Таңғы жаңалықтар: Азия нарығы төмендеді, мұнай арзандады, Starbucks инвестор іздеуде
АҚШ пен Қытай арасындағы уақытша сауда бітіміне қарамастан, нарықтар тұрақсыз күйінде қалуда: Азия биржаларында акциялар негізінен арзандап жатыр, ал мұнай бағасы АҚШ-тағы қорлардың артуына байланысты төмендеуде. Осы уақытта Starbucks Қытайдағы бизнесінің бір бөлігін сатуды қарастырып жатыр — бұл бәсекелестіктің күшеюімен байланысты. Сонымен қатар, АҚШ билігі соңғы онжылдықтағы ең ауқымды капитал талаптарын төмендету шараларын жариялауға дайындалуда. Осы және басқа да маңызды тақырыптар — 15 мамыр таңындағы шолуымызда.
Starbucks Қытайдағы бизнесінің үлесін сатуды қарастыруда
Starbucks Қытайдағы бизнесінің даму жолдарын зерттеу үшін жеке инвестициялық қорлармен, технологиялық компаниялармен және өзге де әлеуетті инвесторлармен келіссөздер жүргізе бастады. Bloomberg деректеріне сәйкес компания үлесінің бір бөлігін сату мүмкіндігін де қарастырып отыр. Қытай — Starbucks үшін маңыздылығы жағынан екінші нарық. Агенттік дереккөздерінің айтуынша компания қаржылық кеңесші арқылы ықтимал серіктестерге хаттар жіберіп, Қытайдағы бөлімшенің болашағына қатысты пікірлерін сұраған. Бұл мәміле компанияның қытайлық активтерін бірнеше миллиард долларға бағалауы мүмкін.
Bloomberg бұл тақырыпты алғаш рет 2024 жылдың қарашасында жазған. Ол кезде агенттік Starbucks компаниясы экономикалық қиындықтарға және Luckin Coffee пен Cotti Coffee секілді жергілікті бәсекелестердің күшеюіне тап болғанын хабарлаған еді. Наурыздың соңындағы жағдай бойынша Starbucks Қытайда 7750-ден астам мекемеге ие болды. 2025 жылғы бірінші тоқсанда бұл бөлімше шамамен 740 млн доллар табыс әкелді. Салыстырсақ, сол тоқсанда Luckin компаниясының табысы 1,2 млрд доллар болған.
Bloomberg дереккөздері әлеуетті инвесторлар алғашқы ұсыныстарын алдағы апталарда беруі тиіс екенін, бірақ мәміленің жүзеге аспауы да мүмкін екенін айтады.
Starbucks өкілі түсініктеме беруден бас тартып, бас директор Брайан Никколдың соңғы есепте айтқан сөзіне сілтеме жасады: «Біз ассортимент пен бағаны жаңартқаннан кейін Қытай нарығында жағымды белгілер байқалды. Біз Қытай нарығына ұзақмерзімді міндеттеме ретінде қарап, өсімге қол жеткізу үшін түрлі тәсілдерге ашықпыз», — деді Никкол.
Бұған дейін McDonald’s және Yum! Brands (KFC иесі) компаниялары да Қытайдағы бизнестің үлесін жекеменшік инвестициялық қорларға сату арқылы жергілікті нарыққа бейімделу мен даму қарқынын арттыруға тырысқан болатын, деп жазады Bloomberg.
Мұнай бағасы АҚШ-тағы мұнай қорларының артуынан кейін төмендеді
АҚШ-та мұнай қорының күтпеген жерден артуына байланысты бейсенбі күнгі саудада америкалық мұнай фьючерстері 1 доллардан астам арзандады, деп хабарлайды Reuters.
West Texas Intermediate (WTI) мұнайының маусым айындағы жеткізуге арналған келісімшарт бағасы $1,6 немесе 2,6%-ға төмендеп, $61,5-қа дейін түсті.
АҚШ Энергетикалық ақпарат басқармасының (EIA) деректеріне сәйкес 9 мамырда аяқталған аптада коммерциялық мұнай қоры 3,5 млн баррельге өсіп, 441,8 млн баррельге жетті. Reuters сұхбаттасқан сарапшылар керісінше, қор 1,1 млн баррельге қысқарады деп болжаған.
Нарықтағы дереккөздердің айтуынша бұған дейін жарияланған Америкалық мұнай институтының (API) деректері де 4,3 млн баррельге өсімді көрсеткен.
Сонымен қатар, ОПЕК және ОПЕК+ альянсына кіретін елдер мұнай жеткізуді одан әрі арттыруда. Алайда, сәрсенбіде ОПЕК АҚШ пен басқа альянсқа кірмейтін елдердегі өндірістің өсу болжамын төмендетті.
Қытайлық Jiangsu Hengrui Гонконгта IPO өткізеді
Jiangsu Hengrui Pharmaceuticals Co. Гонконг биржасында акцияларын орналастыру үшін инвесторлардан тапсырыс қабылдай бастады. Бұл орналастыру компанияға 9,9 млрд гонконг долларына ($1,3 млрд) дейін қаражат тартуға мүмкіндік беруі мүмкін, деп хабарлайды Bloomberg. Бұл IPO — өңірдегі нарықтың жандануына серпін беретін ірі оқиғалардың бірі.
Компания бір акцияны 41,45–44,05 гонконг долларына бағалап, 225 млн акцияны ұсынады. Бұл баға Шанхай биржасындағы соңғы бағаға қарағанда 28%-ға дейінгі жеңілдікпен берілуде — бұл Гонконг пен материктік Қытайдағы бағалардың айырмашылығына сәйкес келеді.
Шанхайда бейсенбі күні Hengrui акциялары 1,78%-ға қымбаттады. Компания онкологиялық және жүрек-қан тамыр ауруларына қарсы дәрілерді әзірлеуге маманданған. Гонконгта сауда 23 мамырға жоспарланған.
Hengrui — Қытайда тіркелгенімен, Гонконгта қосымша листинг жасайтын компаниялардың өсіп келе жатқан тобына қосылды. Осы аптада аккумулятор өндіруші CATL да орналастыруға тапсырыс қабылдауды аяқтады — бұл компания $4 млрд-тан астам қаражат тартуы мүмкін.
Орналастырудың 40%-дан астамы анкерлік инвесторларға тиесілі болды. Олар акцияларды алты ай бойы сатпауға келіскен. Олардың қатарында — GIC Pte, Invesco Advisers Inc., Hillhouse Investment, Millennium Management және Oaktree Capital Management бар.
Орналастыру кеңесшілері — Morgan Stanley, Citigroup және Huatai Financial Holdings.
АҚШ банктер үшін капитал талаптарын төмендетуге дайындалуда
АҚШ билігі 2010-жылдар басынан бергі ең ірі реформалардың бірі — банкке қатысты капитал талаптарын төмендету туралы жарияламақ, деп жазады Financial Times. Бұл — Дональд Трамп әкімшілігінің реттеуді азайту саясаты аясындағы тағы бір қадамы.
Ақпарат көздерінің айтуынша жақын айларда реттеушілер қосымша левередж коэффициентін (SLR) жұмсарту бойынша ұсыныс жасайды. Бұл коэффициент банктерге барлық активтер көлеміне (оның ішінде туынды құралдар сияқты баланстан тыс активтерге) қатысты жоғары сапалы капиталдың белгілі бір көлемін ұстауды міндеттейді.
2008–2009 жылғы қаржы дағдарысынан кейін енгізілген бұл талап банктер тарапынан жиі сынға ұшыраған, себебі ол АҚШ-тың қазынашылық облигациялары сияқты төмен тәуекелді активтерді ұстағаны үшін де «жаза» ретінде қарастырылады.
Bank Policy Institute басшысы Грег Баер FT-ке берген түсініктемесінде: «Трежерис ұстағаны үшін банктерді жазалау — олардың дағдарыс кезінде өтімділікті қолдау қабілетіне нұқсан келтіреді», — деді.
Лоббистер реформаның жазға қарай жариялануын күтуде. SLR-ды жеңілдету Трамп әкімшілігіне қарыз алу құнын төмендету және банктердің мемлекеттік облигациялар нарығына қатысуын кеңейту мақсатына жетуге көмектесуі мүмкін.
ФРЖ басшысы Джером Пауэлл мен қаржы министрі Скотт Бессент бұл бастаманы «басымдық» деп атады.
Қазір АҚШ-тағы ірі банктер жалпы левереджге қатысты бірінші деңгейлі капиталды кемінде 5% деңгейінде ұстауы тиіс. Ал Еуропа, Қытай, Канада және Жапония елдерінде бұл көрсеткіш орташа есеппен 3,5%-дан 4,25%-ға дейін.
Реттеушілер сондай-ақ төмен тәуекелді активтерді — қазынашылық облигациялар мен орталық банктегі депозиттерді — SLR есебінен алып тастау мүмкіндігін талқылап жатыр. Бұл тәжірибе пандемия кезінде қолданылған және сарапшылардың бағалауы бойынша банктерге балансында $2 трлн босатуға мүмкіндік берген.
Дегенмен, мұндай қадам АҚШ-ты халықаралық ережеден ерекше елге айналдырады және Еуропада да осыған ұқсас жеңілдіктерге сұраныс туғызуы мүмкін.
Бірақ бұл реформа АҚШ-тың ірі банктеріне айтарлықтай әсер етпеуі мүмкін — олар көбінесе ФРЖ стресс-тесттері сияқты басқа реттеушілік шектеулерге тәуелді.
Нарықтарда не болып жатыр
AP хабарлағандай, Уолл-стриттегі аралас сауда сессиясынан кейін бейсенбіде Азия нарықтары мен америкалық фьючерстер төмендеді.
Қытай АҚШ-пен уақытша сауда бітімі аясында бірқатар тарифтік емес кедергілерді жоюды бастағанымен, нарықтар әлі де тар ауқымда қалуда.
Жапонияның Nikkei 225 индексі 1,3%-ға төмендеп, 37 633,36 тармаққа төмендеді. Төмендеушілер қатарында чип өндіруші Disco Corp. (-2,6%) және Advantest (-1,8%) болды. Shanghai Composite 0,6%-ға, тайвандық Taiex 0,2%-ға, ал оңтүстіккореялық Kospi 0,1%-ға түсті. Австралиялық S&P/ASX 200 айтарлықтай өзгерген жоқ, ал Гонконгтық Hang Seng 0,2%-ға өсті.
Уолл-стритте индекс мәндері әртүрлі бағытта қозғалды: S&P 500 — +0,1%, Dow Jones — -0,2%, Nasdaq Composite — +0,7%. Super Micro Computer акциялары саудтық DataVolt-пен серіктестік туралы жаңалықтан кейін 15,7%-ға өсті. AMD өз акцияларын $6 млрд-қа дейін кері сатып алу жоспарын жариялап, 4,7%-ға қымбаттады. Nvidia — +4,2%, Alphabet — +3,7%. Жаңа шыққан eToro акциялары 28,8%-ға көтерілді.
Инвесторлар АҚШ-тағы сәуірдегі көтерме бағалар туралы мәліметтерді күтуде — олар инфляцияның бәсеңдеуін көрсетуі мүмкін. Бөлшек сауда өсімі 1,4%-дан 0,2%-ға дейін баяулайды деп күтілуде. Walmart есебі де назарда болмақ.
Қор нарығы аптаның басындағы күрт өсуден кейін тұрақтылықты сақтап отыр — бұл өсім АҚШ пен Қытай арасындағы 90 күндік сауда үзілісі туралы жаңалықпен байланысты болған. Дегенмен, белгісіздік әлі де бар: Трамптың тарифтік саясаты жүйесіз болып отыр, бұл инвестициялар мен тұтынушылық белсенділікті тежейді.
