S&P АҚШ рейтингін AA+ деңгейінде растады: шығындар өссе де, долларды не күтіп тұр?
S&P Global Ratings АҚШ-тың несиелік рейтингін растады. Ұзақмерзімдісі — AA+, қысқа мерзімдісі — A-1+. Бұл шешім шілдеде қабылданған One Big Beautiful Bill Act («Бір үлкен әдемі заң жобасы») шығындарды арттырғанына қарамастан қабылданды. Bloomberg жазғандай, құжат 2017 жылдан бері қолданыстағы салықтық жеңілдіктерді сақтап қана қоймай, бизнес пен халық үшін жаңа жеңілдіктер енгізді.
Егжей-тегжейлі
Агенттік түсіндіргендей, кедендік алымдардың өсуінен түскен қосымша түсім бюджет шығындарының орнын аз да болса толтыруы мүмкін. Шілде айында түсімдер $21 млрд-қа артқанымен, бюджет тапшылығы шамамен 20%-ға өсіп, $291 млрд-қа жетті.
Рейтингтің болжамы тұрақты күйде қалды. Дегенмен, S&P атап өткендей, АҚШ қаржыларының беріктігі көп жағдайда ФРЖ саясатына байланысты. Орталық банк президент Дональд Трамптың қысымына қарамастан бір мезгілде инфляцияны тежеуі де, нарық тұрақтылығын сақтауы да тиіс.
Сарапшылар не дейді
Malayan Banking аға валюталық стратегы Фиона Лим рейтингтің сақталуы долларды қолдауы мүмкін деп есептейді. Бұған дейін Трамптың салықтар мен шығындарға қатысты жаңа заңнамасы АҚШ-тың қарызды бақылау қабілетіне күмән туғызған болатын. Бірақ сарапшының айтуынша доллардың одан арғы бағыты ФРЖ шешімдеріне және осы аптада Джексон-Хоулдегі Джером Пауэллдің сөз сөйлеуіне байланысты болады.
Reuters еске салғандай, Ақ үйге қайта оралғаннан кейін Трамп сауда соғысын бастады. АҚШ-қа кіретін барлық импортқа 10% базалық тариф және жекелеген елдер мен тауарларға қосымша баж салығы енгізілді.
S&P болжамынша 2025–2028 жылдары бюджет тапшылығы ЖІӨ-нің орта есеппен 6%-ын құрайды. Бұл 2024 жылғы 7,5%-дан және 2020–2023 жылдардағы шамамен 10%-дан төмен.
Контекст
АҚШ бүгінде үш ірі рейтинг агенттігінің ешқайсысынан да ең жоғары бағаға ие емес. Соңғы болып мамырда Moody’s рейтингті Aaa-дан Aa1-ге дейін түсірді. Негізгі себеп — қысқармай отырған бюджет тапшылығы. Бұған дейін Fitch пен S&P те рейтингті AAA деңгейінен төмендеткен болатын.
