Palantir 2025 жылы S&P 500 индексіндегі үздік акция мәртебесінен айырылды
Әскери және азаматтық мақсаттарға арналған ЖИ шешімдерін әзірлеуші Palantir компаниясының акциялары 2025 жылы өсім қарқыны бойынша S&P 500 индексінде көшбасшылықты жоғалтты. Оны деректерді сақтау жүйелері мен қатқыл дискілер өндірушісі Seagate Technology акциялары басып озды. Жыл басынан бері Palantir қағаздары шамамен 100%-ға қымбаттаса, Seagate өсімі 116%-ға жетіп, нарықтағы өзге ірі ойыншыларды да артта қалдырды.
Егжей-тегжейі
Investor's Business Daily дерегінше, Palantir енді S&P 500 индексіндегі ең үздік акция мәртебесіне ие емес. 5 қыркүйекте сауда басталғанға дейін Palantir қағаздары 2025 жылдың басынан бері 107%-ға өскен. Ал Seagate акциялары 113%-ға қымбаттап, көшке шыққан.
5 қыркүйектегі сауда барысында айырмашылық одан әрі ұлғайды. Palantir акциялары арзандап, өсім қарқыны +102%-ға дейін баяулады. Сол уақытта Seagate жаңа рекорд орнатып, +116%-ға жетті. Бұдан бөлек, Palantir енді алтын өндіруші Newmont компаниясына да жол берді, оның өсімі +107%-ды құрады.
Осы үш компаниядан бөлек, биылғы жылы S&P 500 үздіктері қатарына GE Vernova (энергетика), General Electric (қозғалтқыш өндірушісі), CVS Health (денсаулық сақтау), Howmet Aerospace (әуеғарыш), NRG Energy (энергетика), Amphenol (сенсорлар мен антенналар жеткізушісі) және Coach брендіне иелік ететін Tapestry компаниясы кірді.
Салыстыру үшін: әлемдегі ең қымбат компания Nvidia акциялары жыл басынан бері 24%-ға, капитализация бойынша екінші орында тұрған Microsoft 17,5%-ға қымбаттады.
Seagate-ке не көмектесті?
Seagate-тің табысы ЖИ үшін дата-орталықтардың жаппай салынуымен байланысты. Компания ірі технологиялық клиенттердің тапсырыс бойынша өндірілетін деректерді сақтау құрылғыларына (BTO — build-to-order) сұранысының артқанын байқап отыр. Бұл үлгі ұзақ мерзімді перспективада сұраныс динамикасын түсінуге және қуаттарды дағдарыс кезінде тиімді басқаруға мүмкіндік береді, дейді Bank of America сарапшылары.
Seagate қатқыл дискілер мен деректерді сақтау құрылғыларын шығарады. Компания акцияларының салыстырмалы күш рейтингі (RS Rating) 95-ке дейін көтерілді. Ал бір акцияға шаққандағы табыстың тұрақтылығы мен өсімін бағалайтын EPS Rating 82-ге жетті. Сарапшылар биыл компания табысы 528%-ға артады деп болжап отыр.
Palantir қағаздарының RS Rating көрсеткіші 98, ал EPS Rating деңгейі 98. Сарапшылардың бағалауынша, Palantir-дің биылғы табысы 57%-ға өседі.
Акциялармен не істеу керек?
Тамыздың соңында Barclays Seagate акцияларының мақсатты бағасын $125-тен $180-ға дейін көтерді, бірақ бейтарап рейтингті (Equalweight) сақтап қалды. Бұл баға шамамен 3,6%-дық төмендеуді білдіреді. MarketWatch дерегінше, Seagate қағаздары бойынша 25 рейтинг бар: олардың 14-і «сатып алу» (Buy), 3-і «салмақты арттыру» (Overweight), 6-ы «ұстау» (Hold), ал 2-і «салмақты азайту» және «сату» (Underweight, Sell).
Palantir акцияларына қатысты 29 рейтинг берілген. Олардың ең көп таралғаны — «ұстау» (18 Hold). Жеті сарапшы сатып алуды, төртеуі сатуды ұсынады.
