OpenAI 2027 жылы тарихтағы ең ірі IPO-лардың бірін өткізуі мүмкін — WSJ
The Wall Street Journal дерегінше, OpenAI компаниясының қайта құрылуы аяқталып, енді ChatGPT жасаушысы 2027 жылы IPO өткізу мүмкіндігіне ие болды. Дереккөздердің айтуынша, бұл мәселе бойынша келіссөздер әлі бастапқы деңгейде, сондықтан OpenAI акцияларын биржаға 2027 жылдан кейін де шығара алады немесе мүлде бас тартуы мүмкін.
OpenAI бас директоры Сэм Альтман 28 қазанда компанияның IPO өткізуі ықтимал екенін айтты, бірақ нақты мерзім белгіленбегенін жеткізді.
WSJ мәліметінше, OpenAI акцияларын жария орналастыру тарихтағы ең ірі оқиғалардың бірі болуы мүмкін. Қазан айының басында ChatGPT жасаушысы 500 миллиард доллар бағасына жетіп, әлемдегі ең қымбат жеке компания атанды. Осылайша ол Илон Масктың SpaceX компаниясынан да алға шықты.
OpenAI қайта құрылу процесінің аяқталғанын 28 қазанда хабарлады. Нәтижесінде компания жалпы құны 500 миллиард доллар болатын OpenAI Group PBC атты жаңа коммерциялық ұйым құрды. Оның 27 пайыз акциясын OpenAI-дің алғашқы инвесторы — Microsoft алды. Тағы 26 пайызы OpenAI Foundation қорына берілді, ол компанияны директорлар кеңесі арқылы басқарып отырады. Қалған 47 пайыз акция бұрынғы және қазіргі қызметкерлер мен басқа инвесторлар арасында бөлінді.
