ЕО-ның ең ірі IT-компаниясының акциялары тергеуге байланысты 2%-ға арзандады
Еуропадағы ең ірі бағдарламалық жасақтама әзірлеуші SAP-тың қағаздары АҚШ-тағы саудада 2%-дан астам құлдырады. Бұған Еурокомиссия бастаған монополияға қарсы тергеу себеп болды. Реттеуші орган компанияның кейбір бизнес-тәжірибелері бәсекелестердің ERP-сервистер нарығында жұмысын қиындатуы мүмкін деп есептейді. Сондай-ақ SAP пайдаланбаған уақыт үшін лицензияны ұзартқанда клиенттерден ақы алатыны сынға алынды.
Егжей-тегжейі
25 қыркүйекте Нью-Йоркте SAP депозитарлық қолхаттары 2,3%-ға төмендеп, $262,5-ке түсті. Франкфурттағы саудада құлдырау шамалырақ болды — 1,2%.
Бағаның төмендеуіне Еурокомиссияның SAP-қа қатысты монополияға қарсы тергеуінің басталуы әсер етті. ERP-жүйелер секторында әлемдік көшбасшы болып саналатын компанияға жылдық жаһандық табысының 10%-ына дейін айыппұл салынуы мүмкін, деп жазады Reuters.
SAP нарықтық капитализациясы бойынша Еуропада екінші орында, Нидерландының чип өндірісіне арналған жабдық өндірушісі ASML-ден кейін тұр.
Реттеушінің шағымдары
Еурокомиссия SAP-ты өз ERP-системаларына қызмет көрсетуде еркін бәсекелестікті шектеуі мүмкін деп күдіктенеді.
«Еуропада мыңдаған компания бизнес жүргізу үшін SAP софтын пайдаланады. Бізді SAP осы маңызды нарықтағы бәсекені шектеп, клиенттердің таңдауын азайтып, шығындарын көбейткен болуы мүмкін деген ой алаңдатады», — деді ЕО-ның монополияға қарсы саясат жөніндегі комиссары Тереса Рибера.
Комиссияның пікірінше, SAP клиенттерге пайдаланылмайтын лицензияларға қолдау көрсетуден бас тартуға мүмкіндік бермейді және басқа жеткізушілерге көшуге кедергі жасайды. Компания бастапқы on-premise лицензияларын автоматты түрде ұзартуды жалғастырып келеді. Осы кезеңде клиент қызмет көрсетуді тоқтата алмайды. Егер клиент бір уақытқа қолдауды тоқтатып, кейін қайта қосылса, SAP қазіргі төлеммен бірге пайдаланбаған уақытқа да ақы талап етеді. Реттеуші бұл тәжірибені әділетсіз деп санады.
SAP не дейді?
Компанияның мәлімдеуінше, саясаты бұрыннан қалыптасқан салалық стандарттарға негізделген және ЕО ережелеріне қайшы емес. SAP қаржылық шығын күтілмейтінін айтты.
«Біз бұл мәселелерді Еурокомиссиямен бірлесіп шешуге дайынбыз және олар біздің көрсеткіштерімізге айтарлықтай әсер етпейді», — делінген хабарламада.
Reuters-тің жазуынша, SAP осы аптада ЕО-ның алаңдаушылығын азайту үшін белгілі бір жеңілдіктер ұсынған.
Сарапшылардың пікірі
MarketWatch дерегінше, SAP қағаздары бойынша Нью-Йоркте 16 рейтинг бар. Тоғыз сарапшы сатып алуды (Buy), төртеуі Overweight, үшеуі ұстауды (Hold) ұсынады. Сатуға кеңес бергендер жоқ. Орташа мақсатты баға — $343,09, бұл шамамен 31% өсу әлеуетін білдіреді.
