Motley Fool экономиканың баяулауына сенетіндерге арналған қорды атады
Экономиканың алдағы уақытта баяулауы мүмкін деп сенетін инвесторларға Vanguard Russell 2000 (VTWO) биржалық қорына назар аударған жөн. Мұндай ұсынысты The Motley Fool басылымы жасайды. Аталған қор шағын компаниялардан құралған Russell 2000 индексіне инвестиция салады. Шағын компаниялардың акциялары, әдетте, экономикалық қиындықтардан кейін ірі капиталды эмитенттерге қарағанда тезірек қалпына келеді.
Алайда бұл стратегияның да әлсіз тұстары бар. Қор жасанды интеллект саласындағы серпілісті іс жүзінде елемейді.
Vanguard Russell 2000 ETF қорына инвестиция салудың артықшылықтары
The Motley Fool пікірінше, Russell 2000 индекстеріне негізделген биржалық қорларға инвестиция салу инвесторларға өз портфелін оңай әртараптандыруға мүмкіндік береді. Сонымен қатар, ұзақ мерзімді келешекте бұл қор құрамындағы компаниялардың өсуі есебінен табыс әкелуі мүмкін.
Vanguard Russell 2000 ETF қорына инвестиция салу — мұны іске асырудың ең тиімді жолдарының бірі. Себебі қордың көлемі үлкен және шығын коэффициенті небәрі 0,07 пайызды құрайды. The Motley Fool бұған дейін жариялаған Russell 2000 индексіне байланған ең үздік 5 ETF жайлы мақалада басқа ұқсас қорлардың шығын коэффициенті бұдан әлдеқайда жоғары екені айтылған.
Тағы бір маңызды дәлел — шағын компаниялар экономикалық дағдарыстардан кейін ірі компанияларға қарағанда жылдам қалпына келеді. The Motley Fool 2008 жылғы дағдарыстан кейінгі жағдайды мысалға келтіреді. 2009–2014 жылдар аралығында Russell 2000 индексі 150 пайызға өсті. Ал ірі компанияларға бағытталған S&P 500 индексі осы кезеңде 130 пайызға ғана көтерілді.
Бұл үрдіс коронавирус пандемиясынан кейін де байқалды. Шағын компаниялар индексінің динамикасы S&P 500 көрсеткішінен жоғары болды. Сондықтан Vanguard Russell 2000 ETF қорына инвестиция салу — жақын арада экономика баяулайды деп есептейтін инвесторлар үшін оңтайлы таңдау, деп қорытындылайды The Motley Fool.
2025 жыл — АҚШ экономикасының баяу өсетін соңғы жылы болуы мүмкін. Одан кейін 2026–2027 жылдары өсім қарқын алады. Бұл жөнінде Seeking Alpha платформасында жазған сарапшы Иво Колчев өз блогында мәлімдеген. Бұл өзгерістер Vanguard Russell 2000 ETF қорына оң әсер етеді. Өйткені оның активтерінің басым бөлігі циклдік салаларға тиесілі. Сондықтан ол инвесторларға осы қордан үлес сатып алуды ұсынады.
Vanguard Russell 2000 ETF қорына инвестиция салудың кемшіліктері
The Motley Fool бұл қордың басты кемшіліктерінің бірі — жасанды интеллект саласындағы серпілісті ескермейтіні екенін атап өтеді. Басылымның еске салуынша, дәл осы салалардағы компаниялар (мысалы, Nvidia мен Microsoft) S&P 500 индексінің өсуін қамтамасыз еткен.
Тағы бір кемшілік — қордың құбылмалылығы жоғары. Бұл оның шағын компанияларға бағытталғанымен байланысты, дейді басылым.
Сарапшы Колчев тағы бір қауіпке назар аударады. Ол — АҚШ долларының кейінгі уақыттағы әлсіреуі. Goldman Sachs деректеріне сүйенсек, S&P 500 индексіне кіретін компаниялардың 28 пайызы шетелдік нарықтарда сату жасайды. Ал Russell 2000 индексіндегі компанияларда бұл көрсеткіш 20 пайызға ғана жетеді. Банк мәліметінше, халықаралық нарыққа көбірек бағытталған S&P 500 акциялары биыл таза АҚШ нарығына бағытталған S&P 500 эмитенттерінен 7 пайызға артық нәтиже көрсетті.
