweight) ұсынады.
21 қазанда BofA Securities сарапшылары Crocs акцияларының мақсатты бағасын $99-дан $98-ге дейін төмендетіп, сатып алу туралы ұсынымды сақтады, деп хабарлайды Yahoo Finance.
Уолл-стриттің орташа бағалауынша, мақсатты баға $89 шамасында, бұл 30 қазан күнгі жабылу деңгейінен шамамен 8% өсу әлеуетін білдіреді.
