Трамп пен Big Tech арасында: Alcoa 2026 жылы өсімін сақтай ала ма?
Әлемдегі ең ірі алюминий өндірушілердің бірі — америкалық Alcoa биыл бірнеше рет инвесторларға жағымсыз жаңалық жеткізді. Бірақ соған қарамастан, негізгі қаржылық көрсеткіштерін өсіріп келеді. Ендеше, 2026 жылы компанияға сенім артқан дұрыс па?
«Қажетсіз» қолдау
10 ақпанда АҚШ президенті Дональд Трамп болат пен алюминий импортына баж салығын 10%-дан 25%-ға көтеретінін мәлімдегенде америкалық металлургиялық компаниялардың акциялары 5–18%-ға қымбаттап кетті. Ал еуропалық және азиялық өндірушілердің бағасы құлдырады. Бұл шешімнен ең көп ұтатындардың бірі ретінде Alcoa аталды.
Маусымда баж салығы 50%-ға дейін көтерілді. Бірақ Alcoa үшін бұл оң шешім бола қойған жоқ. Себебі компанияның Солтүстік Америкадағы клиенттеріне металл негізінен Канададағы зауыттарынан жеткізіледі. АҚШ-тағы төрт алюминий зауытының екеуі ғана Alcoa-ға тиесілі, ал өндірістің үштен бірі ғана ел ішінде жүзеге асады.
Соған қарамастан, компания биылғы есептерінде баж салығының теріс әсерін азайта алды. Бұл Alcoa үшін алғашқы тәжірибе емес: Трамптың алғашқы президенттік мерзімінде, 2018 жылы да 10%-дық баж салығы енгізілген болатын.
2026 жылы Alcoa АҚШ пен ЕО-дағы қорғаныс тапсырыстарының өсуінен пайда көруі мүмкін.
Трамптан бастап блэкаутқа дейін
Alcoa акциялары жыл басынан бері құлдырап келеді: қаңтарда орташа бағасы $36,78 болса, 8 қыркүйекте $32-ға дейін түсті (–15%).
Компания 2025 жылы бірнеше рет инвесторларға ауыр хабар айтты: екінші тоқсанда Канададан әкелінген металл үшін Трамп енгізген баж салығына $115 млн төледі; әлемдік алюминий мен глинозем бағасының төмендеуі де қысым жасады; Испаниядағы Сан-Сиприан зауыты сәуірде елдегі ауқымды энергия жүйесінің істен шығуына байланысты тоқтап қалды. Өндіріс шілдеде қайта іске қосылды, бірақ толық қуатқа тек 2026 жылдың ортасында жетпек. Бұл жоба бойынша компания 2025 жылы $90–110 млн таза шығын күтуде.
Сонымен қатар, энергетика шығындары да өсіп жатыр. Электр энергиясының бағасы тым жоғары, ал АҚШ пен Еуропадағы алюминий өндірушілер Big Tech компанияларымен бәсекеге түсуде. Себебі Google сияқты техногиганттар дата-орталықтарын дамыту үшін электрге әлдеқайда көп төлеуге дайын.
The Wall Street Journal дерегінше бәсекеге қабілетті болу үшін алюминий зауыттарына кемінде 15 жылға $30/мВт·сағ шарт қажет. Бірақ АҚШ-та қазірдің өзінде $60–100 төлеп отыр.
Дегенмен, Alcoa 2025 жылдың екінші тоқсанында: жылдық табысын 3,85%-ға өсіріп, $3,1 млрд-қа жеткізді; таза пайдасын 720%-ға арттырып, $164 млн көрсетті; акцияға шаққандағы пайда $0,39 болды (күтілген $0,06 орнына).
Бұл нәтижеге баж салығынан қашу үшін канадалық 100 мың тонна металды басқа нарықтарға бағыттауы, Сауд Арабиясының Ma’aden компаниясындағы 25,1% үлесін $1,35 млрд-қа сату әсер етті.
Аналитиктердің орташа болжамы онша оптимистік емес: 2025 жылға болжамды табыс — $12,49 млрд, EBITDA — $1,88 млрд; 2026 жылға табыс — $12,33 млрд (–1,3%), EBITDA — $1,86 млрд (–1,1%).
Яғни ресми болжам төмендеуді көрсетеді. Бірақ онда ЕО-дағы өндірістің қайта жандануын және баж салығына бейімделуді толық ескермеген.
Қорғаныс саласы мен санкциялар
SIPRI дерегінше 2024 жылы жаһандық әскери шығын рекордтық $2,72 трлн болды, оның негізгі өсімі Еуропаға тиесілі (+17%). 2025 жылы ЕО-ның қорғаныс шығыны €381 млрд-қа жетуі мүмкін. НАТО елдері ЖІӨ-нің 2%-нан астамын әскери салаға бөле бастады.
Бұл металлға деген сұраныстың артуын білдіреді. Alcoa үшін бұл тікелей болмаса да, жағымды фактор: авиация мен қорғаныс өндірісіне алюминий жеткізу; жоғары берікті алюминий парақтары, плиталар, дрондар мен қару жүйелеріне арналған бөлшектер.
Alcoa бұл сегментте негізгі ойыншы болмаса да, сұраныстың өсуінен ұтады. Оның үстіне ЕО Ресейден алюминий импортын тоқтатпақ, ал Қытай өндіріске тез жауап бере алмайды.
Alcoa қысқа мерзімде баж салығы, энергия бағасы және өндірістік кідірістерден қысым көруде. Бірақ ұзақ мерзімде қорғаныс саласы, ЕО-дағы зауыттардың қайта іске қосылуы және санкциялық өзгерістер компанияны қолдауы мүмкін.
