АҚШ-тың Nvidia капиталына қатысуы талқыланбайды — Қаржы министрлігі
АҚШ үкіметінің ЖИ-процессор өндіруші Nvidia компаниясының акционер қатарына кіруі «талқыланбайды», – деді Қаржы министрі Скотт Бессент Fox Business арнасындағы эфирде. Оның сөзін Reuters келтіреді.
«Менің ойымша, Nvidia-ға қаржылай қолдау қажет емес, сондықтан бұл мәселе қазір күн тәртібінде тұрған жоқ», – деді Бессент.
Сонымен бірге ол Дональд Трамп әкімшілігі экономиканың өзге салаларынан үлес сатып алуы мүмкін екенін де жоққа шығармады. «Біз өзгеріс жүргізетін басқа салалар да болу мүмкін, мысалы, кеме жасау», – деді ол.
Инвесторлар Nvidia есебін күтуде
Nvidia 27 тамызда сауда жабылғаннан кейін тоқсандық есебін жариялайды. FactSet деректерін келтірген Barron’s мәліметінше, сарапшылар табыс $46,05 млрд-қа жетеді деп күтуде — бұл 2024 жылдың сол кезеңімен салыстырғанда 53% жоғары. Уолл-стриттің болжамы бойынша, бір акцияға шаққандағы түзетілген пайда $1,01 болады — жылдық есеппен 48% көп.
Инвесторлар есептілікте төрт негізгі тақырыпқа назар аударуы тиіс, деп санайды Barron’s. Олар: Уолл-стриттің жоғары күтулері, ЖИ-сервер жүйелері сегментіндегі прогресс, Қытайдағы бизнес мәселелері және робототехника нарығындағы мүмкіндіктер.
Нарық есеп жарияланғаннан кейін компания капитализациясы $260 млрд-қа өзгеруі мүмкін деп күтуде. Сонымен қатар, кейбір сарапшылар атап өткендей, бір ғана компания акцияларының қозғалысынан гөрі, бұл чип өндірушінің нәтижелері бүкіл нарыққа тигізетін әсері маңыздырақ болады.
Контекст
Өткен аптада Дональд Трамп Intel компаниясының АҚШ әкімшілігіне акцияларының 10%-ын беруге келісім жасағанын мәлімдеді. Intel дерегінше, АҚШ әкімшілігі бұл пакетті жалпы сомасы $11,1 млрд есебінен алады: оның ішінде $2,2 млрд – АҚШ-та өндірісті дамытып жатқан чипмейкерлерге мемлекеттік қолдау көрсететін CHIPS заңы бойынша бұрын берілген гранттардан, $5,7 млрд – осы заң аясында әлі берілмеген гранттардан және $3,2 млрд – Secure Enclave бағдарламасы шеңберінде (CHIPS-тің қосымша бағдарламасы, бірақ қаржыландыру көздері бөлек).
Bloomberg бұл мәмілені федералдық биліктің жекеменшік бизнеске араласуының «таңғаларлық деңгейі» деп атады және бұл қалыптасқан нормаларды бұзады деп бағалады. Intel-дің өзі АҚШ-тың ең ірі акционер ретінде қатысуы белгілі бір тәуекелдер тудыруы мүмкін екенін ескертті, әсіресе оның шетелдегі бизнесі үшін.
Бұдан бөлек, Пентагон АҚШ-тың қорғаныс компанияларының акция пакеттерін сатып алу мүмкіндігіне қызығушылық танытып отыр, оған Lockheed Martin де кіреді, – деді 26 тамызда сауда министрі Говард Латник. Ол осылайша үкіметтің Intel-дегі тәжірибесін басқа корпорациялармен қайталау ықтималдығы туралы сұраққа жауап берді.
Сонымен қатар, тамыз айында Nvidia және оның басты бәсекелесі AMD Ақ үймен Қытайдағы ЖИ-чиптер сатуынан түсетін табыстың 15%-ын бюджетке аудару туралы келісімге келді. Сингапурдағы Hinrich Foundation қорының сауда саясаты бөлімінің басшысы Дебора Элмс сияқты кейбір сарапшылар мұны жасырын экспорттық салық әрі қауіпті прецедент деп атады.
