Meta АҚШ-та ЖИ-инфрақұрылымын құруға және жұмыс орындарын ашуға $600 млрд жұмсайды
Facebook иесі Meta Platforms алдағы үш жыл ішінде АҚШ-та инфрақұрылымдар құруға және жұмыс орындарын ашуға кемі $600 млрд инвестиция салады, деп хабарлады компания өз блогында. Қаражат сонымен қатар жасанды интеллектке арналған дата-орталықтар салуға бағытталады.
Meta бірнеше ірі дата-орталықтар салу үшін жүздеген миллиард доллар резервке қойды және есептеу қуатына деген өсіп келе жатқан сұранысты қамтамасыз ету мақсатында бұл шығындарды арттырмақ. Reuters еске салғандай, қыркүйекте Ақ үйде өткен кездесуде компанияның бас директоры Марк Цукерберг алдағы бірнеше жылда АҚШ-та кемі $600 млрд инвестиция салуды жоспарлап отырғанын айтқан.
Инвесторлармен соңғы кездесуде Цукерберг: «Біз есептеу қуатын арттырып жатырмыз, өйткені ең дұрыс жол — инфрақұрылымдық әлеуетті алдын ала белсенді түрде күшейту деп санаймыз. Осылайша біз ең оптимистік сценарийлерге дайын боламыз», — деп атап өтті.
Meta бұған дейін 2026 жылғы капиталдық шығыны 2025 жылмен салыстырғанда айтарлықтай жоғары болатынын ескерткен еді. Бұл ең алдымен жасанды интеллектке салынатын инвестициялармен және дата-орталықтардың жедел қарқынмен салынуымен байланысты, деді Reuters.
Қыркүйек айында Meta инфрақұрылымды қаржыландыру бойынша тарихтағы ірі мәмілені жасады: компания Blue Owl Capital-дан $27 млрд тартып, Луизиана штатындағы Ричленд округінде ауқымды дата-орталығын салуды бастады. Ал қазанда компания Техас штатында құны $1,5 млрд болатын жаңа дата-орталық жобасын іске қосатынын хабарлады — бұл Meta портфеліндегі 29-шы нысан болмақ.
