UGG етіктеріне сұраныстың аздығынан Deckers акциясы құлдырады. Сату керек пе?
Deckers Outdoor аяқ киім өндірушісінің қағазы жұма күнгі саудада 15% құлдырап, соңғы екі жылдағы минимумға түсті. Инвесторлар Hoka және UGG брендінің иесіне тиесілі компанияның тоқсандық есебіне өткір реакция білдірді: бейсенбінің кешінде жарияланған есепте компания табыс бойынша сарапшылардың күткенінен төмен болжам беріп, оны баж салығының әсерімен түсіндірді. Осыдан кейін оннан астам сарапшы компания акциясының мақсатты бағасын қайта қарады, бірақ қағазды сатып алуға кеңес бергендердің ешқайсы өз ұсынысынан бас тартқан жоқ.
Егжей-тегжейлі
Deckers акциясы 24 қазан, жұма күні саудада 15,2% құлдырап, $87-ға дейін төмендеді — бұған себеп, бейсенбінің кешінде жарияланған жылдық сатылым бойынша әлсіз болжам. Бұл компания қағазының 2023 жылдың қазанынан бергі минималды бағасы.
Компания тоқсандық нәтижелерін жариялай отырып, ағымдағы 2026 қаржы жылындағы табысы шамамен $5,35 млрд болатынын мәлімдеді. Ал LSEG дерегінше, Reuters келтірген консенсус-болжам $5,45 млрд деңгейінде болған. Компания жыл соңына қарай АҚШ-та баж салығы мен баға өсімінің әсерінен тұтынушылардың сақтық танытуы ықтимал екенін айтты.
2026 қаржы жылының екінші тоқсанында, яғни 30 қыркүйекте аяқталған кезеңде, Deckers-тің жылдық мәндегі табысы 9,1% өсіп, $1,43 млрд құрады, бұл сарапшылар бағалауынан сәл жоғары. Бір акцияға шаққандағы пайда $1,82 болып, Уолл-стрит күткен $1,58-дан жоғары нәтиже көрсетті.
Сарапшылар пікірі
Jefferies сарапшысы Эшли Хелганс бейсенбі кешінде клиенттерге арналған жазбасында Deckers Outdoor акциясы үшін негізгі теріс фактор — UGG аяқ киімінің тікелей сатылымының азайғаны болуы мүмкін екенін айтты, себебі бұл көрсеткіш бір жылда 10% төмендеген, дейді Reuters. Оның пікірінше, бренд инерциясының төмендеуі промоакциялардың артуына әкелуі мүмкін, ал бұл операциялық рентабельділік орташа деңгейге қайта түскен кезде теріс сценарийдің басты бөлігіне айналады. Сонымен қатар, ол Hoka бренді АҚШ-тағы жүгіру аяқ киімі нарығында өз позициясын нығайтқанын атап өтті. Сарапшы Deckers қағаздарының таргетін $107-дан $102-ға дейін төмендетті, бұл жұма күнгі жабылудан 17,2% жоғары, және акцияға бейтарап рейтингті сақтады.
«Deckers нәтижелері мен болжамы көңіл көншітпейді, және бізді UGG бизнесі барған сайын алаңдатып отыр», — деді Truist сарапшысы Джозеф Чивелло, деп жазады Barron’s. Оның айтуынша, UGG етіктері мен Hoka кроссовкаларының сатылым өсімінің шарықтау шегі өтіп кеткен, ал тұтынушылардың шектеулі бюджеті мен бәсекелестіктің күшеюі сұраныстың одан әрі төмендеу қаупін арттырады. Сарапшы Deckers акциясын сатып алу бойынша ұсынысын сақтап қалғанымен, мақсатты бағасын $145-дан $105-ға дейін қысқартты — бұл Уолл-стрит сарапшылары арасындағы ең ірі төмендету. Дегенмен, жаңа баға компанияның акциясына шамамен 20% өсу әлеуетін білдіреді.
«Біздің ойымызша, 2027 қаржы жылында Deckers үшін баж салығының қысымы жалғасады, бірақ біз бағаны тағы да көтеру арқылы оның бөлігін өтейді деп күтеміз — себебі тұтынушылар әлі күнге дейін қымбаттауға дайын екенін көрсетіп отыр», — делінген Raymond James сарапшыларының жазбасында, деп жазады Barron’s. Сарапшылар компанияға инвестиция салуды ұсынуды жалғастырып, мақсатты бағасын $137-дан $115-ға дейін төмендетті.
«Deckers табысы бойынша болжамның төмендеуі АҚШ-тағы тұтыну шығындарына баға өсімінің әсерінен басшылықтың сақ көзқарасын көрсетеді», — дейді Bloomberg Intelligence сарапшысы Абигейл Гилмартин. Оның пікірінше, компанияның есептері тым консервативті болуы мүмкін, егер ағымдағы екі брендтің серпіні сақталып, жаңа өнімдердің іске қосылуы сұранысты қолдауды жалғастырса. Гилмартиннің айтуынша, Hoka әлі де көпмиллиардтық брендке айналуға әлеуетті, ал UGG үшін ұзақмерзімді дамудың негізгі факторлары — өнім желісін кеңейту мен маусымдық ассортиментті теңгеру.
MarketScreener дерегінше, болжам жарияланғаннан кейін Deckers акциясының таргетін 14 сарапшы төмендетіп, тек біреуі көтерген. Дегенмен, бұл қағазды сатып алуға кеңес берген сарапшылардың ешқайсы өз ұстанысынан бас тартқан жоқ. MarketWatch мәліметінше, компанияның динамикасын қадағалайтын 28 сарапшының 14-і Deckers позициясын арттыруға, яғни акция сатып алуға кеңес берді. Бір ай бұрын мұндай 12 кеңес болған. Бейтарап — 12, ал сатуға кеңес берген — 2 сарапшы ғана.
