Nvidia-ға бәсекелес Broadcom чипмейкері мықты болжам жариялады
Келісімшарт бойынша микропроцессор өндіруші Broadcom жылдық болжамы мен тоқсандық нәтижелері сарапшылар күткеннен жақсы болғанына қарамастан, 11 желтоқсандағы постмаркетте акциясы 5% құлдырады. Есептен кейін өткен конференц-қоңырауда жарияланған алдағы алты тоқсанға арналған бэклог көлемі инвесторларға ұнамады, деп жазды Bloomberg. Ал сәуірден бері Broadcom қағазы гиперскейлерлердің ЖИ-ға шығынын арттыруы аясында екі еседен көп қымбаттады, сондықтан инвесторлар компания осы шығындардың негізгі бенефициары болады деп күтеді.
Чипмейкер қандай есеп берді?
Broadcom-ның 2025 қаржы жылының 3 қарашада аяқталған төртінші тоқсандағы табысы 28% өсіп, $18,02 млрд құрады. Бұл Уолл-стриттің $17,49 млрд болжамынан жоғары, деп жазды CNBC. Түзетілген бір акцияға шаққандағы пайда 37% артып, $1,95-ға дейін жетті, ал консенсус бағасы $1,86 деп күтілген еді.
Компания есептік тоқсанда ЖИ-стартап Anthropic-тен $11 млрд көлемінде тапсырыс алғанын хабарлады, бірақ ЖИ-чиптер сатылымының өсуі жалпы рентабельділіктің төмендеуімен қатар жүретінін ескертті. Сонымен қатар Broadcom $1 млрд-қа тағы бір келісімшартқа қол қойды, бірақ клиенттің атын атаған жоқ.
Broadcom жылдық ЖИ-чип сатылымын екі есе өсіріп, $8,2 млрд-қа жеткізуді жоспарлап отыр. Ал қазіргі тоқсанда табысы $19,1 млрд-қа дейін өседі деп күтеді — салыстыру үшін, Уолл-стриттің орташа болжамы $18,5 млрд болған, деп жазды Bloomberg.
Инвесторларға не ұнамады?
Есеп жарияланғаннан кейін Broadcom акциясы постмаркетте 3% күрт өсті, бірақ сарапшылармен телефон конференциясы барысында бас директор Хок Тан алдағы алты тоқсанда жеткізілетін ЖИ-чиптерге арналған тапсырыс портфелі $73 млрд екенін айтты. Бұл сан кейбір инвесторларды көңілсіз қалдырып, котировканың кері бұрылып, 5%-ға минусқа кетуіне әкелді, деп жазды Bloomberg. Тан бұл көрсеткіш «ең төменгі шек» екенін атап өтіп, сол алты тоқсан ішінде жаңа тапсырыстар түскен сайын көлем одан да артады деп күтетінін айтты.
Контекст
Компания дата-орталықтарға арналған кастомды чиптер сатылымын белсенді түрде арттырып, саланың көшбасшысы Nvidia-дан нарық үлесін тартып келеді. Соңғы айларда Broadcom акциясының өсуіне негізгі факторлардың бірі — ірі ЖИ-модель жеткізушілерімен серіктестік. ChatGPT әзірлеушісі OpenAI қазанда Broadcom-пен ЖИ-ға арналған өз жартылай өткізгіштерін жасау туралы келісімге келді. Бұл келісім ЖИ-сервистерді қолдау үшін Broadcom-ның кастомды чиптері мен желілік компоненттерін пайдалануды көздейді. Bloomberg жазғандай, бұл кастомды чиптер бөлімінің табысын ұлғайтып, компанияның қарқынды өсіп жатқан ЖИ-нарығындағы үлесін кеңейтеді.
Бұдан бөлек, Anthropic ЖИ-стартапы Broadcom қатысуымен жасалған тензорлық процессорлар (TPU) негізіндегі Google Cloud инфрақұрылымын пайдалануға міндеттелген. Сарапшылар жақсы бағалаған Google-дың жаңа Gemini 3 моделі де TPU базасында оқытылған, бұл қараша айының соңында Broadcom акциясының күрт өсуіне ықпал етті.
8 желтоқсанда компания қағазы тарихи максимум жаңартты: инсайдерлік басылым The Information Microsoft компаниясы Broadcom-ның жаңа клиенті болуы мүмкін екенін хабарлағаннан кейін инвесторлар белсенді реакция танытты.
