Meta акциясы 14% құлдырады. Екі сарапшы сатып алу кеңесінен айныды
30 қазандағы сауда басында Meta акциясы шамамен 14% құлдырап, соңғы бес айдағы минимумды жаңартты. Егер осындай динамика сақталса, бейсенбі компанияның котировкасы үшін соңғы үш жылдағы ең нашар күн болуы мүмкін. Кешегі есепте Meta келесі жылы капиталды шығындардың 2025 жылмен салыстырғанда «айтарлықтай жоғары» болатынын, ал жалпы шығындардың биылғыдан «анағұрлым жылдам қарқынмен» өсетінін хабарлады. Бұл мәлімдеме инвесторлар мен сарапшыларды алаңдатты: Oppenheimer және Benchmark инвестициялық банкі Meta акциясын сатып алуға берген кеңесінен айныды, ал тағы бірнешеуі мақсатты бағасын төмендетті, деп жазды CNBC.
— Oppenheimer 30 қазанда Meta акциясы бойынша ұсынымын «сатып алудан» (Outperform) «ұстап тұруға» (Market Perform) өзгертті және бұрынғы $696 деңгейіндегі бағалау көрсеткішін алып тастады. Банк сарапшыларының айтуынша, Meta-ның жасанды интеллектке (AI) ірі инвестициялары нақты табыс перспективалары болмаған жағдайда 2021–2022 жылдардағы метавселенеге жұмсалған шығындарды еске салады. Oppenheimer атап өткендей, инвесторларға компанияның ағымдағы бағалауын ақтау қиын, өйткені табыстың агрессивті өсуі тым жоғары шығындармен қатар жүріп жатыр.
— Benchmark те Meta акциясын сатып алуға кеңес беруді тоқтатып, рейтингін Buy-дан Hold-қа дейін төмендетті. Банк болжамынша, Meta котировкасы компания тез өсіп жатқан капиталды шығындардың тиімділігін дәлелдемейінше, тар диапазонда қалуы мүмкін. Сарапшылар Meta-ның жарнамадан тыс AI бағыттарына, соның ішінде робототехника жобалары мен Llama моделін дамытуға, белсенді түрде инвестиция салып жатқанын айтты. Алайда, бұл инвестициялардың қайтарымы әзірге белгісіз, әсіресе OpenAI, Google, Tesla және өзге де ірі AI-зертханалар тарапынан күшейіп келе жатқан бәсекенің аясында.
— Barclays Meta акциясын сатып алуға берген ұсынымын (Overweight) сақтап қалды, бірақ мақсатты бағасын $810-дан $770-ға дейін төмендетті. Жаңа таргет 29 қазандағы саудадағы жабылудан небәрі 2,4% жоғары. Банк атап өткендей, Meta-ның табысы 2024 жылдың бірінші тоқсанынан бері ең жоғары өсім қарқынын көрсеткенімен, бұл жетістік инвестициялардың, әсіресе AI саласындағы шығындардың артуымен көмескіленді. «Бұл күтпеген жағдай емес және ұзақ мерзімді перспективада жақсы нәтижелер беруі мүмкін, алайда мұндай шығындар 2026 жылғы операциялық пайданы өсіру әлеуетін және дерлік барлық еркін ақша ағынын азайтады», — деп жазды Barclays сарапшылары.
— Citi де Meta акциясына Buy (сатып алу) рейтингін растады, бірақ мақсатты бағасын $915-дан $850-ға дейін қысқартты. Банк пікірінше, акцияда 16%-ға жуық өсу әлеуеті бар. «Meta пайдаланушылардың белсенділігін арттырып, жарнама кірісін көбейткен табысты инвестициялар тәжірибесіне ие. 2026 жылы жаңа белгісіздік факторлары пайда болуы мүмкін болғанымен, біз компанияның өнім мен монетизация бағыттарындағы бірнеше күшті драйверлері оның тұрақты өсуін қамтамасыз ете алады деп санаймыз», — деді Citi сарапшылары.
— MarketWatch дерегінше, қазір Meta акциясын 70-тен астам сарапшы қадағалауда, олардың шамамен 75%-ы инвесторларға сатып алуға кеңес берді (рейтингтері — Buy және Overweight). Уолл-стритте тек бір ғана сарапшы Meta қағазы бойынша сатуды ұсынып отыр. Орташа мақсатты баға — $869, бұл соңғы жабылудан 16% жоғары өсу әлеуетін білдіреді.
