Кэти Вуд CoreWeave акциясы 45% құлаған соң сатып алды. Үлгісін қайталау дұрыс па?
Инвестор Кэти Вудтың Ark Invest компаниясы 24 қарашада екі биржалық ETF арқылы Nvidia-ның бұлттық серіктесі — ЖИ үшін бұлттық есептеулер жеткізуші CoreWeave-дің 400 мыңнан аса акциясын сатып алды. Сол кезде бұл қағаз бір айда 45% құлдыраған еді. Ал 25 қарашадағы саудада CoreWeave қағазы тағы 4,1% арзандап, $70,6-ға дейін түсті — бұған Nvidia акциясының 7% төмендеуі және техсектордағы кең ауқымды құлдырау әсер етті.
Seeking Alpha жазғандай, бұл мәміле Ark компаниясының жоғары құбылмалылыққа қарамастан CoreWeave-дің ұзақмерзімді әлеуетіне сенетінін көрсетеді. Баспасөздің атап өтуінше, Ark нарықтағы көңіл күйдің жекелеген ЖИ-ойыншыларға қатысты суый бастағанына қарамастан, тосын технологияларды дамытып жатқан компанияларға ставка жасауды жалғастырып отыр.
Сатып алудың басым көлемі Ark-тың флагмандық қоры — ARK Innovation ETF-ке тиді, ол 396 178 акция қосты. Мәміледен кейін бұл қордағы CoreWeave үлесінің нарықтық құны $52,4 млн болып, жалпы портфельдің 0,7%-ын құрады. Екінші қор — ARK Next Generation Internet ETF — тағы 41 167 акция сатып алып, осы позицияның құнын $35,75 млн-ға жеткізді, бұл портфельдің 1,71%-ына тең.
Акция неге құлап жатыр?
CoreWeave қағазы инвесторлардың ЖИ-сектор қымбат бағаланған болуы мүмкін деген қауіптері аясында, сондай-ақ 11 қарашадағы есептен кейін төмендеп жатыр. Есепте компания үшінші тоқсанда операциялық пайда маржасы 4% болғанын хабарлады — бұл сарапшылардың 6,5% консенсус-болжамынан төмен. Салыстыру үшін: 2024 жылдың сол кезеңінде маржа 20% болған.
Маржаның төмендеуі жалпы жағымды есептің әлсіз тұсы болды, деп жазды Bloomberg. Компанияның табысы 134% өсіп, $1,36 млрд-қа жетті. Уолл-стрит, LSEG дерегінше, $1,29 млрд күтген, деп хабарлады CNBC. Акцияға шаққандағы шығын $0,22 болды, ал сарапшылар $0,57 болжайтын. Есепте сондай-ақ болашақ сатылымды көрсететін backlog көлемі тоқсан соңында $55,6 млрд болғаны жазылған — бұл алдыңғы кезеңмен салыстырғанда шамамен екі есе көп, деп атап өтеді Bloomberg.
MarketWatch дерегінше, бұлттық есептеулер жеткізушінің акция динамикасын қадағалап отырған 31 сарапшы бар. Олардың сатып алуға — 16, ұстауға — 13, ал сатуға — 2 сарапшы кеңес берді. Уолл-стриттің консенсус бағасы — CoreWeave акциясы үшін $130,9, бұл 24 қарашадағы жабылудан шамамен 78% жоғары.
