«Өзі негізін қалаған қормен қоштасу»: Рэй Далио Bridgewater-дегі үлесін толық сатты
Америкалық инвестор Рэй Далио өзі 1975 жылы негізін қалаған Bridgewater Associates — әлемдегі ең ірі хедж-қордағы соңғы үлесін сатып жіберді. Компания одан қалған барлық акцияларды кері сатып алды, ал Далио директорлар кеңесінен кетті, деп жазды The Wall Street Journal клиенттерге жолданған хатқа сілтеме жасап.
75 жастағы Далио компанияны әрі қарай клиент және тәлімгер ретінде қолдайтынын, оның қорларына инвестор болып қала беретінін айтты. Алайда басқару деңгейіндегі оның қатысуы ресми түрде аяқталды.
Егжей-тегжейлі
Мәміледен кейін Bridgewater жаңа акциялар шығарды, оларды Брунейдің егеменді қоры сатып алды. WSJ дереккөздерінің айтуынша бірнеше миллиард доллар көлеміндегі инвестиция жайлы сөз болып отыр. Brunei Investment Agency америкалық инвестициялық компания капиталының шамамен 20%-на иелік етуші атанды. Бұл мәміле бұған дейін БАҚ-та жария етілмеген, ал ресми хатта қордың атауы да аталмайды.
Brunei Investment Agency бұрыннан Bridgewater қорларына инвестиция салып келген және енді активтерінің бір бөлігін тікелей басқарушы компанияның капиталына бөлді. Дереккөздерге сүйенсек, қор Bridgewater-дің ең ірі акционерлерінің біріне айналды — дегенмен ко-инвестициялық директор Боб Принске жол береді.
Bridgewater компаниясы Далионың акционерлер мен директорлар кеңесі құрамынан толық шығуы ішкі басқару құрылымын оңайлатады деп үміттенеді. Ол көптен бері бас директор, ко-инвестициялық директор және директорлар кеңесінің төрағасы қызметтерінен кеткенімен, WSJ атап өткендей, оның негізін қалаушы ретіндегі ықпалы ұзақ уақыт сезіліп келді — Далио негізгі мәселелер бойынша пікір айтып, талқылауларды жиі бастайтын.
Bridgewater-дің басқаруын тапсыру процесі ұзаққа созылды: бұл туралы Далио алғаш рет 2011 жылы айтып, оны 10 жыл ішінде аяқтаймын деп уәде берген. Алайда тиімді басқару моделін табу CEO-лардың ауысуы, келіспеушіліктер мен тіпті сот істерімен қатар жүрді. Клиенттерге арналған хатта бас директор Нир Бар Деа мен директорлар кеңесінің тең төрағасы Майк Макгавик Далионың кетуін «ауысу процесінің идеалды аяқталуы» деп атады.
Контекст
Құрметке ие мәртебесіне және ауқымына қарамастан, соңғы жылдары Bridgewater басқаруындағы активтер көлемінің азаюымен бетпе-бет келді — 2019 жылғы $168 млрд-тан 2024 жылдың соңында $92,1 млрд-қа дейін қысқарды. Бұған макроэкономикалық стратегияларға бағытталған ең ірі Pure Alpha қорының көлемін жасанды шектеу де әсер етті.
Алайда лимит енгізілгеннен кейін қордың нәтижелері жақсарды. The Wall Street Journal дерегінше, 2024 жылы Pure Alpha 11,3% табыстылық көрсетті, ал 2025 жылдың алғашқы алты айында — 17%. 2020–2024 жылдар аралығында бұл қор жылына орта есеппен 5,9% пайда әкелген, сол уақытта акция нарығы рекордтық қарқынмен өскен болатын.
