Трамп Израиль мен Иран арасындағы соғыстың тоқтайтынын мәлімдеді
Израиль мен Иран атысты тоқтатып, «он екі күнге созылған соғысты» аяқтауға келісті. Бұл туралы АҚШ президенті Дональд Трамп мәлімдеді. Оның айтуынша, екі ел алдымен қазіргі әскери операцияларын аяқтап, кейін Иран оқ атуды тоқтатады, одан кейін Израиль қосылады. Осылайша, Таяу Шығысты «жойып жіберуі мүмкін» болған соғыс аяқталады. Бұл мәлімдемеден кейін АҚШ-тың акция фьючерстері өсті.
Мәліметтер
«Құттықтаймын! Израиль мен Иран арасында атысты толық тоқтату келісілді. Бұл олар қазіргі соңғы миссияларын аяқтаған соң алдағы 6 сағат ішінде жүзеге асады. Сосын 12 сағаттық атыс тоқтатылады. Осыдан кейін соғыс ресми түрде аяқталған деп саналады!», – деп жазды Трамп 24 маусымда Truth Social әлеуметтік желісінде.
Президенттің айтуынша, алдымен Иран атысты тоқтатады, Израиль одан кейін 12 сағат өткен соң. Бұдан кейінгі 12 сағатта тараптар бір-біріне шабуыл жасамайды. Осылайша, 24 сағат ішінде «он екі күндік соғыстың ресми аяқталғанын» жариялауға болады. Осы кезеңде екі ел де «бейбіт әрі сыйластықпен» әрекет етуі тиіс.
«Егер бәрі жоспарға сай өтсе, мен Израиль мен Иранды – бұл соғысты ақылмен әрі төзімділікпен тоқтата алғандары үшін шын жүректен құттықтаймын. Бұл соғыс жылдарға созылып, Таяу Шығысты жойып жіберуі мүмкін еді. Бірақ ол болмады әрі енді болмайды да! Құдай Израильді сақтасын, Құдай Иранды сақтасын, Құдай Таяу Шығысты сақтасын, Құдай АҚШ пен әлемге тыныштық берсін!», – деді Трамп.
CNBC мәліметінше, Трамп мәлімдеме жасағаннан кейін бірден Израиль мен Иран тарапынан атысты тоқтату жөнінде ресми растау болмады.
Нарықтағы ахуал
Трамп мәлімдеме жасаған кезде АҚШ-тың негізгі биржалары жабық болатын. Бірақ президенттің жазбасынан кейін фьючерстердің өсімі жеделдеді: Yahoo Finance мәліметінше, Dow Jones және S&P 500 индекс фьючерстері 0,4%-ға, Nasdaq 100 фьючерстері 0,6%-ға көтерілді. 23 маусымдағы негізгі сессия шамамен 1% өсіммен аяқталған.
Brent маркалы мұнай фьючерстері 23 маусымда Лондондағы саудада 8%-ға арзандап, бір баррель үшін 70,65 долларға дейін түсті. Трамп бұл жазбасын мұнай саудасы аяқталған соң жариялаған.
Инвесторлар дүйсенбі күніне дейін уайымдап отырған: демалыс күндері АҚШ Иранның ядролық нысандарына соққы жасаған болатын. Иран жауап ретінде Ормуз бұғазын жабуы мүмкін деген қауіп болды, себебі бұл бұғаз арқылы әлемдік мұнайдың төрттен бірі өтеді. Алайда 23 маусымда жағдай Уолл-стрит үшін қолайлы өрбіді: нарықтағы пікір бойынша Иранның АҚШ базасына жасаған соққысы деэскалацияға ұмтылыстың белгісі болды. Осыған байланысты акциялар қымбаттап, мұнай арзандады.
Трамп Иранның соққысын «өте әлсіз» деп бағалап, бұл шабуыл арқылы Тегеран «эмоциясын сыртқа шығарды» деп мәлімдеді. Ол сонымен қатар, Иран АҚШ-ты алдын ала ескерткенін айтып, бұл америкалықтар мен Катар тұрғындарының өмірін сақтап қалуға көмектесті деді. Трамптың айтуынша, ешкім қаза тапқан жоқ, жараланғандар да жоқ.
