Нью-Йорктегі таң: АҚШ-тың тарифтік қысымы мен ФРЖ отырысының хаттамасы назарда
Freedom Capital Markets Research компаниясы директорының орынбасары Михаил Денисламов ұсынған АҚШ қор нарығындағы оқиғаларға күнделікті шолу мен болжам.
Біз не күтеміз
Ақ үйдің сыртқы сауда саясатына қатысты белгісіздік корпоративтік есеп беру маусымы қарсаңында нарықтың негізгі қозғаушы күші болып қала береді. Осы сәрсенбі, 9 шілдеде өзара баж салығын енгізуден бұрын жарияланған 90 күндік үзіліс аяқталуы тиіс еді. Алайда, Вашингтон бұл үзілісті 1 тамызға дейін ұзартты, бұл инвесторларға уақытша тыныс алуға мүмкіндік берді. Енді негізгі назар — Ақ үйдің одан арғы стратегиясында.
Президент Трамп импорттық тарифтерге әлі де агрессивті түрде үміт артады — ол бұл шара елде жаңа жұмыс орындарын ашуға және экономиканың өсуін жылдамдатуға көмектеседі деп сенеді. Ал сыншылар бұл саясат инфляцияның жаңа толқынын және тұтынушылық сенімнің төмендеуін туындатады деп қауіптенеді.
Президент әкімшілігінің жаңа көзқарасы да белгісіздікті арттырады. Соңғы күндері олар сауда серіктестеріне 25%-дан 70%-ға және одан жоғары импорттық баж салығы көрсетілген хаттар жіберуде. Бұл ЕО, Жапония, Оңтүстік Корея және АҚШ үшін маңызды басқа да импорттаушылармен келіссөздер процесін күрделендіріп отыр. Инвесторлар бағаға АҚШ-тың бастапқы шарттарын ішінара жұмсартуы мүмкін деген сценарийді енгізіп отыр, бірақ тамызға дейін нарық саяси риториканың тұтқынында қалмақ.
Бүгінгі күн
Маңызды макроэкономикалық статистика жарияланбайды. Назарда — 17–18 маусымда өткен ФРЖ отырысының хаттамасы. Құжат ашық нарық комитетінің (FOMC) ішінде алауыздық барын көрсетуі мүмкін. Бірі импорттық тарифтер арқылы инфляция үдейді десе, екіншісі экономика өсіміне қатысты болжамды жұмсартуды қолдайды. Дегенмен, екі көзқарас та жаңа инфляциялық деректер шыққанға дейін пайыздық мөлшерлемелердің әзірге өзгермейтінін білдіреді.
Бүгінгі сәрсенбіде АҚШ-тың 10 жылдық қазынашылық облигацияларын орналастыру бойынша $39 млрд көлемінде аукцион өтеді — бұл барлық кірістілік қисығына әсер етуі мүмкін.
АҚШ индексіне арналған фьючерстер нөлге жақын динамиканы көрсетіп отыр. Келесі сессияға тәуекелдер балансы — бейтарап, құбылмалылық төмен.
S&P 500 қозғалысы 6190–6260 пункт диапазонында (алдыңғы сессияның жабылу деңгейінен -0,5% пен +0,6%) болады деп күтеміз.
Назарда
— Merck (MRK) Лондондағы Verona Pharma (VRNA) компаниясын шамамен $10 млрд-қа сатып алуға жақын. Бұл Nasdaq-тағы соңғы бағаға 23% үстемақы береді. Keytruda препаратына арналған эксклюзивті құқықтар 2028 жылы аяқталады. Сондықтан бұл мәміле Merck үшін табысты әртараптандыруға мүмкіндік береді және 2023 жылдан бергі ең ірі мәміле болуы мүмкін.
— AES Corp. (AES) компаниясы Brookfield Asset Management пен BlackRock тарапынан қызығушылық бар деген ақпараттан кейін сату нұсқасын қарастыруда. Бұл жаңалықтан кейін постмаркетте акциялары 10% жоғарылады. Мәміле жаңартылатын энергетика саласындағы ең ірі транзакциялардың бірі болуы мүмкін.
— Aehr Test Systems (AEHR) компаниясының акциялары 20%-дан астамға құлдырады. Тоқсандық есепте $14,1 млн табыс көрсетілген, ал консенсус $14,8 млн болған. Сонымен қатар, саудадағы белгісіздік салдарынан тапсырыстардың кешігуі ескертілді. Дегенмен, менеджмент нарық үлесінің кеңейіп, өнім портфелінің өскенін атап өтті.
Кешегі нарық
8 шілдедегі сауда күні айқын драйверлердің болмауына байланысты әртүрлі бағытта аяқталды. S&P 500 шамамен 0,07% жоғалтты, Nasdaq 100 дәл сонша қосты, Dow Jones — 0,37%-ға төмендеді, Russell 2000 — 0,66%-ға өсті.
Құбылмалылық төмен деңгейде қалды.
Энергетика секторы (XLE: +2,69%) жалпы нарыққа қолдау көрсетті,
Коммуналдық сектор (XLU: -1,06%) аутсайдер болды.
Сессия сыртқы сауда күн тәртібіне қатысты белгісіздік аясында өтті. Президент Трамп импорттық мысқа 50% баж салығы, фармацевтикаға 200%-дық тариф (1,5 жыл кейінге қалдырып) енгізілетінін растады.
Сондай-ақ, БРИКС елдерінен келетін жартылай өткізгіштер мен басқа тауарларға баж салығы салынатыны жарияланды. Президенттің айтуынша, бұл елдер «долларды күйретуге тырысуда».
Маусымдағы NFIB шағын бизнес оптимизмі индексі сәл төмендеді. Бұл — кәсіпкерлердің салықтық жүктеме мен еңбекақы құнына қатысты алаңдаушылығын растайды.
Облигациялар нарығы қысымда қалуда:
$58 млрд көлеміндегі үш жылдық трежерилер төмен сұраныспен орналастырылды.
Аукционнан кейінгі кірістілік 0,4 б.т. жоғарылады — бұл алдағы 10 және 30 жылдық шығарылымдар алдындағы инвесторлар сақтығын көрсетеді.
Компания жаңалықтары
— Amazon.com (AMZN: -1,8%) акциялары Prime Day-дің сәтсіз басталуынан кейін төмендеді. Bloomberg мәліметі бойынша сатылым алғашқы сағаттарда былтырмен салыстырғанда 14%-ға азайған. Дегенмен, биылғы акция ұзаққа созылады, сондықтан тікелей салыстыру қиын.
— SOFI (SOFI: +3,7%) — жеке нарықтарға арналған жаңа жабық қорлар арқылы клиенттерге балама инвестицияларға кеңейтілген қолжетімділік ұсыну туралы жаңалықтан кейін акциялары өсті.
— Rivian (RIVN: +3%) — шағын электромобильдер шығаратын Also стартапы $1 млрд деп бағаланған соң көтерілді. Бұл стартап наурызда бөлініп шыққан, бірақ Rivian миноритарлық үлесін сақтап қалған.
— First Solar (FSLR: -6,5%) — ең көп құлдырағандардың бірі. Трамптың шетелдік бақылаудағы энергетикалық компанияларға субсидияларды алып тастау туралы жарлығы бұл акцияларға қысым көрсетті.
