ЖИ-ға қызығушылық азайды: UBS нарықта түзету болу мүмкіндігін ескертті
UBS сарапшыларының талдауы бойынша жасанды интеллект (ЖИ) компанияларының акцияларына деген жеке инвесторлардың қызығушылығы әлсірей бастады. Бұл жағдай нарықтағы қазіргі өсімнің басты қозғаушы күштерінің бірін шайқалтуы мүмкін. Соңғы айларда қор нарығының қалпына келуіне «Ғажайып жетілік» өкілдері бастаған ЖИ-гиганттар айтарлықтай үлес қосты. Маусым айының соңынан бері негізгі индекстер бірқатар рекордтар жаңартып жатқанымен, UBS инвестициялық банкі құлдырау қаупінің жоғары екенін ескертеді.
Егжей-тегжейлі
UBS-тің АҚШ-тағы туынды қаржы құралдары стратегиясы бойынша бөлімі CNBC келтірген жазбасында нарықты қолдап тұрған негізгі факторлардың бірі әлсіреуі мүмкін екенін алға тартады. Құжатта ЖИ-мен байланысты акцияларға жеке инвесторлар тарапынан қызығушылықтың бәсеңдеп жатқаны және бұл трендтің нарыққа түзету қаупін тудыруы мүмкін екені жазылған. Себебі, дәл осы акциялар қазіргі раллидің негізін құрап, олардың динамикасы негізгі индекстерге елеулі әсер етіп отыр.
«ЖИ-секторындағы акцияларды жеке инвесторлар сатуды жалғастырып жатыр, бұл орта мерзімді перспективада «аюлы» қысым тудыруы мүмкін», — делінген UBS жазбасында. — «18 айға созылған сатып алу науқанынан кейін, оның барысында «Ғажайып жетілік» компанияларының S&P 500 индексіндегі үлесі тарихи максимумға жеткен еді, UBS-тің бөлшек клиенттері қаңтардан бастап ЖИ-көшбасшылардың акцияларын сата бастады. Бұл үрдіс наурыз–сәуір айларында тарифтік күйзелістерге байланысты күшейді».
UBS мәліметінше жеке инвесторлар нарықтағы бағытталған сауданың 40%-дан астамын қамтамасыз етіп отыр. Егер олардың тарапынан сұраныс әлсіресе, қазіргі раллидің жалғасуы қиындайды. Сонымен қатар, банктің бақылауынша көптеген хедж-қорлар да нарыққа деген тәбетін жоғалтып, күтуші позицияға көшуі мүмкін. UBS қазіргі жағдайды 2021 жылдың шілдесімен салыстырады — ол кезде нарық пост-ковидтік шыңына жетіп, төрт айдан кейін құлдырай бастаған.
«Қазіргі нарық жұқа мұз үстінде тұр: сатып алушылардың кең базасы қалмаған, бұл дегеніміз — өсу әлеуеті шектеулі, ал құлдырау қаупі айтарлықтай», — дейді UBS.
Басқа сарапшылар не дейді?
Bank of America (BofA) осы аптада тағы бір ескерту белгісіне назар аударды: қор менеджерлеріне жүргізілген сауалнама нәтижесінде олардың портфельдеріндегі қолма-қол ақша үлесі соңғы он жылдан астам уақыт ішіндегі ең төмен деңгей — небәрі 3,9% болғаны анықталды. Олар сонымен қатар технологиялық және шикізат секторындағы акцияларды сатып алған. Бұл дегеніміз, еркін ресурстар азайып жатыр, демек, негізгі сұраныс толқыны өтіп кеткен болуы мүмкін, ал бұл сатуға сигнал беруі ықтимал.
Дегенмен, BofA раллидің аяқталғанын жариялауға асықпайды. Инвестициялық портфельдерде акцияларға деген артық салмақ әзірге сыни деңгейде емес, облигациялар нарығындағы құбылмалылық та төмен. Сонымен қатар, BofA сарапшысы инвесторлардың «ашкөздігін» басу «қорқыныштан» қиын екенін айтып, жаз бойы инвесторлар хеджирлеу мен ротация стратегияларын ұстанатынын, жаппай шорт ашуға не нарықтан толықтай шығуға бармайтынын болжайды.
Savita Subramanian есімді сарапшы өткен аптада S&P 500 индексі бойынша жыл соңына арналған мақсатты деңгейді 6 300 тармаққа көтерді — бұл ағымдағы деңгейден небәрі 0,6% жоғары. Алайда, оның әріптесі Майкл Хартнетт 4 шілдеде кеңес беріп, егер индекс 6300-ден асып кетсе, пайданы тіркеп, нарықтан шығуды ұсынды.
Ал RBC Capital Markets 13 шілдеде S&P 500 бойынша таргетті 6 250 тармаққа дейін көтерді. Бұл көрсеткіш шілденің 16-сындағы жабылу бағасынан есептегенде 0,2% төмен. Аналитик Лори Калвасина банктің нарыққа бейтарап көзқарас ұстанатынын айтты. Оның сөзінше жаңа таргет «негізінен қазіргі бағалармен сәйкес келеді», бұл индекс өсуінің шегіне жеткенін меңзейтіндей.
Goldman Sachs сарапшысы Дэвид Костин сәл оптимистік көзқараста. Ол жыл соңына дейін индекстің 6 600 тармаққа дейін өсуін болжайды. Оның айтуынша нарық тарифтік қысымның әсерін біртіндеп сіңіреді, ал ірі компаниялар жинақталған тауарлық қорлар есебінен әлеуетті мөлшерлеме өсімін жұмсарта алады.
Bloomberg-тің деректеріне сәйкес маусым айында 20 ірі инвестициялық банктің медиандық болжамы бойынша S&P 500 индексінің таргеті 6 025 тармақ болған. Ең жоғары бағаны Wells Fargo (7 007 тармақ), ал ең төмен бағалауды Stifel (5 500 тармақ) ұсынған.
