Инфляция бойынша оң деректерден кейін S&P 500 және Nasdaq Composite рекорд орнатты
12 тамыздағы сауда сессиясында S&P 500 және Nasdaq Composite индекстері жаңа тарихи максимумға жетті. Акциялардың қымбаттауына АҚШ-та инфляция деңгейі күткеннен төмен болғаны туралы жаңалық себеп болды. Бұл ФРЖ-ға қыркүйекте пайыздық мөлшерлемені төмендетуге «жасыл жарық» беруі мүмкін. Енді Уолл-стрит жыл соңына дейін үш рет мөлшерлеме қысқарады деп күтуде.
Егжей-тегжейлі
— 12 тамызда S&P 500 индексі 1,1%-ға өсіп, биылғы 16-шы рекордын жаңартты және алғаш рет 6400 тармақтан асты.
— Nasdaq Composite технологиялық индексі де тарихи максимумға жетіп, 1,4%-ға жуық көтерілді. Бұл — жыл басынан бергі 19-шы рекорд.
— Dow Jones өнеркәсіптік индексі 1,1%-ға өсті.
— Шағын капитализациялы компаниялар акцияларының индексі Russell 2000, қысқамерзімді несие мөлшерлемесінің төмендеуінен негізгі пайда көретін сегмент ретінде, 3%-ға секірді.
— ФРЖ саясатына сезімтал екі жылдық облигациялар кірістілігі төрт базистік тармаққа төмендеді.
— Доллар мен алтын арзандады, себебі инвесторлар тәуекелі жоғары активтерге бет бұрды.
Инфляция көрсеткіштері
12 тамызда жарияланған мәліметтерге сәйкес шілде айында АҚШ-тағы тұтыну бағалары Уолл-стрит болжамынан төмен өсті. Бұл президент Дональд Трамптың ауқымды сауда саясаты инфляцияны күрт көтеруі мүмкін деген алаңдаушылықты сейілтті.
Тұтыну бағаларының индексі (CPI) шілдеде жылдық есепте 2,7%-ға артты. Dow Jones болжамы 2,8%-дық өсімді күткен. Азық-түлік пен энергия бағаларын қоспайтын базалық CPI бір жылда 3,1%-ға көтерілді — бұл күткеннен сәл жоғары — және маусыммен салыстырғанда 0,3%-ға өсті. Бұл қаңтардан бергі ең үлкен айлық өсім. Yahoo Finance-тың пікірінше бұл деректер тауарлар бағасындағы инфляцияның қызмет көрсету секторындағы төмендеуді өтемей тұрғанын көрсетеді.
Мәліметтер жарияланған соң, ФРЖ-ның қыркүйекте мөлшерлемені төмендету ықтималдығы күрт артты. Чикаго тауар биржасының FedWatch деректері трейдерлер бұл ықтималдықты 94% деп бағалап отыр (инфляция статистикасына дейін 85% болған). Қазан және желтоқсан айларында да ФРЖ саясатын одан әрі жұмсартуға бәс тіккендер көбейді.
Bloomberg атап өткендей, инвесторлар енді бейсенбі күні шығатын өндіруші бағалары индексінің деректеріне назар аударады.
Сарапшылардың ұстанымы
Goldman Sachs Asset Management өкілі Александра Уилсон-Элизондо CNBC-ге берген пікірінде: «Деректер ФРЖ-ға тарифтердің бағаға әсері негізінен уақытша болатынын көрсетеді», — деді. Ол статистика қыркүйекте мөлшерлемені төмендету идеясын қолдайтынын және бұл нарықтар үшін басты драйвер болатынын атап өтті.
Renaissance Macro Research сарапшысы Нил Датта нарық реакциясын таңғаларлық деп атады: «Акциялар өсіп жатыр, өйткені қыркүйекте мөлшерлеме төмендейді деп бәрі сеніп отыр. Бірақ деректерге тура қарасақ, тарифтер тұтынушыларға әлі толық әсер еткен жоқ, яғни компаниялар әзірге маржаның қысқаруына төзіп отыр».
Bankrate сарапшысы Грег Макбрайд Bloomberg-ке: «Бұл дауыл алдындағы тыныштық болуы мүмкін. Осы айда тарифтердің жаңа топтамасы күшіне енеді, олардың толық әсері тұтынушыға жетуі үшін бірнеше ай керек. Бірақ 2025 жылдың қалған бөлігінде инфляция өсуі ықтимал», — деді.
B. Riley Wealth бас нарық стратегы Арт Хоган CNBC-ге: «CPI деректері философиялық сұрақ сияқты: егер орманда ағаш құлап, ешкім оны естімесе, дыбыс шығара ма? Деректер күтілгенге жақын, ФРЖ бағытын өзгертпейді», — деп түсіндірді. Ол келесі үш отырыста да мөлшерлеме төмендейді деп күтеді.
ClearBridge Investments сарапшысы Джош Джамнер нарықтар қыркүйектегі жұмсартуды негізінен бағасына енгізіп қойғанын айтады. Оның пікірінше енді инвесторлар назарын мүмкін болатын сауда келісімдеріне аударады.
Barron’s-тың жазуынша инвесторлар ФРЖ мөлшерлемесін қысқартуға үміттеніп отырғанымен, экономикалық өсім мен корпоративтік табыстың артуына емес, сондықтан көптеген акциялар шетте қалады. S&P 500 құрылымында тек екі компания — Nvidia мен Microsoft — индекстің 15%-ын құрайды. Apple, Amazon, Alphabet және Meta қосылса, алты ірі компанияның үлесі 35%-ға жетеді. ФРЖ мөлшерлемесін төмендетуден ең көп пайда табатындар — технологиялық және ірі қаржы секторындағы компаниялар. Saxo Bank бас инвестициялық стратегы Чару Чанана: «Төмен кірістілік кезеңінде технологиялық сектор мен ұзақ циклды басқа да өсім секторлары ең көп пайда көреді», — дейді.
Northlight Asset Management инвестициялар жөніндегі директоры Крис Заккарелли CNBC-ге: «Акциялар өсуін жалғастыра алады, ал түзету басталуы үшін әлдеқайда жоғары инфляция немесе басқа бір күтпеген шок қажет. Көптеген стратегтер алдағы айларда құбылмалылық болады деп күтіп отыр, бірақ құлдырауда сатып алуды ұсынады. Нақты рецессиясыз үлкен түзету елестету қиын», — деді.
