Сот Boeing-ке қатысты қылмыстық істі тоқтатты. Ұшақ жасаушының акциялары қымбаттады
Техас штатының федералдық соты Boeing компаниясына қарсы қылмыстық істі тоқтатты. Бұл іс 737 Max ұшақтарының екі апатымен байланысты болатын. Апаттар кезінде 346 адам қаза тапқан. Бұл — 2018 жылғы қазандағы Lion Air 610 рейсі мен 2019 жылғы наурыздағы Ethiopian Airlines 302 рейсі. Екі жағдай да ұшақты басқару жүйесіндегі ақауға байланысты болған, деп еске салады Bloomberg.
Сот шешімі АҚШ Әділет министрлігінің өтініші бойынша қабылданды. Осылайша Boeing қылмыстық жауапкершіліктен босап, АҚШ билігімен жасалған келісімді жүзеге асыруға мүмкіндік алды. Келісім бойынша компания 1,1 миллиард доллар айыппұл мен өтемақы төлеуі тиіс. Оның ішінде апат құрбандарының отбасыларына да қаражат қарастырылған.
Нью-Йорк биржасындағы саудада Boeing акциялары алдымен шамамен 2%-ға қымбаттап, кейін аздап төмендеді. Мақала жарияланған сәтте өсім 0,5%-ды құрап отыр.
