Цукербергпен соттасқан егіздердің криптобиржасы IPO-ға шығады — бағалануы $2,2 млрд
Кэмерон мен Тайлер Уинклвосс ағайындылары құрған Gemini Space Station криптобиржасы АҚШ-та IPO өткізеді. Цукербергті Facebook идеясын ұрлады деп айыптаған ағайындылардың компаниясы алғашқы жария орналастыру кезінде $2,22 млрд-қа дейін бағалануды көздеп отыр. Биржаға шығу процесі инвесторлардың цифрлық активтер IPO-сына қызығушылығы артқан тұста дайындалып жатыр, деп жазады Reuters.
Егжей-тегжейлі
2014 жылы құрылған, Нью-Йоркте тіркелген Gemini криптобиржасы бір акциясын $17–19 бағамен 16,67 млн акция сатуды жоспарлап отыр. Бұл туралы 2 қыркүйекте АҚШ Құнды қағаздар және биржа комиссиясына (SEC) тапсырылған S-1 формасындағы өтінімде айтылған. Осылайша, тартылатын қаражаттың ең жоғары көлемі $317 млн-ға жетуі мүмкін, ал бүкіл компания $2,2 млрд-қа бағалануы ықтимал. Gemini акциясының A класын Nasdaq Global Select Market биржасында GEMI тикерімен листингке шығармақ. Орналастырудың жетекші ұйымдастырушылары Goldman Sachs, Citigroup, Morgan Stanley және Cantor. IPO-дан кейін компания Уинклвосс ағайындыларының бақылауында қала береді, олардың үлесінде 94,7% дауыс беретін акция қалады.
Егер орналастыру жүзеге асса, Gemini акциясы ашық нарықта сатылатын үшінші криптобиржа болмақ, деп жазады Reuters. Бұған дейін биыл рекордтық табыспен Bullish платформасы шыққан, ал ірі америкалық криптобиржа Coinbase қазірдің өзінде биржада саудалануда.
«Circle мен Bullish компанияларының сәтті IPO-ларынан кейін, нарықтың жалпы өсуі мен криптовалюталардың қымбаттап жатқан жағдайында қазір криптокомпаниялар үшін биржаға шығудың шынымен қолайлы уақыты», — деді агенттікке US Tiger Securities сарапшысы Бо Пэй.
Gemini Space Station клиенттеріне 70-тен астам криптовалютамен сауда жасауға мүмкіндік береді. Компанияның проспектісіне сәйкес, 2025 жылдың алты айында оның шығыны жылдық мәнде 582% өсіп, $282,5 млн болды, ал жиынтық табыс шамамен 8% төмендеп, $68,6 млн болды. Gemini табысының 65,5%-ын транзакциялардан түскен кіріс құрайды. Платформадағы Gemini активтерінің құны $18 млрд-тан асады.
Контекст
Gemini АҚШ-тағы алғашқы орналастыру нарығының қарқынды қайта жандану аясында IPO-ға өтінім берді, деп жазады Reuters. Агенттіктің атап өтуінше, өсімге қолайлы конъюнктура мен жаңа эмитенттердің алғашқы сауда күніндегі әсерлі нәтижелері ықпал етті. Бұл инвестордың қызығушылығын арттырып, жекеменшік компанияның көбірек бөлігіне листинг туралы ойлануға түрткі болды.
Gemini-дің жария компания болу ниеті стейблкоин эмитенттерінің алғашқысы — Circle биржаға шыққаннан кейінгі келесі күні белгілі болды. Дебюттік саудада оның акциясы шамамен 170% қымбаттады.
Соңғы дебютанттардың қатарында цифрлық банк Chime Financial мен ғарыш технологиясымен айналысатын Firefly Aerospace компаниясы бар. Екеуі де нарыққа шыққан күні инвесторлар тарапынан жоғары сұранысқа ие болды.
Цифрлық активтер біртіндеп АҚШ-тың дәстүрлі қаржы жүйесіне интеграцияланып жатыр. Мәселен, өткен жылы мемлекеттік реттеушілер споттық биткоин-ETF-ті іске қосуды мақұлдады, ал 2025 жылы Coinbase акциясы S&P 500 индексінің құрамына енді.
Gemini криптобиржасының иелері, Уинклвосс ағайындылары Facebook пен оның бас директоры Марк Цукербергпен болған сот даудан кейін танымал болды. Олар Цукерберг әлеуметтік желі құру идеясын бізден ұрлады деп мәлімдеген. Дау Цукерберг $65 млн төлеуге келіскеннен кейін сотқа жетпей реттелді. Ағайындылар осы өтемақының бір бөлігін биткоинге салып, әлемдегі алғашқы криптомиллиардерлердің бірі атанды. Сол үшін оларды «биткоин-егіздер деп атайды.
