Қытайлық Pheton акциялары бір күнде 95% құлдырады
Nasdaq биржасында саудаланатын Қытайдың micro-cap Pheton Holdings компаниясының котировкалары 29 шілде күні шамамен 95% құлдырады. Бұл жағдайға инвесторлардың Bear Cave зерттеу порталы жариялаған есепке деген реакциясы себеп болды. Есепте Pheton акцияларының соңғы өсімінде «бағаны қолдан көтеріп, кейін сату» (pump-and-dump) белгілері бары айтылған және инвесторлар миллиондаған шығынға ұшырамай тұрып, реттеуші органдардан бұл қағаздармен сауданы уақытша тоқтатуды сұраған.
Егжей-тегжейлі
Онкологиялық ауруларды сәулелік терапиямен емдеуге арналған құрылғыларды сатумен айналысатын Pheton компаниясының акциялары 29 шілде, сейсенбі күні шамамен 95% құлдырады. Жоғары құбылмалылыққа байланысты бұл қағаздармен сауда кемінде сегіз рет тоқтап, қайта жалғасқан, деп жазады Bloomberg.
Сәрсенбі күні де Pheton котировкалары төмендеуді жалғастырып, тағы 60%-дан астам құнын жоғалтты.
Акциялар неге құлдырады?
Қысқа позицияларды қадағалаумен айналысатын Bear Cave компаниясы сейсенбі күні Pheton-ға арналған есеп жариялады. Онда «шетелдік топтар» Қытайлық компания акцияларымен Gilead Sciences фармгиганты Pheton-ды сатып алады немесе әріптес болады деген сыбыстар арқылы манипуляция жасап отыр» деген күдік айтылған. Есепте көрсетілгендей, осы ақпараттарға байланысты 28 шілдедегі сауда жабылғанға дейін Pheton котировкалары жыл басынан бері 600%-дан астам өскен.
Bear Cave мұны АҚШ биржаларында саудаланатын қытайлық акцияларға жиі қолданылатын схема деп атап көрсетеді. Бұл әдістің мәні мынадай: әуелі «шетелдік алаяқтар» Қытайлық компанияға қатысты мәміле болады деген сыбыс таратады, осыдан кейін акциялар күрт өседі, ал нақты сатып алу болмай қалған кезде бағалар құлайды. Дәл осындай жағдай қытайлық Ostin Technology компаниясында да болған: Universal Display сатып алады деген қауесеттен кейін оның акциялары қымбаттап, кейін қайта құлдыраған.
Bear Cave бұл схема Pheton жағдайында да қолданылған деп санап, реттеуші органға сауданы тоқтатуды ұсынды.
Gilead өкілі Bloomberg-ке берген түсініктемесінде: компания «нарықтағы сыбыстар мен жорамалдарға пікір білдірмейді» деп жауап берді.
Bear Cave деген не?
Bear Cave — инвестор-активистердің қысқа позицияларын, маңызды отставкаларды және «қызықты твиттерді» қадағалауға маманданған, делінген компанияның сайтында. Сондай-ақ, ол ақылы жазылушыларға АҚШ биржаларында саудаланатын эмитенттерге қатысты тергеу материалдарын жариялап отырады. Компанияның негізін қалаушы Эдвин Дорси OPTO Sessions басылымына берген сұхбатында нарық қатты асыра бағалап отырған компанияларға назар аударатынын айтқан. «Егер компанияның қаржы директоры бірден күшіне енетін отставкаға кетсе, ал директорлар кеңесінің мүшесі немесе бас есепші тіпті бір жыл бұрын жұмыстан шыққан болса да, бұл сұрақ туғызады: мүмкін, нарық байқамай отырған бір мәселе бар шығар?» — деп түсіндірген ол.
Мысалы, 2021 жылы Bear Cave франшизалық негізде хиропрактика клиникаларын дамытып жатқан The Joint компаниясы акцияларының күрт өсуіне назар аударған. Тұтынушылардың шағымдарын зерттеген Дорси компания бір реттік ем жасау орнына клиенттерді шексіз келісімшартқа отырғызғанын, тіпті кейбір қолтаңбалар жалған болғанын анықтаған. Тергеудің жариялануы компания котировкаларының шамамен 84% төмендеуіне әкелді.
