«Феноменалды серпіліс»: 2025 жылы iPhone жеткізілімінен рекорд күтіледі
Apple биыл жаңа iPhone 17-нің шығуы және Қытайдағы сұраныстың жандануы арқасында iPhone жеткізілімінде рекордқа жетеді, деп жазды CNBC зерттеу компаниясы IDC болжамына сүйеніп. Бірақ 2026 жылға болжам белгісіз: iPhone 18 базалық моделінің шығуын кейінге шегеру жеткізілімнің төмендеуіне әкелуі мүмкін.
Егжей-тегжейлі
IDC болжамынша, Apple 2025 жылы 247,4 млн iPhone жеткізеді — бұл 2024 жылмен салыстырғанда 6% көп. Сондай-ақ, бұл көрсеткіш, рекорд болған 2021 жылдан да жоғары, ол кезде жоғары сатылымды iPhone 13 релизі қамтамасыз еткен.
Зерттеу компаниясының мәліметінше, мұндай өсімге ең алдымен Қытайдағы сұраныстың қайта жандануы себеп: елде iPhone 17-ге қатты сұраныс байқалып отыр. 2025 жылдың қазан-қарашасында Apple Қытай нарығында 20%-дан астам үлеспен бірінші орында болды, бұл көрсеткіш бәсекелестерден айтарлықтай жоғары.
«Бұл Apple жеткізілімдерінің Қытайдағы өсіміне қатысты күтуді қайта қарауға алып келді: жылдық мәнде 9%-дан 17%-ға дейін. Соның нәтижесінде, Қытайда 1%-дық төмендеу болады деген алдыңғы болжамның орнына біз 3% өсім күтудеміз. Бұл — феноменалды серпіліс», — деп жазды Seeking Alpha IDC зерттеулерінің аға директоры Набила Попалдың сөзін келтіріп.
Оның айтуынша, ағымдағы жыл Apple үшін тек жеткізілім көлемі бойынша емес, сонымен қатар табыс көлемі бойынша да рекордтық болуы мүмкін: IDC бағалауынша, компанияның табысы 7,2% өсіп, $261 млрд-тан асады. Сарапшылар «жеткізілім» терминін өндіруші дистрибьюция арналарына жіберетін құрылғылар санын білдіру үшін қолданады. Жеткізілім нақты сатылымға тең емес, бірақ компания өз өнімдеріне күтіп отырған сұранысты көрсетеді, деп түсіндірді CNBC.
Компания ахуалы
Қыркүйекте өткен iPhone 17-нің таныстырылымы инвесторлар үшін Apple-ге стратегиялық маңызды оқиға болды. Себебі компания бір мезгілде ЖИ бағытындағы сәтсіздіктерден кейінгі стратегияға деген күмәнмен және Қытайдағы бәсекенің күшеюімен бетпе-бет келді. Huawei сияқты жергілікті өндірушілер америкалық алпауыттың нарықтық үлесін тартып ала бастады.
Қыркүйектің басында — жаңа смартфондар шықпай тұрып, Apple «Керемет жетілік» ішінде Tesla-дан кейінгі ең нашар нәтиже көрсеткен компания болды. Алайда, жаңа модельдердің сәттілігі акцияны жоғары көтерді: қазір қағаз жыл басымен салыстырғанда 14% плюсте.
IDC болжамы өткен аптада жарияланған Counterpoint Research есебінен кейін шықты. Ол есепте Apple 2025 жылы 14 жылда алғаш рет Samsung-тан көп смартфон жеткізетін болады делінген.
Алда не болмақ?
Bloomberg журналисі әрі Apple өнімдеріне маманданған Марк Гурманның мәліметінше, компания келесі жылы дәстүрлі жыл сайынғы күзгі презентациядан бас тартып, смартфон шығару кестесін өзгертеді: 2026 жылдың күзіне Apple iPhone 18 Pro, iPhone 18 Pro Max және жаңа бүктелетін смартфонды шығаруды жоспарлап отыр, ал жобамен жарты жылдан кейін 2027 жылы — iPhone 18, iPhone 18e және, мүмкін, жаңартылған iPhone Air моделін таныстырады.
IDC бағалауынша, бұл келесі жылы Apple жеткізілімінің 4,2% төмендеуіне әкелуі мүмкін.
Сонымен қатар, IDC жады микросхемаларының жаһандық тапшылығы жалғасып жатқанын ескертіп, бұл ұсыныстың шектелуіне және техника бағасының қымбаттауына алып келетінін айтады. Сарапшылардың пікірінше, баға өсімінен ең қатты зардап шегетін сегмент — төмен және орта бағалы Android құрылғылары, өйткені олардың сатып алушылары бағаға аса сезімтал. «Келесі жыл сала үшін оңай болмайды, бірақ соған қарамастан IDC смартфондардың орташа сату бағасы (Average Selling Price, ASP) бойынша рекордтық көрсеткіштерді көруге болады деп санайды», — деді IDC Worldwide Quarterly Mobile Phone Tracker бағдарламасының зерттеу директоры Энтони Скарселла.
