Evercore енді Procter & Gamble акцияларын ұсынбайды. Өсімге не кедергі?
Инвестициялық банк Evercore ISI Procter & Gamble акцияларын сатып алуға берген кеңесінен бас тартты. Бұл шешім компанияның онлайн-сатылымда бәсекеге төтеп бере алмай жатқанымен түсіндірілді. Көптеген тұтынушылар үйге және гигиенаға арналған тауарларды Amazon-нан сатып алуды жөн көреді, ал P&G компаниясының дәстүрлі бөлшек саудада көрсеткіштері жақсы болғанымен, онлайн-ритейлде динамикасы әлсіз.
Егжей-тегжейлі
Evercore инвестициялық банкі үйге және жеке гигиенаға арналған тауарлар өндіруші Procter & Gamble компаниясының акцияларын сатып алуға берілген ұсынымын кері қайтарды. Сарапшылар рейтингті “Outperform” (нарықтан озық) деңгейінен “In Line” (нарық деңгейінде) деңгейіне түсірді. Сонымен қатар, мақсатты баға 190 доллардан 170 долларға дейін төмендетілді, деп хабарлайды CNBC. Жаңа таргет 12 айлық кезең ішінде котировканың өсу мүмкіндігін сақтап отырғанымен, өсім енді тек 8% шамасында болады — бұл 11 шілде, жұма күнгі сауда жабылу бағасымен салыстырғанда аз.
14 шілде, дүйсенбі күні Procter & Gamble акциялары 2% төмендеді. Жыл басынан бері компания акциялары шамамен 9% минуста.
Procter & Gamble өсіміне не кедергі?
Procter & Gamble компаниясы Walmart пен Costco секілді дәстүрлі бөлшек сауда дүкендерінде жақсы нәтижелер көрсетіп отырғанымен, Evercore зерттеуі компанияның Amazon платформасындағы үлесінің азайғанын атап өтті. Сарапшылардың айтуынша, бұл алаңдаушылық тудырады, себебі Amazon — АҚШ-та үйге және жеке гигиенаға арналған тауарларды сататын ең жылдам өсіп жатқан онлайн-ретейлер, деп жазады Evercore.
«Қазіргі уақытта АҚШ-тағы HPC (үйге және жеке күтімге арналған тауарлар) санатындағы өсімнің 50%-ы Amazon үлесінде. Бұл Procter & Gamble компаниясының өсу қарқынын Walmart пен Costco сияқты негізгі серіктестерімен салыстырғанда АҚШ-та 2 пайыздық пунктке, ал әлем бойынша 1 пунктке артта қалдырады. Осы серіктестерде P&G өзінің ауқымы мен өнім сапасының арқасында бәсекелік артықшылықтарын сақтап отыр», – деп жазады Evercore сарапшысы Роберт Оттенстайн.
Оның пікірінше, тұтынушылардың Amazon-ға ауысуы салдарынан Procter & Gamble өсімі 4%-дан төмен түсуі мүмкін, ал бұл операциялық тиімділікті арттыру үшін қажет деңгейден төмен. Бұған қоса, қытайлық тұтынушылардың да онлайн-сатылымды көбірек таңдауы жағдайды қиындатып отыр. Бұл факторлардың барлығы бизнестің қалпына келуіне кедергі келтіруі мүмкін, дейді Оттенстайн.
Evercore сарапшысының айтуынша, онлайн саудаға көшу — құрылымдық өзгеріс, сондықтан Walmart сияқты компаниялар интернет-платформаларын кеңейтуге кірісіп кетті. Ал Procter & Gamble-ға қазіргі құрылым шеңберінде бұл өзгерістерге бейімделу қысқа мерзімде қиынға соғуы мүмкін, әсіресе макроэкономикалық тұрақсыздық жағдайында, деп есептейді Оттенстайн.
«Procter & Gamble макроэкономикалық жағдайдан сатылымның баяулау тәуекелсін ескеріп отыр, алайда сату арналарының өзгеруінен туындайтын теріс әсер ұзақ уақытқа көрініс табады», – деп ескертті Оттенстайн.
Басқалар не дейді?
Procter & Gamble динамикасын қадағалап отырған 25 сарапшының 17-сі оның акцияларын сатып алуға кеңес береді (рейтингтері — Buy және Overweight). Жетеуі акцияны портфельде ұстауды ұсынады (Hold), ал бір ғана сарапшы оларды сатуға кеңес береді (Underweight).
Уолл-стрит сарапшыларының орташа мақсатты бағасы соңғы жабылу бағасынан 12% жоғары.
