HSBC сарапшысы Nvidia туралы көзқарасын өзгертті
HSBC банкінің сарапшысы енді көзқарасын түбегейлі өзгертті. Ол инвесторларға компания акцияларын сатып алуға кеңес беріп, олардың бағасы шамамен 80%-ға дейін өсуі мүмкін деп болжайды. Сарапшы бұған дейін Уолл-стриттегі жалпы оптимизмге қарамастан Nvidia акцияларына қатысты «бәсең» ұстанымда болған. HSBC пікірінше, Nvidia-ның болашағы өте жақсы. Ол жасанды интеллектке арналған графикалық процессорлар нарығының жылдам кеңеюі мен жаңа келісімшарттар компанияны өсіреді деген пікірде.
Егжей-тегжейі
MarketWatch және Yahoo Finance хабарлауынша, HSBC сарапшысы Фрэнк Ли бұрын инвесторларға Nvidia акцияларын сатуды ұсынған санаулы мамандардың бірі болған. Енді ол өз бағасын «Hold» (ұстау) деңгейінен «Buy» (сатып алу) деңгейіне көтерді. Сондай-ақ компанияның мақсатты бағасын 200 доллардан 320 долларға дейін арттырды. Бұл - Уолл-стриттегі ең жоғары көрсеткіштердің бірі. Ли есептеуінше, жасанды интеллект саласында көш бастап тұрған Nvidia акциялары 14 қазандағы жабылу бағасынан тағы 78%-ға өсуі мүмкін.
HSBC болжамынша, компанияның негізгі өсу драйвері — 2027 қаржы жылына дейін жасанды интеллектке арналған графикалық процессорлар (GPU) нарығының кеңеюі. Сарапшының айтуынша, бұл нарық енді тек бұлттық сервистермен шектелмей, басқа салалардағы компанияларды да қамти бастады. Өйткені олар да ЖИ-инфрақұрылымға көп қаржы құяды.
«Біздің талдауымызша, Nvidia-ның кейінгі ЖИ жобалары (Stargate және OpenAI) GPU-дан түсетін табысты 251–400 миллиард доллар аралығына дейін жеткізуі мүмкін. Бұл біздің 2027 жылға арналған деректер орталықтары бойынша негізгі болжамымызды (351 млрд доллар) екі есе арттыруы ықтимал», — деді Ли.
Өсімге себеп болатын басқа факторлар
HSBC пікірінше, Nvidia акцияларының өсуіне тағы бір маңызды фактор — TSMC жасаған CoWoS («чип пластинада, пластина негізде» технологиясы). Бұл технология ең озық ЖИ-дің чиптер өндірісінде шешуші рөл атқарады, ал Nvidia оны пайдаланып, TSMC өндірісінен қосымша қуат ала алады. Сарапшы бағалауынша, CoWoS квоталарының кеңеюі Nvidia-ның деректер орталықтары сегментіндегі табыс болжамын нарық күткен деңгейден жоғары көтереді. HSBC-дің «оптимистік» сценарийінде бұл табыс 2027 жылы 390 миллиард долларға жетеді (FactSet орташа болжамы — 253 миллиард).
Сонымен қатар, HSBC Nvidia-ның Қытай нарығына қайта оралу мүмкіндігін де жоққа шығармайды. Банк Пекин енгізген графикалық процессорлар шектеулері 2026 жылдың бірінші тоқсанында АҚШ пен Қытай арасында сауда келісімі жасалса, ішінара жеңілдеуі мүмкін деп есептейді. Бұл компанияға Қытай нарығындағы позициясын қалпына келтіруге мүмкіндік береді. Сарапшының пікірінше, Қытай алдағы 1–2 жылда толық технологиялық тәуелсіздікке жете алмайды, себебі ол әлі де жоғары деңгейдегі ЖИ чиптерін тек жергілікті өндірушілер арқылы қамтамасыз ете алмайды.
Тіпті Қытаймен сауда шектеулері сақталған жағдайда да HSBC Nvidia-ның 2027 қаржы жылына арналған акция табысын бір акцияға шаққанда 8,75 долларға дейін арттырды (FactSet болжамы — 6,46 доллар).
Инвесторлар үшін маңыздысы
Сәрсенбі күні белгілі болғандай, Nvidia ұлыбританиялық деректер орталықтарын басқаратын Nscale компаниясымен жаңа ірі келісімшартқа қол қойды. Ол Microsoft үшін Еуропа мен АҚШ-та шамамен 200 мың ЖИ-процессор жеткізеді. Жобаға Dell Technologies те қатысады. Ірі жобалардың бірі аясында Nscale 2026 жылдың үшінші тоқсанына дейін Техастағы кампуста 104 мың Nvidia GB300 GPU орнатады және Норвегия, Португалия мен Ұлыбританияда деректер орталықтарын салады.
Сонымен қатар, Nvidia BlackRock, Microsoft және MGX компанияларымен бірге Artificial Intelligence Infrastructure Partnership (AIP) консорциумы арқылы құны 40 миллиард доллар тұратын Aligned Data Centers компаниясын сатып алу жобасына қатысып жатыр. Бұл мәміле 2026 жылдың бірінші жартысында аяқталуы мүмкін.
15 қазандағы саудада Nvidia акциялары алдымен 3%-ға дейін өсіп, 184,9 долларға жетті, бірақ кейін төмендеп, аз уақытқа минусқа түсті, содан соң қайтадан аздап өсті. Жыл басынан бері компанияның нарықтық құны 35%-ға артқан. Ал негізгі америкалық индекс S&P 500 осы кезеңде шамамен 13,5%-ға көтерілді.
Қазіргі кезде 66 сарапшының 59-ы Nvidia акцияларын сатып алуға кеңес береді («Buy» және «Overweight» рейтингтерімен). Алтауы — «Hold» (ұстау), ал біреуі ғана — «Sell» (сату) ұстанымында. Уолл-стриттің орташа мақсатты бағасы — 221,4 доллар. Бұл соңғы жабылу бағасынан тағы 23%-дық өсу әлеуетін білдіреді.
