АҚШ пен Австралия стратегиялық маңызды метал өндірісіне $8,5 млрд инвестиция құяды
АҚШ президенті Дональд Трамп пен Аустралия премьер-министрі Энтони Албанизе 20 қазанда стратегиялық маңызды пайдалы қазбалар саласында ынтымақтастық туралы келісімге қол қойды. Мәміле аясындағы жобаның жалпы құны $8,5 млрд-қа жетеді, деп хабарлады CNBC. Осы жобалар арқылы өндірілетін ресурстардың жалпы құны шамамен $53 млрд деп бағаланады. деді Ақ үй. Албанизенің Трамппен кездесуінен кейін журналистерге айтуынша, алдағы алты ай ішінде екі мемлекет іске дайын жобаларды жүзеге асыру үшін әрқайсысы $1 млрд бөледі. Сондай-ақ АҚШ Аустралияда сирек жер элементтерін өңдеуге қаржы салуды жоспарлап отыр.
Кейінірек Ақ үй ақпараттық бюллетень жариялап, онда екі ел жартыжылда $3 млрд-тан астам инвестиция салатыны айтылды. Сондай-ақ хабарламаға сәйкес, АҚШ-тың Экспорт-импорт банкі (Ex-Im Bank) жалпы құны $2,2 млрд болатын жеті жобаға қаржыландыру мүмкіндігін қарастыруға дайын. Бұл шамамен $5 млрд көлеміндегі жиынтық инвестицияның жолын ашуы мүмкін.
Шаралардың барлығы Қытайдан тыс жерлерде пайдалы қазбаларды өндіру және өңдеу қуаттарын арттыруға бағытталған. Қытай әлі де сирек жер элементтері мен олардан өндірілетін жоғары технологиялық магниттер нарығында монополияны ұстап отыр, деп еске салды Barron’s. Сонымен бірге басылым атап өткендей, Қытайдан тыс орналасқан әлемдегі ең ірі өңдеу зауыты дәл Аустралияда орналасқан.
Акция қалай қозғалды?
— 20 қазан, дүйсенбі күнгі саудада Батыс жарты шардағы сирек жер металының ең ірі өндірушісі MP Materials компаниясының акциясы 3,5% қымбаттады.
— Тағы бір америкалық өндіруші USA Rare Earth компаниясының котировкасы бірден 13,8% күрт өсті. Barron’s хабарлауынша, бұған қосымша әсер еткен — William Blair сарапшысы Нил Дингманның осы акцияларды қадағалай бастап, олар бойынша «сатып алу» ұсынысын беруі. Оның пікірінше, АҚШ үкіметі ішкі сирек жер өндіруші компанияларға инвестиция салуды әлі толық аяқтаған жоқ, ал USA Rare Earth — сирек жер саласында толық біріктірілген санаулы компаниялардың бірі. Сарапшының айтуынша, осы факторлардың үйлесімі акционерлерге ұзақ мерзімді табыс әкелуі мүмкін.
— Екі елдің бірлескен жобаларына қатысатын алюминий алыбы Alcoa компаниясының акциясы 8,5% көтерілді.
— АҚШ пен Мексикада сурьма мен оған қатысты металдарды (соның ішінде алтын мен күміс) өндіру, өңдеу және сату ісімен айналысатын United States Antimony компаниясының акциясының бағасы 18% өсті.
— АҚШ-тың биржадан тыс нарығында саудаланатын аустралиялық сирек жер металын өндіретін Lynas Rare Earth компаниясының котировкасы 16% шарықтады.
Контекст
Инвесторлар ай соңында өтетін АТЭС саммиті аясында Трамп пен ҚХР төрағасы Си Цзиньпиннің кездесуін күтуде. Пекиннің жоғары технологиялық өнім өндірісіне қажет сирек жер металдарының экспортын шектеу туралы қатері алдағы келіссөздер алдында қолданылған тактикалық қадам болуы мүмкін деген пікір бар, деп жазды Barron’s. Жексенбіде АҚШ басшысы бұл минералдарды Қытаймен қатынастардағы ел үшін басым бағыттардың бірі деп атады.
Сауда келіссөздерінің нәтижесіне қарамастан, сарапшылар америкалық сирек жер элементтерін өндіруші компаниялардың бизнесі өседі деп күтеді. Canaccord сарапшысы Джордж Джианарикастың есебі бойынша, АҚШ-та осы металдардан жасалатын магниттерге жылдық жиынтық сұраныс шамамен 50 мың тонна. MP Materials онжылдық соңына дейін жылына 10 мың тонна өнім шығаруды жоспарлап отыр, сондықтан Қытайдан тыс компаниялар үшін нарықта әлі де айтарлықтай үлес бар.
Barron’s басылымы келтірген Raymond James сарапшыларының пікірінше, жуырда салаға федералдық деңгейде қолдаудың жаңа толқыны келуі мүмкін.
«Конгресс қосымша қаржыландыру мен материалдық қолдау жөніндегі шараларды белсенді түрде талқылап жатыр. Өткен аптадағы нарықтағы құбылмалылық бұл мәселеге назар мен жеделдікті одан әрі арттырды», — деді сарапшы Эллен Эрнроот. — «Ақ үй айқын әрекет етуге дайын және Қытайға балама қалыптастыру үшін басқа елдермен ынтымақтасуға ұмтылып отыр».
