Сарапшылар Palantir акцияларындағы тәуекелді жоғары деп санайды
Piper Sandler инвестиция жасаушыларға Palantir акцияларын сатып алуға кеңес берді. Бұл – бағасы жыл басынан бері екі есе өскен қағаздар. Банк сарапшысы бұл компанияның акциялары «гиперволатильді» екенін және жоғары тәуекелді актив болып қала беретінін ескертті. Дегенмен ол Palantir жасанды интеллекттің жаппай таралуынан пайда көретін компаниялардың бірі болады деп санайды. Сарапшы компания табысы жыл сайын 30%-дан жоғары өсіп отырады деп болжайды.
Егжей-тегжейі
CNBC мәліметінше, Piper Sandler Palantir акцияларын ресми түрде талдай бастады. Компания әскери және азаматтық мақсаттағы жасанды интеллект жүйелерін жасайды. Piper Sandler бұл акцияларға «Overweight» (нарықтан жоғары) рейтингісін беріп отыр. Бұл – сатып алуға тең ұсыныс.
Компания Palantir акцияларының мақсатты бағасын 175 доллар деп белгілеген. Бұл – соңғы саудадағы жабылу бағасына қарағанда шамамен 13% өсу әлеуетін білдіреді.
Piper Sandler ұсынысынан кейін 25 шілде күні сауда басталғанда Palantir қағаздары шамамен 3%-ға қымбаттады. Осы жылы олар 105% өсіп отыр.
Investing.com хабарлауынша, Piper Sandler сарапшысы Брент Браселин Palantir акциялары елеулі үстемемен саудаланып жатқанын айтты. Ол бұл қағаздарды «жоғары тәуекелді инвестиция» деп сипаттайды. Сарапшының сөзінше, Palantir акцияларында бағаның 20–29% аралығында құлдырау қаупі жоғары. Мұны ол «гиперволатильділік» деп атады.
Piper Sandler неге сатып алуға кеңес береді?
Сарапшы Palantir-ді жасанды интеллект нарығындағы алдыңғы қатарлы ойыншылардың бірі ретінде атап өтті. Ол бұл компания қазіргі ЖИ бумынан үлкен пайда көретінін болжайды.
«Palantir-дің өсімі мен маржасы жағынан бірегей моделі бар. Егер бұл модель тұрақты екенін дәлелдесе, компания 2032 жылға қарай жылдық табысын 24 миллиард долларға жеткізе алады. Бұл — мемлекеттік және коммерциялық екі нарықтағы (екеуінің де көлемі 1 триллион доллардан асады – Oninvest) үлесін арттыру есебінен мүмкін», – деп жазды Браселин.
Сарапшының пікірінше, жасанды интеллект нарығындағы белсенділік Palantir үшін негізгі қозғаушы күш болады. Компания бұл саланың ұзақмерзімді бенефициарларының біріне айнала алады.
«Біз бұл компанияны жасанды интеллект революциясындағы ұзақмерзімді жеңімпаздардың бірі деп санаймыз. Оның бірнеше негізгі драйвері бар. Олар табыстың жыл сайын 30%-дан жоғары өсуін және бос ақша ағыны маржасының 40%-дан жоғары болуын қамтамасыз ете алады. Компанияның ішкі мәдениеті, басқару тәсілі мен бағыты стандартты емес болуы мүмкін. Бірақ оның ЖИ саласына ықпалы ұзақмерзімді сипатқа ие болуы ықтимал», – деді Браселин.
Сарапшылар Palantir өнімдеріне деген қызығушылықтың артқанын да айтады. Екінші тоқсанда компания сайттары мен платформаларына онлайн трафик 144%-ға артқан. Бұған дейін бұл өсім 62% болған. CNBC-дің жазуынша, бұл көрсеткіштер CoreWeave, ChatGPT, Anthropic, Anduril, Shield AI және Axon сияқты басқа жетекші ЖИ компанияларымен бір деңгейде.
Сарапшының пікірінше, Palantir акциялары әрі қарай да өсе береді. Ол үшін компания АҚШ-тың мемлекеттік және коммерциялық нарықтарында жылдық орташа өсім қарқынын (CAGR) 30%-дан төмен түсірмеуі керек.
«Palantir бұл өсімді сақтай алады. Бұған компанияның алдыңғы көрсеткіштері мен екі ірі нарықтың көлемі (әрқайсысы 1 триллион доллардан астам) дәлел бола алады», – деп қосты Браселин.
Уолл-стрит инвесторларға тағы не кеңес береді?
Palantir-ді бақылап отырған сарапшылардың көпшілігі сақтық танытуда. MarketWatch дерегінше, ең жиі ұсынылатын кеңес — «ұстап тұру». Оған сарапшылардың шамамен 60%-ы жүгінеді. Әрбір төртінші сарапшы акцияны сатып алуға кеңес береді («Buy» және «Overweight» рейтингтері). Қалғандары — сатуға ұсынады («Sell»).
Сонымен қатар, акциялардың орташа мақсатты бағасы қазіргі нарықтағы бағаға қарағанда 38%-ға төмен.
Осы аптада JPMorgan Palantir-ді сатып алудан аулақ болу керек 20 «қызған» акцияның қатарына қосты. Банк сарапшыларының айтуынша, инвесторлар аса құбылмалы, жоғары тәуекелді қағаздарды тым белсенді сатып алып жатыр. Мұндай акциялар «high beta» деп аталады. Яғни, олардың бета-коэффициенті 1-ден жоғары және олар нарық өзгерісіне қатты әсер етеді.
JPMorgan мәліметінше, мұндай активтерге шоғырлану тарихи максимумға — 100-перцентильге жеткен. Мұндай жағдай тек бірнеше рет болған. Олар — доткомдар дағдарысы кезі, 2008 жылғы дағдарыстан кейінгі кезең және 2018 жылғы ақпандағы әлемдік нарықтар құлдырауы алдындағы уақыт.
Бұған қоса, жоғары тәуекелді акцияларға қызығушылық күрт өскен. Бар болғаны үш ай ішінде бұл шоғырлану 25-перцентильден 100-перцентильге дейін бір-ақ секірген. Бұл — соңғы 30 жылдағы ең жылдам өсім.
