Booking бәсекелесі АҚШ-қа кетпек, Shein Қытайға оралады: IPO туралы жаңалықтар
Гонконгтық Klook онлайн-брондау сервисі, TripAdvisor мен Booking.com бәсекелесі Нью-Йоркте $500 млн көлемінде IPO өткізуге дайындалуда. Жылдам сәннің азиялық ритейлері Shein Сингапурдан Қытайға штаб-пәтерін қайта көшіруді ойластыруда, бұл компанияға биржаға шығуға жол ашады. Маркетплейстер операторы SMG Swiss Marketplace Group Цюрихте қыркүйек айында өтетін листингте $1,2 млрд тартуы мүмкін. Апта ішіндегі IPO нарығындағы басты оқиғаларды сіздерге ұсынамыз.
Болашақ орналастырулар жайлы не белгілі
— Shein — жылдам сән ритейлері соңғы жылдары Нью-Йорк не Лондон биржасына шығу үшін Қытайдан әдейі алшақтауға тырысқан болатын. Енді компания штаб-пәтерін Сингапурдан Қытайға қайта көшіруді қарастыруда. Bloomberg дереккөздерінің айтуынша Shein Гонконгта IPO дайындап жатыр, ал бас құрылымды Қытайға көшіру — Пекин реттеушілерімен келісімді жеңілдетуі мүмкін. Shein-нің батыс биржаларындағы жоспарына қарсы шыққан белсенділер компания жеткізілім тізбегінде ұйғырлардың мәжбүрлі еңбегімен өндірілген мақта бар деп айыптады. Алайда компания бұл айыптауларды жоққа шығарып отыр.
— SMG Swiss Marketplace Group (SMG) — ImmoScout24 порталының операторы Цюрих биржасында IPO өткізуі мүмкін. Bloomberg мәліметінше компания қыркүйекте шамамен 1 млрд швейцариялық франк ($1,2 млрд) тарта алады. SMG-дің нарықтық бағасы 4,5 млрд франкқа жетуі ықтимал. Бұл Galderma Group наурыздағы шығуынан кейінгі алғашқы ірі IPO болмақ. 2021 жылы құрылған SMG қазір жылжымайтын мүлік, автомобиль, қаржы және сақтандыру маркетплейстерін басқарады.
— EquipmentShare — америкалық құрылыс техникасын жалға беруші компания. Bloomberg-тің хабарлауынша, ол АҚШ-та $1 млрд-тан аса IPO жоспарлап отыр. Биржаға шығу 2025 жылы болуы мүмкін. PitchBook деректері бойынша, 2023 жылғы инвестициялық раундта компания $3,75 млрд-қа бағаланған.
— Klook — Гонконгтық саяхат брондау сервисі, Booking.com және TripAdvisor-ға тікелей бәсекелес. Reuters-тің хабарлауынша компания АҚШ-та IPO дайындау үшін Goldman Sachs, Morgan Stanley және JPMorgan банктерін тартқан. Бұл жылы шамамен $500 млн жинау көзделуде. 2014 жылы құрылған Klook 9 жылдан соң алғаш рет пайдаға шыққан және қазір әлемдік саяхатшыларға түрлі брондау қызметін ұсынады.
— Pattern — Amazon және басқа маркетплейстерде тауарды қайта сату компаниясы. Bloomberg дереккөздеріне сүйенсек, ол тамызда АҚШ-та IPO-ға өтінім бермек, шамамен $400 млн тартуды жоспарға алып отыр. Листингті Goldman Sachs, JPMorgan Chase, Evercore және Jefferies ұйымдастыруда. Marketplace Pulse деректері бойынша Pattern Amazon сатушылары арасында екінші орында тұр. Тамыздағы өтінім компанияға қыркүйектегі тығыз IPO кестесіне үлес қосуға мүмкіндік береді. Осы айда биржаға Klarna, Netskope және Figure Technology Solutions шығуы ықтимал.
— Ottobock — неміс протез өндірушісі, Reuters-тің мәліметінше, IPO кезінде компанияның құны 6 млрд еуродан ($7 млрд) жоғары болуы мүмкін. Негізін қалаушы әрі төраға Ханс Георг Недер мен оның отбасы 25–30% акцияларын сатуды жоспарлап отыр. Бірақ кезең-кезеңімен үлесті сату нұсқасы да қарастырылуда. Компания 2022 жылы нарықтағы тұрақсыздыққа байланысты жоспарды кейінге қалдырған еді.
— Edge Medical — хирургиялық роботтар әзірлеушісі, инвесторларының бірі сингапурлық Temasek қоры. Bloomberg-тің мәліметінше стартап Гонконгта IPO арқылы $150–200 млн тартуды көздеп отыр. Бұл 2025 жылға жоспарланған. Бұған дейін, үш жыл бұрын, компания осындай қадамға бармақ болғанымен, нарық 2009 жылдан бергі ең төмен деңгейге түскен еді. Қазір денсаулық сақтау мен биотехнология секторы инвесторлардың қызығушылығын қайта оятқан.
IPO әлеміндегі басқа маңызды жаңалықтар
— Жасанды интеллект пен криптоға байланысты компаниялар биржаға шығу қарқынын үдетіп жатыр. Bloomberg жазғандай, АҚШ нарығында жаз бойы үш таңбалы өсу көрсеткен алғашқы күнгі сауда — әдеттегі жағдайға айналды. Goldman Sachs сарапшысы Уилл Конноллидің айтуынша бұған дейін жылдың соңына немесе келесі жылдың басына жоспарланған листингтер қазір ертерек өткізілмек. JPMorgan Chase өкілі Кит Кантонның болжамына сәйкес 2025 жылдың соңына дейін ондаған компания IPO-ға шығып, $15 млрд-тан астам қаржы тартуы мүмкін.
— Nikkei Asia дерегінше Қытай билігі материктен тыс IPO-ларға рұқсат беруді іс жүзінде тоқтатты. 1 шілдеден 15 тамызға дейін Қытайдың бағалы қағаздар нарығын реттеу комиссиясы (CSRC) Гонконгтағы листингке бар-жоғы үш өтінімді мақұлдаған, ал жылдың алғашқы жартысында мұндай рұқсатты 70 компания алған еді. Сарапшылар мұны маусымдық факторлармен байланыстыруда, бірақ инвестбанкирлер нақты CSRC процесстің қарқынын өзі белгілеп отырғанын айтады. Natixis-тің аға экономисі Гэри Нг: «Бұл реттеушілер күткен дүрлікпе емес», — деп түйіндеді.
