«Уолл-стрит қуанышты»: Meta метағаламға шығынды азайтқаннан кейін өсім күтіледі
Уолл-стрит сарапшылары Meta-ның метағаламмен айналысатын бөліміне шығынды қысқарту жоспарына қуана қарады, деп жазды CNBC. Олардың пікірінше, бұл компанияның «қаржылық тәртібін» сақтап, тиімділік пен өсімге назар аударып отырғанын көрсетеді.
Метағаламға шығынның азаюы туралы жаңалық шыққан соң, Meta қағазы 4 желтоқсанда Нью-Йорктегі сауда-саттықтың басында шамамен 6% шарықтап, қазан айының соңынан бергі максимумды жаңартты. 5 желтоқсандағы саудада компания қағазы тағы 1,7% өсті.
Сарапшылар пікірі
— Citi: «Біздің ойымызша, бұл жаңалық Meta-ның ресурстарды ең перспективалы өнімдеріне қайта бөліп, өнімдеріне негізделген тұрақты өсім көрсете алатынын білдіреді», — деп жазды сарапшы Рональд Джоси. Ол Meta-ны тағы да өзінің негізгі инвестициялық идеясы деп атады. Джосидың болжамынша, компания қағазы үшін мақсатты баға — $850. Бұл ағымдағы деңгейден 26% жоғары.
— JPMorgan: «Meta-ның шығындағы тәртібіне қатысты Уолл-стрит пікіріне құлақ асып отырғаны бізді қуантады. Дегенмен, GAAP бойынша акцияға шаққандағы пайданы көтеру, операциялық пайданы арттыру және капиталдық шығындардың айтарлықтай өсуі жағдайында оң еркін ақшалай ағымын сақтау қажеттігін атап көрсету маңызды», — делінеді банктің жазбасында. Сарапшылар белгілеген мақсатты баға — $800, бұл Meta қағазы үшін ағымдағы деңгейден шамамен 19% өсу әлеуетін білдіреді. JPMorgan компанияға «сатып алу» рейтингін береді.
— Wells Fargo: «БАҚ-тағы Reality Labs бюджетінің 30% қысқаруы мүмкін деген хабарламалар Meta басшылығы шығын құрылымын ЖИ-ға байланысты бастамалар пайдасына белсенді түрде қайта құрып жатқанын айқын көрсетеді. Біз бұл қысқартудың жылдық мәнде акцияға шамамен $2 үнем әкелуі мүмкін деп бағалаймыз». Wells Fargo да Meta қағазын «сатып алу» деп ұсынады және мақсатты бағаны $802 деңгейінде белгілейді — бұл ағымдағы деңгейден шамамен 19% өсу әлеуетін білдіреді.
— Bank of America: «2026 жылы шығындар әлі де айтарлықтай өседі — әрі 2025 жылмен салыстырғанда жоғары қарқынмен — деп болжаймыз. Бірақ Meta-ның 2026 жылы шығынды бөлу бойынша икемділігі жоғары болуы мүмкін екенін ескеру маңызды. Басқаша айтқанда, Meta-ның келесі жылы шығындар бойынша қосымша қозғалыс жасау мүмкіндігі болуы ықтимал, бұл макроэкономикалық қысым табыстың) өсуін тежеген жағдайда да акцияға шаққандағы пайданы (EPS) сақтап қалуға көмектеседі». Bank of America белгілеген Meta қағазының мақсатты бағасы — $810 (ағымдағы деңгейден шамамен 20% өсу әлеуеті). Банк те «сатып алу» рейтингін берді.
— Rosenblatt: Егер метағалам бөлімшесінің бюджеті қысқаратыны туралы ақпарат расталса, бұл «Meta қағазын едәуір қолдауы мүмкін… Біздің бағалауымызша, Reality бөлімінің шығыны 2025 жылы $17,6 млрд операциялық залалға әкеледі және бұл шығындардың негізгі бөлігі — операциялық, ал капиталдық емес. Сондықтан, осы шығындарды қысқарту және назарды анағұрлым басым бағыттарға ауыстыру нарықтық көңіл-күйді айтарлықтай жақсартып, компанияның мультипликаторларын оның ақша ағымының өсуіне көбірек сәйкес деңгейге жақындатуы мүмкін — яғни біздің мақсатты бағамыз — $1117, бұл нарықтағы ең жоғары көрсеткіш деп санаймыз». Бұл бағалау Meta-ның ағымдағы котировкасынан шамамен 66% жоғары.
Контекст
Meta метағаламға бөлінетін ресурстарды айтарлықтай қысқартуға дайындалып жатқаны туралы Bloomberg дереккөздерге сілтеме жасап 4 желтоқсанда хабарлады. Агенттік әңгімелескен адамдардың айтуынша, метағалам бөлімшесінің келесі жылғы бюджеті 30%-ға дейін қысқаруы мүмкін. Бұл топқа Meta Horizon Worlds виртуалды әлемдері және Quest виртуалды шындық бөлімшесі кіреді. Meta компаниясының өзі бюджеттегі ықтимал қайта бөлу туралы пікір білдірмеген.
