Трамп Қытайға жаңа сауда қаупін төндіргенінен кейін S&P 500 индексі минусқа кетті
АҚШ-тың негізгі қор индексі S&P 500 сейсенбі күнгі сауда күнінің таңында болған құлдырауды еңсере алса да, қорытынды бойынша төмендеді. Сауда жабылар алдында АҚШ президенті Дональд Трамп Қытайға жаңа сауда шектеулерімен сес көрсетіп, бұдан инвесторлар қайта алаңдап қалды.
Егжей-тегжейлі
— 14 қазан күнгі сауда қорытындысы бойынша S&P 500 кең нарық индексі теріс аймақта жабылып, 0,16% төмендеді. Күн ішінде индекс бірде 1,5% дейін құлдырап, бірде 0,4%-ға дейін өсіп, құбылып тұрды.
— Технологиялық сектор индексі Nasdaq Composite күн қорытындысында 0,76% төмендеді, ал сауда барысында бір сәтте 2,1%-ға дейін құлаған.
— Ал көгілдір фишка индексі Dow Jones Industrial Average, керісінше, сейсенбі күні 0,44% өсті, дегенмен сессия кезінде 1,3%-ға дейін төмендеген. Caterpillar компаниясы Dow құрамындағы өсім көшбасшысы атанды.
— Шағын капитализациялы компаниялар индексі Russell 2000 бірден 1,38% көтерілді.
Акцияға не әсер етті?
Сейсенбі кешінде АҚШ президенті Дональд Трамп Қытайды тағы да сынға алды. Ол Truth Social платформасында Пекиннің АҚШ-тан соя сатып алудан бас тартуын «экономикалық тұрғыдан дұшпандық әрекет» деп атады. Трамптың айтуынша, Вашингтон Қытаймен өсімдік майы және өзге де сауда бағыттарындағы қатынастарды тоқтату мүмкіндігін қарастырып жатыр.
Уолл-стритте «қорқыныш индексі» деп аталатын Cboe VIX құбылмалылық индексі — бір сәтте жұма күнгі жабылу деңгейінен асып түсіп, нарықтағы алаңдаушылықтың қайта оралғанын білдірді, дейді CNBC. Бұл жағдай Қытаймен сауда қақтығысын тез шешу мүмкін болмайды деген инвесторлардың қорқынышынан туындап, оларды болашақтағы шығыннан сақтану үшін позицияларын хеджирлеуге итермеледі, деп атап өтті арна. VIX сейсенбі күні 22 пункттен жоғары көтеріліп, соңғы төрт айдағы ең жоғарғы мәнге жетті, бірақ сессия ортасында 20 деңгейіне дейін төмендеді.
Жалпы, 14 қазандағы сауда сессиясы құбылмалылығымен ерекшеленді. Сауда Қытайдың жаһандық логистикаға бақылауды күшейту шешімінен кейін құлдыраумен басталды: ел оңтүстіккореялық кеме жасаушы Hanwha Ocean компаниясының бес америкалық еншілес ұйымына санкция енгізді, деп хабарлады CNBC. Ал АҚШ жағынан сауда өкілі Джеймисон Грир Трамп жұма күні ескерткен қосымша 100%-дық баж салығын енгізу мерзімі Қытайдың келесі қадамдарына байланысты болатынын айтты. Оның сөзінше, баж салығы 1 қарашаға дейін де енгізілуі мүмкін.
Алайда, көп ұзамай негізгі индекстер позицияларын қайтара бастады, ал S&P 500 күннің көп бөлігінде сенімді плюсте саудаланды. АҚШ Федералдық резерв жүйесінің төрағасы Джером Пауэллдің мәлімдемелері еңбек нарығының әлсіреу белгілеріне байланысты қазанда пайыздық мөлшерлеме тағы төмендейді деген инвесторлардың үмітін күшейтті.
Сарапшылар пікірі
— Қытай мен АҚШ арасындағы шиеленісті азайту жолы айдың соңына дейін қалай қалыптасатыны әзірге белгісіз, ал менің ойымша, нарық бұл жағдайды әлі де түсінуге тырысып жатыр, — деді CNBC арнасына берген сұхбатында U.S. Bank Wealth Management инвестициялық стратегия жөніндегі директоры Роб Хауорт. — Бұл қазіргі нарықтық көңіл күйге әсер ететін негізгі факторлардың бірі. Citigroup, Wells Fargo, JPMorgan және Goldman есептерінен көрініп тұрғандай, қаржы секторы сенімді, ал тұтынушылық сұраныс тұрақты.
— Себебі тап баж салығы мен сауда мәселесі биыл қор нарығының басты қиындық көзіне айналды. Сондықтан бұл бағыттағы кез-келген өзгерістерге барлығы мұқият назар аударады, — деді Bloomberg-ке Miller Tabak компаниясының бас нарық стратегы Мэтт Мэйли.
— ФРЖ төрағасы Пауэлл атап өткендей, қазір Федрезерв үшін оңай шешім жоқ, — деді Bloomberg-ке Global X компаниясының инвестициялық стратегия директоры Скотт Хелфстин. — Мөлшерлемені төмендету инфляцияны үдетуі мүмкін, ал оны жоғары деңгейде сақтау еңбек нарығына қауіп төндіреді. Хелфстиннің айтуынша, ФРЖ қазанда және желтоқсанда мөлшерлемені төмендетуі ықтимал, бірақ инвесторлар әртүрлі сценарийлерге дайын болуы тиіс, өйткені Пауэлл маневр жасау еркіндігін сақтауға тырысып отыр.
