АҚШ акциялары сауданың алғашқы күнін өсіммен бастады
Демалыстан кейінгі алғашқы сауда-саттықта АҚШ-тың негізгі қор индекстері 1%-ға және одан жоғары өсті — бұл Мемориал күнімен байланысты. Инвесторлар Еуроодақтан келетін тауарларға баж салығын көтеруді кейінге қалдыру туралы Дональд Трамптың шешімін оптимизммен қабылдады. Сонымен қатар, нарыққа жаңа сауда келісімдеріне үміт пен ұзақмерзімді тұтыну тауарларына тапсырыстың күткеннен аз төмендеуі әсер етіп отыр.
Егжей-тегжейлі
▪ АҚШ-тың негізгі индексі S&P 500 — сауда басталғаннан кейін 1,5% өсіп, 5891,59 пунктке жетті ( жарияланған сәттегі күн ішіндегі максимум).
▪ «Көгілдір фишкалар» индексі Dow Jones Industrial Average шамамен 1,2% өсіп, 42 096,93 пунктті көрсетті.
▪ Технологиялық компаниялардың үлесі көп Nasdaq Composite индексі барынша белсенді өсті — бір сәтте 2%-ға, 19 111,34 пунктке жетті.
Плюсте болған барлық «Керемет жетілік» акцияларының ішінде Tesla қағаздары айрықша қымбаттады: бір сәтте 5%-дан астам өсім көрсетті. Жасанды интеллектке арналған процессорлар мен видеокарталар шығаратын Nvidia акциялары шамамен 3%-ға өсті, ал Google-дің холдингі саналатын Alphabet қағаздары — 2,7%-ға. Топтағы қалған компаниялардың акциялары 1,7–2% аралығында өсті.
Оптимизмге негіз бар
АҚШ президенті Дональд Трамптың Еуроодаққа қатысты 50% көлеміндегі импорттық баж салығын енгізуді 9 шілдеге дейін кейінге қалдыру туралы шешімі инвесторларды қуантты. Трамп 23 мамырда (жұма күні) баж мөлшерлемесін ұсынғаннан кейін, АҚШ пен Еуропа нарықтарында акциялар төмендеді. Алайда арада екі күн өткен соң, ол Урсула фон дер Ляйенмен сөйлесіп, бұл шараны 9 шілдеге дейін кейінге қалдырды. Бұл 26 мамырда жаһандық MSCI индексінің, Еуропаның негізгі Stoxx 600 индексінің, сондай-ақ BMW, Mercedes-Benz және Volkswagen секілді жекелеген неміс автоөндірушілерінің акцияларының қымбаттауына себеп болды. АҚШ акцияларына арналған фьючерстер де қымбаттады, бірақ негізгі нарық Мемориал күніне байланысты жабық болды.
Трамптың шешімі қор нарығындағы қысымды азайтқанымен, болашақ сауда келісімдеріне қатысты белгісіздік әлі де инвесторлардың белсенділігін тежеп тұр, деп атап өтті Freedom Capital Markets Research. АҚШ Ұлттық экономикалық кеңесінің директоры Кевин Хассет сейсенбі күні CNBC телеарнасына берген сұхбатында осы аптада «тағы бірнеше» сауда келісімінің жасалуын күтетінін айтты.
Нарық үшін оң факторлардың бірі — жақсы статистиканың жариялануы болды. Сәуір айында ұзақмерзімді тұтыну тауарларына (мысалы, ұшақтар, компьютерлер және басқа да жабдықтар) тапсырыстар 6,3% азайды. Бұл көрсеткіш Dow Jones консенсус-болжамындағы 7,8%-дан күткеннен төмен болды, дейді CNBC. Сонымен қатар, тұтынушылық сенім деңгейі болжамнан жоғары шықты — индекс 98-ге жетіп, өткен аймен салыстырғанда 12 пунктке жоғары. Dow Jones дерегінше, болжам 86-лық бағамды көрсеткен еді.
