BP бизнесін сатудан $6 млрд алады. Бұл акцияларға көмектесе ме?
BP Castrol майлау материалдары брендіне иелік ететін бизнесінің 65%-ын америкалық Stonepeak инвестициялық қорына сатуға келісті. Келісім шамамен $6 млрд-қа бағаланып отыр. Компания бұл қаражатты қарызын азайтуға және дивидендтерді жедел төлеуге жұмсамақ. Нарық жаңалықты оң қабылдады: мәміле жарияланған сәтте BP акциялары 1%-дан аса өсті.
Егжей-тегжейлі
Британдық энергетикалық алпауыт BP Castrol брендіне иелік ететін бөлімшесінің бақылаушы пакетін – 65%-ын – Stonepeak қорына сататынын хабарлады. Reuters-тің мәліметінше бұл BP-дің қарызды азайту үшін активтерді сату бағдарламасындағы маңызды қадам. Мәміле Castrol бизнесін қарызымен қоса есептегенде $10,1 млрд деп бағалайды. The Wall Street Journal бұл BP үшін бір реттік ең ірі актив сату екенін атап өтеді.
Мәміле аяқталғаннан кейін BP Castrol-дың өсу жоспарларына қатысуды жалғастырады: компания жаңа бірлескен кәсіпорында 35% үлесті сақтап қалады, ал Stonepeak қалған 65%-ға ие болады. BP өз үлесін екі жылдық шектеу мерзімі аяқталған соң сата алады.
BP сатудан түскен қаражатты қарызды қысқартуға бағыттайды. Соның ішінде $800 млн жеделдетілген дивиденд төлемдеріне жұмсалады.
Stonepeak сонымен қатар мәміле аясында Castrol-ға $1,05 млрд-қа дейін инвестиция салатынын, ал Канаданың зейнетақы инвестициялық қоры (CPPIB) бұл жобаға жанама түрде қатысатынын хабарлады.
Келісім жарияланғаннан кейін Лондон биржасында BP акциялары 1%-дан астам қымбаттады, материал жарияланған сәтте өсім 0,26% шамасында болды.
Castrol компаниясының штаб-пәтері Ұлыбританияда орналасқан, ал оның өнімдері 150-ден астам елде сатылады. BP бұл бөлімшені қарызды азайту үшін сату жоспары туралы ақпанда-ақ айтқан болатын.
Контекст
Қарашада BP 2025 жылдың үшінші тоқсанында негізгі пайдасы күтілгеннен азырақ төмендегенін хабарлады. Мұнай бағасының арзандауын өңдеу маржасының өсуі ішінара өтеген. Жасыл энергетикаға бет бұру әрекеті сәтсіз болған соң, BP қайтадан мұнай мен газ өндіруге басымдық беріп, акционерлер үшін құнды арттыруға және қарызды азайтуға кірісті.
Алайда сол кезде нарық бұл жаңалықтарды оң қабылдамады. Себебі есепте Castrol-ды сату туралы айтылмады, ал бұл BP-дің көпмиллиардтық қарызды қысқарту жоспарының маңызды бөлігі еді. Компания 2027 жылдың соңына дейін $20 млрд көлемінде активтерді сатып, таза қарызын $26 млрд-тан $14–18 млрд-қа дейін азайтуды көздеп отыр.
Желтоқсан айының басынан бері Лондондағы BP акциялары 5%-дан астам төмендеді.
