Таңғы шолу: Трамп жаңа тарифтер енгізді, Apple инвесторларды қуантты

Apple рекордтық $94 млрд табыс пен iPhone сатылымының 13%-ға өсуін тіркеді және жасанды интеллектке инвестицияны арттырып жатыр. Amazon табыс пен кіріс бойынша болжамнан асып түсті, бірақ бұлтты бизнес — AWS бойынша әлсіз болжамдар салдарынан акциялары арзандады. Figma биржадағы алғашқы күнінде орналастыру бағасынан 250%-дан астам өсім көрсетіп, технологиялық IPO-ларға деген инвесторлық қызығушылықтың қайта оралғанын байқатты. Осы және басқа да тақырыптар жайлы — 1 тамыз таңындағы негізгі оқиғалар шолуында.

Трамп АҚШ-тың барлық сауда әріптестеріне 40%-ға дейінгі жаңа баж салығын енгізді

Бейсенбі кешке Ақ үй президент Трамптың АҚШ-тың сауда саясатын түбегейлі қайта қарау жоспарының жаңа мәліметтерін жариялады. Yahoo Finance-тың хабарлауынша қол қойылған жарлыққа сәйкес, елдің жаһандық сауда әріптестерінің басым бөлігіне 10%-дан 40%-ға дейінгі жаңа тарифтер енгізіледі.

Ең басты назар Канадаға салынып отырған баж салығының 25%-дан 35%-ға дейін артуында. Бұл шара жұма күні күшіне енеді және есірткі айналымымен күреске бағытталған арнайы жарлықпен байланысты. Қалған елдер үшін жаңа тарифтер бір аптадан соң күшіне енеді, бұрын жоспарланғандай жұма түнінен емес. Сонымен қатар, 7 тамызға дейін жүктелген және 5 қазанға дейін АҚШ-қа жететін тауарларға бұрынғы, төмендеу мөлшерлемелер қолданылады.

Жаңа жарлыққа сәйкес Үндістан 25% тарифпен, Тайвань — 20%, Еуроодақ, Оңтүстік Корея және Жапония — 15%, Оңтүстік-Шығыс Азия елдері — 19–20% мөлшерінде салық төлейтін болады. Ұлыбритания 10% деңгейін сақтап қалды. Мексика үшін тарифтер 25% деңгейінде қалды — Трамп бұл шешімді «өте сәтті» телефон арқылы сөйлесудің нәтижесі деп атады.

Ондаған басқа ұсақ сауда әріптестері үшін тарифтер 10%-дан 15%-ға дейін артты. Дегенмен АҚШ-пен сауда профициті бар кейбір елдер үшін Трамптың бұған дейін жариялаған «ең төменгі мөлшерлеме — 15%» деген мәлімдемесіне қарамастан, 10% мөлшерінде қалды. Жарлықта транзиттік жеткізілімдермен (transshipping) күресу ережесі де бар: егер тауар үшінші ел арқылы баж салығын айналып өтпек болса, оған 40% қосымша салық салынуы мүмкін, бірақ нақты бұзушылықтың анықтамасы әзірге берілмеген.

Apple рекордтық табыс тіркеді

Apple қаржылық үшінші тоқсан бойынша мықты нәтижелерін жариялап, аналитиктердің барлық негізгі көрсеткіштер бойынша болжамынан асып түсті. Компания табысы 10%-ға артты — бұл 2021 жылдың соңынан бергі ең жоғары өсім. iPhone сатылымы 13%-ға өсіп, $44,58 млрд-ты құрады, бұған жаңа iPhone 16 желісіне деген жоғары сұраныс себеп болды. Жалпы табыс $94,04 млрд болды, ал бір акцияға шаққандағы пайда $1,57 құрап, консенсус-болжамнан жоғары шықты.

Mac бөлімшесі ең жоғары өсімді көрсетті — шамамен 15%, $8,05 млрд табыс. Қызмет көрсету бағыты, оның ішінде жазылымдар, iCloud және App Store $27,42 млрд алып келді — бұл өткен жылмен салыстырғанда 13%-ға көп. iPad пен киілетін құрылғылар сатылымы 8%-ға төмендеді. Қытайда өткен жартыжылдықтағы белсенділіктің төмендеуіне қарамастан, Apple табысы 4%-ға өсті — бұған мемлекеттік субсидиялар көмектесті.

Генеральді директор Тим Кук компания жасанды интеллектке инвестицияны айтарлықтай арттырып жатқанын және оны өнімдерге, платформаларға және бизнес-процестерге енгізіп жатқанын айтты. Apple-дің $133 млрд бос қаражаты бар және биыл шамамен жеті компанияны сатып алған, бірақ олардың ешқайсысы доллармен ірі мәміле саналмайды. Оның айтуынша, ИИ құрылғылар iPhone-ды алмастырмайды, тек толықтырады: «iPhone-сыз әлемді елестету қиын». Apple келесі тоқсанда табыс 5–9% деңгейінде, тіпті баж салығынан туындайтын қосымша шығындарға қарамастан өседі деп күтеді.

Amazon табыс пен кіріс бойынша болжамнан асты, бірақ акциялары арзандады

Amazon бейсенбі сауда жабылған соң екінші тоқсан бойынша қаржылық нәтижелерін жариялап, табыс пен кіріс бойынша аналитиктердің күткенінен асып түсті. Компания үшінші тоқсан бойынша да оптимистік болжам ұсынды — болжамды табыс $174–179,5 млрд аралығында, ал нарық $173,2 млрд күткен, деп хабарлайды Yahoo Finance.

Алайда есептен кейін Amazon акциялары 2%-дан астам төмендеді — инвесторлар бұлтты қызмет бағыты AWS-тың нәтижелеріне көңілі толмады, себебі ол Google мен Microsoft-пен салыстырғанда әлсіз болды. Үшінші тоқсандағы операциялық пайда $15,5–20,5 млрд шамасында болмақ, ал аналитиктер $19,5 млрд күтті.

Екінші тоқсанда Amazon бір акцияға шаққанда $1,68 пайда тапты, жалпы табыс $167,7 млрд — нарық тиісінше $1,33 және $162,1 млрд күткен. Былтырғы осы кезеңде пайда $1,26, табыс — $147,9 млрд болған. AWS табысы $30,8 млрд болды — бұл $30,7 млрд болжамнан сәл жоғары және өткен жылғы $26,2 млрд көрсеткіштен айтарлықтай артық. Amazon интернет-дүкеніндегі сатылымдар $61,4 млрд құрады.

Бұл кезде бәсекелестер бұлтты сегментте үдей түсті. Microsoft Azure табысы $75 млрд-қа жетіп, компанияға нарықтық капитализациясы бойынша $4 трлн межеден өтуге көмектесті. Alphabet бұлтты табыстың 32%-ға өскенін және тапсырыс портфелінің 38%-ға артқанын хабарлады. Google іздеу бизнесі де жылдық есеппен 12%-ға өсіп, болжамнан асты. Wedbush сарапшылары жалпы тұтынушылық сұраныс макроэкономикалық белгісіздікке қарамастан күткеннен тұрақтырақ болғанын атап өтеді.

Figma алғашқы сауда күнінде 250%-дан астам өсім көрсетіп, $45 млрд-тан астам бағаланды

Figma бейсенбіде сауданы бір акцияға $85 бағамен бастады және $117-ден жоғары бағамен жапты — бұл IPO бағасы $33-тан 250%-дан астам жоғары, деп хабарлайды Yahoo Finance. Компанияның нарықтық капитализациясы алғашқы сауда күні соңында $45 млрд асты. Сауда барысында құбылмалылыққа байланысты бірнеше рет тоқтату болды.

Figma-ның биржаға шығуы жаңа технологиялық IPO-ларға деген инвесторлық қызығушылықтың жоғары екенін көрсетті: компания бағаны күтілген $30–32 диапазонынан жоғары қойды және IPO барысында 36,94 млн акция (12,47 млн — компаниядан, 24,46 млн — қолданыстағы акционерлерден) сату арқылы шамамен $1,2 млрд тартты.

Figma 2025 жылы IPO нарығы жандана бастаған тұста жұлдызы жанған тағы бір технологиялық компанияға айналды — бұған дейін Circle және CoreWeave де ұқсас жетістікке жеткен. Компания бұған дейін Adobe-мен $20 млрд мәміледен еуропалық монополияға қарсы реттеушілердің қарсылығына байланысты бас тартқан. Figma табысы жылдық есеппен 46%-ға артқан, ал оның өнімдерін Forbes 2000 тізіміндегі компаниялардың 75%-дан астамы қолданады.

Figma-ның сәтті IPO-сы тарифтік саясаттың салдарынан сәуірдегі белгісіздіктен кейін қалпына келе бастаған IPO нарығындағы оң динамиканы нығайтты, деп жазады басылым.

Нарықтағы жағдай

— Жапонияның кең Topix индексі сауда ашылғанда өзгеріссіз қалды.

— Nikkei 225 индексі 0,7%-ға төмендеді.

— Оңтүстік Кореяда Kospi индексі 1,7%-ға, шағын компаниялар Kosdaq индексі 2,1%-ға төмендеді.

— Австралияның S&P/ASX 200 индексі 0,9%-ға құлады.

— S&P 500 фьючерстері 0,2%-ға, Nasdaq 100 — 0,3%-ға төмендеді, ал Dow Jones фьючерстері өзгеріссіз қалды.