Netflix тарихындағы ең мықты тоқсандық табысқа шықты, бірақ жазылушылар санын жасырды
2025 жылдың бірінші тоқсанында Netflix стриминг сервисі Уолл-стриттің болжамынан әлдеқайда жоғары таза пайда көрсетті. Табыстың күрт артуына бағалардың жақында көтерілуі мен бүкіл әлем бойынша сәтті контент әсер етті, соның ішінде британдық «Жеткіншектік кезең» сериалы бүкіл әлемде танымал болды. Алайда компания тарихында алғаш рет жазылушылар саны туралы дерек бермеді — бұл көрсеткіш бұған дейін инвесторлар үшін бизнестің табыстылығын бағалауда негізгі құрал болатын.
Негізгі көрсеткіштер
Таза табыс 25%-ға өсіп, акцияға шаққанда $6,61 болды. Бұл сарапшылардың $5,71 деңгейіндегі консенсус-болжамынан жоғары (LSEG дерегі, CNBC). Түсім 13%-ға артып, $10,5 млрд болды — бұл Wall Street күткен межемен сәйкес. Операциялық табыс 27%-ға өсіп, $3,3 млрд болды (күтілгені $3 млрд). Операциялық маржа — 31,7%, бұл компания күткен деңгейден 3 пайыздық тармаққа жоғары. CNBC келтірген StreetAccount деректері бойынша, сарапшылар 28,5% маржа күткен. 2-тоқсанға болжам: операциялық маржа 33,3% болады деп күтілуде (консенсус — 30%).NBC
Компания енді бизнес көрсеткіштеріне дәстүрлі қаржылық метрикалар арқылы баға беру керек деп санайды. Соңғы рет Netflix 2024 жылдың соңында аудиториясы 300 млн жазылушыдан асқанын хабарлаған еді.
17 сәуірде негізгі сессияда Netflix акциялары 1,2%-ға өсіп, $973 деңгейінде жабылды. Қаржылық есеп жарияланған соң постмаркетті саудада тағы 3%-ға қымбаттап, $1002,5 болды.
Netflix енді жазылушы санын емес, табыс пен тиімділік секілді дәстүрлі көрсеткіштерге басымдық беретінін айқын көрсетті. Бұл инвесторлар үшін жаңа бағалау парадигмасының басталуын білдіруі мүмкін.
Инвесторлар нені ескере бастады
Netflix-тің 2025 жылдың алғашқы тоқсанындағы нәтижелері ішкі болжамдардан жоғары шықты. Компания мәлімдемесінде қазіргі көрсеткіштер жылдық табыс диапазонының орташа деңгейінен асып тұрғаны айтылды. Алайда, ұзақмерзімді болжамдар қайта қаралған жоқ, бұл Netflix-тің жылдың екінші жартысына қатысты сақтықпен қарайтынын білдіруі мүмкін, деп жазады CNBC.
Экономиканың бәсеңдеуі америкалықтардың шығындарын азайтып, жазылушылардың кетуіне әкелуі мүмкін деген сұрақ әлі ашық күйінде қалып отыр. Тұтынушылар сенімі қазір 1952 жылдан бергі ең төменгі деңгейлердің бірінде, бұл Дональд Трамптың жаңа тарифтер енгізіп, нарықты тұрақсыздандыруымен байланысты. Дегенмен, Netflix тең бас директоры Грег Питерс телефон конференциясында компания экономикалық дағдарыс кезеңдерінде де тұрақты жұмыс істегенін атап өтті: үйдегі онлайн-ойын-сауық басқа демалыс түрлеріне қарағанда қолжетімді.
Жарнамасы бар жазылым АҚШ-та $7,99 тұрады.
Келесі тоқсанға болжам
Netflix 2-тоқсанда табысты $11 млрд, ал акцияға шаққандағы пайда $7,03 болады деп болжауда — бұл cарапшылардың күткенінен жоғары көрсеткіштер. Алайда Bloomberg жазуынша, сарапшылар 2025 жылы өсім баяулайды деп күтеді — әсіресе АҚШ-та бағалардың көтерілуінен кейін, бұл Netflix үшін басты нарық.
Компания стратегиясы
Жазылушылар базасының өсуі баяулағандықтан, Netflix қазіргі тұтынушылардан көбірек табыс табуға ұмтылуда — бағаларды арттырып, жарнама арқылы ақша табатын жаңа үлгіні дамытуда. Компания жарнамалық технологияларды енгізіп, кейбір елдерде, мысалы, Францияда жазылу бағасын көтерді.
Bloomberg мәліметінше, акционерлерге арналған хаттың едәуір бөлігі АҚШ-тан тыс контентке инвестицияға, соның ішінде Ұлыбритания мен Мексикадағы жобаларға арналды. Мысалы, жаңа мексикалық «Қарымта шабуыл» фильмі Netflix тарихындағы испан тіліндегі ең танымал ленталардың бірі болды.
Сарапшылардың пікірі
Медиаиндустриядағы жалпы құлдырауға қарамастан, Netflix акциялары өсім көрсетуде: 2025 жылдың басынан бері олар 9,2%-ға қымбаттады, деп жазады Bloomberg.
MarketWatch деректері бойынша, Netflix акцияларын бақылайтын 55 сарапшының 39-ы — «сатып алуға» (Buy және Overweight), 14-і — «ұстауға» (Hold), 2-еуі — «сатуға» (Underweight) кеңес береді. Уолл-стриттің орташа мақсатты бағасы — $1087,6, бұл 17 сәуірдегі жабылу бағасынан 11,8%-ға жоғары.
