Freedom Holding FXO ETF қатарына енді, қор құрамында Berkshire мен Citigroup те бар

Freedom Holding қаржы холдингінің акциялары First Trust Financial AlphaDEX Fund (FXO) биржалық қорының ребалансировкасы аясында оның құрамына енгізілді. Бұл ETF құрамында сондай-ақ Уоррен Баффет басқаратын инвестициялық холдинг Berkshire Hathaway, Уолл-стриттің ірі банктері Goldman Sachs пен Citigroup, трейдингтік платформа Robinhood, криптобиржа Coinbase және өзге де компаниялардың қағаздары бар.

Freedom Holding-тің бұл қордағы салмағы — 1,22%. ETF ішіндегі ең ірі үлес — 1,68% — OZK америкалық банкінің акцияларына тиесілі.

FXO ETF жайлы не білу керек

FXO-ның мақсаты — StrataQuant Financials индексінің бағасы мен табыстылығына жалпы сәйкес келетін инвестициялық нәтижелерге қол жеткізу. Бұл индекс — AlphaDEX әдістемесі бойынша Russell 1000 индексінің қаржылық қызмет секторындағы акцияларын таңдап, модификацияланған тең салмақты долларлық индекс.

Соңғы бір жылда FXO бағасы шамамен 24%-ға өсті. Zacks сарапшылары маусым айында бұл қорды соңғы бір жылда кең ауқымды америкалық S&P 500 индексінен жақсы нәтиже көрсеткен қаржы секторы ETF-терінің қатарына енгізді. FXO ETF-ке Zacks #2 («Сатып алу») рейтингі берілген.

Freedom Holding-тің жағдайы

Freedom Holding акциялары бір жыл ішінде 90%-ға өсіп, S&P 500 индексінің табыстылығын (+13%) едәуір басып озды. Мамыр айында холдингтің нарықтық капитализациясы алғаш рет $10 млрд шегінен асты. Маусымда холдингтің акциялары Russell 3000 индексіне енгізілді. Бұл индекс — АҚШ-тың ірі, орта және шағын капиталды 3019 компаниясының акциялары мен кейбір микрокапиталды қағаздарының динамикасын бақылайды. Ол АҚШ акциялар нарығының шамамен 98% қамтиды.