CATL акциялары неге құлдырады және оны неге сарапшылар мүмкіндік деп санайды?
Tesla үшін аккумуляторлардың негізгі жеткізушілерінің бірі болып саналатын Contemporary Amperex Technology (CATL) компаниясының акциялары 17 қарашадағы сауда барысында Шэньчжэнь биржасында шамамен 5,4%-ға төмендеді.
Бұл құлдырауға компанияның үшінші ірі акционері Хуан Шилиньнің өз үлесін азайту туралы шешімі түрткі болды: ол өзіне тиесілі акциялардың 1%-ын институционалдық инвесторларға сатуға бел буды, деп жазады Bloomberg. Бұл жаңалық АҚШ-тың заң шығарушылары тарапынан болып жатқан қысымның күшеюі аясында трейдерлер алаңдаушылығын арттырды: АҚШ Конгресінің Өкілдер палатасындағы республикалықтар Сауда министрлігін Қытайда өндірілетін күн панельдері мен желілік компоненттердің импортына бақылауды күшейтуге шақырып отыр. АҚШ-тың сауда министрі Говард Латникке жолданған хатта олар алғаш рет батарея инверторларын энергетикалық жүйелер қауіпсіздігі үшін тәуекел факторы ретінде атады, деп атап өтеді Morgan Stanley сарапшылары. Олардың пікірінше бұл энергия сақтау жүйелерімен жұмыс істейтін компаниялардың акцияларына деген қызығушылықты төмендетуі мүмкін.
Гонконгте, мамырдан бері саудаланатын CATL қағаздары да 4,8%-ға арзандады. Инвесторлар локап-периодтың аяқталуын күтуде — 19 қарашада ерте инвесторларға тиесілі 77,5 млн акцияны сатуға қойылған тыйым мерзімі бітеді, деп хабарлайды агенттік.
Сарапшылар не дейді
Шэньчжэньде CATL акциялары жыл басынан бері 56%-ға қымбаттаса да, сарапшылар табысты бекітуге асықпауға кеңес беруде. Керісінше, Қытайдың Changjiang Securities инвесткомпаниясы инвесторларға түзетуді пайдаланып қалуды ұсынды: олардың пікірінше Хуанның акция сатуы бағамдарға айтарлықтай әсер етпейді, өйткені сату ашық нарықта жүзеге аспайды.
«Күшті фундаменталды көрсеткіштер аясында бұл просадка сатып алуға мүмкіндік беруі мүмкін. 2026 жылы литийге деген сұраныс 30%-ға өседі деп күтілетінін ескерсек», — делінген Changjiang Securities жазбасында.
14 қарашада JPMorgan Chase инвесторларға Шэньчжэньде саудаланатын CATL акцияларын сатып алып, Гонконгте орналастырылған қағаздарды сатуға кеңес берді, деп жазады Bloomberg. Бұл ұсыныс компания акцияларын сату жөніндегі негізгі инвесторларға арналған шектеудің аяқталуымен байланысты. JPMorgan-ның бағалауынша локаптың аяқталуы Гонконгтегі акциялардың Шэньчжэньдегі бағаға қатысты премиясының төмендеуіне және нарыққа айналымдағы барлық қағаздардың шамамен 50%-ының шығуына әкелуі мүмкін. Сонымен қатар, JPMorgan Chase Шэньчжэньдегі CATL акцияларын сатып алуды ұсынады, өйткені аккумулятор секторындағы, әсіресе энергия сақтау жүйелері сегментіндегі сұраныстың болашағына деген сенім күшейіп келеді, деп жазады Bloomberg.
Қазір CATL акциялары Гонконгте Шэньчжэньдегіден шамамен 20%-ға қымбат саудалануда, тіпті валюта айырбастау бағамын ескергенде де, деп көрсетеді Bloomberg деректері. Агенттіктің айтуынша, бұл — сирек кездесетін жағдай, өйткені әдетте жағдай керісінше болады.
