Small-cap компанияларға инвестиция салатын уақыт келді — Morgan Stanley
АҚШ-тағы инфляция бойынша күткеннен әлсіз деректер шағын капитализациялы компаниялардың акциялары мен басқа да тәуекелді активтерге инвестиция салатын уақыт келгенін білдіруі мүмкін, деп есептейді Morgan Stanley. Шілдедегі баға өсімі баждарға қарамастан күткеннен төмен болды, бұл ФРЖ мөлшерлемені неғұрлым агрессивті түрде төмендетеді деген үміт береді, деп түсіндіреді сарапшылар. Бұл ФРЖ мөлшерлемесіне жиі байланған несие ставкалары бар шағын компанияларға тиімді.
Егжей-тегжейлі
Күткеннен төмен инфляция деңгейі инвесторлардың капиталының мықты балансы бар компаниялар қағаздарынан small-cap және тәуекелі жоғары ойыншылар акцияларына ауысуына түрткі болуы мүмкін, деп есептейді Morgan Stanley. Оның жазбасын CNBC келтірді. Құжат дүйсенбі күні, инфляция деректері жарияланардың алдында шыққан.
АҚШ-тағы тұтыну бағалары индексі (CPI) шілдеде АҚШ Статистика бюросының деректеріне сәйкес, жылдық есепте 2,7%-ды құрады. Сарапшылар өсім 2,8% болады деп болжаған. Жарияланған деректер ФРЖ биыл үш рет мөлшерлемені ширек пайыздық пунктке төмендетеді деген үміт береді, деп жазады CNBC CME FedWatch Tool деректеріне сілтеме жасап. Бұл құрал нарықтың мөлшерлеме бойынша күтулерін бақылайды. Бұған дейін трейдерлер осындай екі төмендетуді күтті, деп толықтырды телеарна.
Егер ФРЖ саясатына қатысты қазіргі күтулер орындалса, бұл пайыздық мөлшерлемелердің өзгеруіне сезімтал шағын капитализациялы компаниялар үшін жақсы сигнал болады, дейді Morgan Stanley АҚШ акциялары бойынша бас стратег Майк Уилсон. Плавающий ставкамен қарыздарын қайта қаржыландыруы тиіс small-cap компаниялары үшін бұл қарыз жүктемесінің төмендеуін және операциялық маржаның қолдау табуын білдіреді.
Тағы кім плюсте?
Бұдан бөлек, ақша-несие саясатын жұмсартудан пайыздық мөлшерлемелердің өзгеруіне сезімтал төмен сапалы акциялар да плюсте болады, дейді Уилсон.
Goldman Sachs дерегінше, мұндай қаржылық көрсеткіштері әлсіз және капиталдың табыстылығы төмен компанияларға мысал ретінде United Airlines әуе компаниясы, Dollar General дисконт дүкендер желісі және Caesars Entertainment казино мен қонақүй операторы жатады, деп жазады CNBC.
2025 жылы шағын компаниялар қаржылық жағдайы мықты ірі ойыншылардан қалып қойып отыр, дейді Уилсон. Мәселен, 1 қаңтардан бастап АҚШ-тың ең ірі эмитенттерінің қызметін бақылайтын S&P 500 индексі 9,59% өсті. Ал шағын және орта капитализациялы компанияларды қамтитын Russell 2000 индексі небәрі 2,47% ғана көтерілді. Алайда Morgan Stanley сарапшысы алдағы 6–12 айда small-cap акцияларының пайдасы мен ақша ағымының қалпына келуіне байланысты оларды оптимистік тұрғыдан бағалап отырғанын жазады.
