Baidu: Қытайлық Google неге ең арзан тех-акцияға айналды?
Baidu акциялары қытайлық интернет-гиганттар арасында ең төмен бағаланып отыр. Бұған компанияның жасанды интеллект (ЖИ) саласында бәсекеге қабілеттілігіне қатысты күмәндер мен бәсекелестерін қуып жету үшін шығындарының тым жоғары болуы себеп.
Егжей-тегжейлі
21 тамыз күні таңертең Гонконгта Baidu акциялары тоқсандық сатылымның соңғы үш жылдағы ең ірі құлдырауы жарияланған соң 3%-ға арзандады.
Осы құлдыраудан кейін компания қағаздары алдағы кезеңге арналған P/E мультипликаторы 9,7 деңгейінде саудалануда — бұл Hang Seng Tech индексіндегі табысты компаниялар арасындағы ең төмен көрсеткіш. Тіпті проблемалары бар девелопер Longfor Group акцияларынан да арзан (олардың P/E — 11), деп жазады Bloomberg.
2025 жылдың басынан бері Гонконг технологиялық индексі ЖИ бумының арқасында 24%-ға өсті. Ал Baidu қағаздары бар болғаны 3%-ға қымбаттады.
Baidu-ға не болды?
«Компанияның интернет-іздеу жүйесі, бұрын негізгі табыс көзі болған, қазір Xiaohongshu және Douyin сияқты әлеуметтік бейне-платформалардың қатаң бәсекесіне тап болды. Бұл платформалар пайдаланушыларды Baidu-дің статикалық веб-сервистерінен тартып әкететін, динамикалық әрі қызықты экожүйелер құрды», — дейді Third Bridge сарапшысы Эрик Шень.
20 тамыз кешкісін Baidu-дің тоқсандық кірісі жылына 4%-ға азайып, 32,71 млрд юаньға ($4,6 млрд) түскені белгілі болды. Бұл сарапшылардың орташа болжамынан (32,76 млрд юань) төмен, деп хабарлайды Reuters. Bloomberg мұндай құлдырауды елдегі экономикалық баяулаумен байланыстырып отыр. Ол Baidu-дың ЖИ саласында ірі ойыншылармен бәсекелесу мүмкіндігін шектеді.
Baidu қаржы директоры Генри Хэ мойындағандай: «ЖИ-іздеу жүйесін монетизациялау әлі ерте сатыда болғандықтан, біздің кіріс пен маржа қысқа мерзімде қатты қысымға ұшырап отыр. Үшінші тоқсан ерекше қиын болады».
Компания чат-бот Ernie-ді ЖИ экожүйесінің орталығына айналдырып, бұлтты қызметтердің сұранысын арттыруға үміттенеді. Бірақ ішкі нарықта Alibaba мен Tencent секілді алыптармен, сондай-ақ икемдірек стартаптармен күрес күтіп тұр.
Акциялар жағдайы
MarketScreener дерегінше, жаз айларында Baidu қағаздары бойынша тек Nomura ғана болжамды өзгертті: жапондық инвестбанк Nasdaq-та саудаланатын Baidu-дің ADR мақсатты бағасын $95-тен $93-ке төмендетіп, рейтингті «бейтарап» деңгейде қалдырды.
Ал FactSet жинақтаған сарапшылар консенсусына сәйкес, соңғы айларда Baidu қағаздарына баға «нарықтан жоғары» (Overweight, яғни «сатып алу») деңгейінде қалып отыр.
