«Rallian-ның S&P 600 индексіне қосылуы инвесторларға не береді?
Дәлдік құралдар жасайтын Rallian 1 шілдеден бастап шағын капитализациялы компаниялардың акцияларын бақылайтын S&P 600 индексіне қосылады. Бұл компанияның акциялары биржада саудалана бастағаннан кейінгі күні, Fortive технологиялық жеткізушісінен толық бөлініп болған соң іске асады.
Егжй-тегжейлі
Rallian 1 шілдеден бастап шағын және орта капитализациялы компаниялар кіретін S&P 600 индексіне қосылады, деп хабарлады оның құрастырушысы S&P Global. Компания банкротқа ұшыраған жартылай өткізгіш жеткізушісі Wolfspeed‑тің орнын басады.
Әзірге Rallian акциялары айналымда болмайды — олардың саудасы 30 маусымда басталады деп күтілуде. Дәл осы күні Rallian Fortive‑тен бөлініп, жеке компанияға айналады.
Бөліну туралы не белгілі?
S&P 500 кең нарық индексіне кіретін Fortive 2024 жылдың қыркүйегінде екі тәуелсіз жария компанияға бөліну жоспарын жариялады. Қайта ұйымдастырудан кейін компания тұрақты кіріс әкелетін технологиялық шешімдерге, соның ішінде денсаулық сақтау саласына арналған өнімдерге назар аударады. Ал жаңа ойыншы — Rallian жоғары дәлдіктегі технологияларға, соның ішінде аэроғарыш және қорғаныс ішкі жүйелеріне арналған өнімдерге маманданады.
Инвесторлар бөліну туралы жаңалыққа сақтықпен оң көзқарас танытты: хабарланғаннан кейінгі күні, 5 қыркүйекте, Fortive котировкалары 1,5% өсті.
Индекске кіру не береді?
Rallian-ның S&P 600 индексіне қосылуы пассивті капитал ағынын қамтамасыз етіп, котировкаға оң әсер етеді, деп есептейді Freedom Capital Markets Research. Индекс құрамы өзгерген кезде оған бағытталған барлық қорлар бірдей мәміле жасауға міндетті — яғни индекстегі акцияларды сол көлемде сатып алып, сату керек. Индекстік биржалық қорлардың портфеліне ену бағалы қағаздарға сұраныс пен олардың сауда көлемін арттырады, деп айтты Freedom Finance Global сарапшысы Георгий Тимошин. Ол басқа да дәлелдерді келтірді: сарапшылар индекске енген компаниялардың қызметін бақылауды бастайды, бұқаралық ақпарат құралдары олар туралы жиі жазады, ал көптеген инвесторлар акциялардың индекске кіруін тартымдылық белгісі деп қабылдайды.
Nasdaq биржасы 2021 жылы индекс құрамын қайта теңгеру күндері сауда көлемі әдеттегі күндермен салыстырғанда алты есе жоғары болатынын анықтады. Сондай-ақ, нарық жабылар сәтте сатып алу немесе сату тапсырыстарының шамамен 40%-ын индекстік қорлар береді, ал әдеттегі күндері бұл көрсеткіш тек 5% шамасында ғана.
