IBM Confluent компаниясын $11 млрд-қа сатып алуды талқылап жатыр
Mid-cap санатына кіретін осы компанияның акциялары бұл жаңалықтан кейін 33%-ға өсті. The Wall Street Journal жазғандай, келісім құны шамамен $11 млрд болуы мүмкін және оны 8 желтоқсанда жариялауы ықтимал. Бірақ келіссөз әлі де бұзылуы мүмкін деген қауіп бар.
8 желтоқсандағы премаркетте Confluent акциялары шамамен $30,81 деңгейіне дейін өсіп, соңғы рет мұндай бағада наурызда болған. Жыл басымен салыстырғанда, компания акциялары әлі де 17%-ға арзан (премаркеттегі секіруді есептемегенде).
IBM акциялары премаркетте 0,3%-ға төмендеді, бірақ жыл басынан бері 40%-ға өсіп, Nasdaq Composite индексінің 22%-дық өсімін басып озды. 5 желтоқсандағы сауда жабылған сәтте Confluent-тің нарықтық құны $8 млрд болса, IBM-дікі — шамамен $290 млрд болды. Reuters-ке екі компания да түсініктеме бермеді.
Бұл не үшін маңызды?
Confluent — жасанды интеллект жүйелерінде қолданылатын нақты уақыттағы деректерді өңдеуге мүмкіндік беретін технологияларды ұсынатын компания. AI саласының дамуы осындай технологияларға сұранысты қатты арттырды.
Егер бұл сатып алу жүзеге асса, ол IBM үшін соңғы жылдардағы ең ірі мәміле болады және компанияның бизнесін жасанды интеллектке бағыттап қайта құру стратегиясының бір бөлігіне айналады. Инвесторлар қазір сақ жүр, себебі IBM қазан айында негізгі бұлтты бизнесінің баяулағанын хабарлап, нарықта компанияның әрі қарай өсу қабілетіне қатысты сұрақтар туындаған еді. Сарапшылар IBM-нің жалпы өсімі үшін бағдарламалық қамту бөлімінде қарқын керек екенін айтқан.
2024 жылы IBM HashiCorp компаниясын $6,4 млрд-қа сатып алуға келіскен, бұл да оның бұлтты және AI бағыттарында жылдам ілгерілеуіне әсер етті. Сонымен қатар IBM Google, Microsoft және басқа стартаптармен бірге қазіргі компьютерлерден әлдеқайда қуатты жүйелер — кванттық компьютерлерді дамытуда бәсекелесіп келеді.
Аналитиктер не дейді?
Confluent акцияларына сарапшылардың басым бөлігі «сатып алу» деп баға береді: 19 Buy және бес Overweight рейтингі бар, тоғыз аналитик «ұстау» (Hold), ал тек біреуі «сату» (Underweight) ұсынады.
IBM акцияларына баға сәл әлсіздеу. Ең танымал ұсыныс — «сатып алу» (тоғыз Buy және екі Overweight), бірақ жеті Hold және төрт «сату» (бір Underweight және үш Sell) бағасы бар.
