Әлемнің бай отбасылары болашаққа қалай инвестиция құяды
UBS – әлемдегі ең ірі капитал басқару банктерінің бірі – орташа активтері $1,1 млрд болатын 317 отбасылық кеңсеге сауалнама жүргізіп, олардың жаңа экономикалық жағдайға қалай бейімделіп жатқаны мен тұрақты портфель құру жолдарын анықтады. Инвестбанк өтімділікке қызығушылықтың артқанын, әртүрлі тәуекел деңгейіндегі активтер арасында үлесті қайта бөлуді және жаңа салаларға абайлап ену тенденциясын атап өтті.
Нарық өтімді бола түсуде
Әлемнің ең бай отбасыларының қаржысын басқаратын отбасылық кеңселер инвестициялық стратегияларын қайта қарап, акцияларға бағытталған салымдарын арттыра бастады. UBS Global Wealth Management деректеріне сүйенсек, 2024 жылы дамыған елдердің акцияларының портфельдегі үлесі 24%-дан 26%-ға дейін өскен. Америкалық инвесторлар белсенділік танытып, бұл көрсеткіш 30%-ға жеткен.
Сауалнамаға қатысқандардың 35%-ы 2026 жылға дейін акциялардың үлесін 29%-ға жеткізуді жоспарлап отыр. Қоғамдық нарықтарға деген қызығушылықтың артуы басқа бағыттардан бас тартуды білдірмейді — керісінше, отбасылық кеңселер жекеменшік сектордағы құралдарды да кеңейтіп жатыр.
Жекеменшік несиелеу аясы кеңеюде
Соңғы бір жылдағы ең елеулі өзгерістердің бірі — жекеменшік несиелеуге (private credit) деген сұраныстың артуы. Бұл құрал арқылы инвесторлар банктерді айналып өтіп, компанияларды тікелей қаржыландыра алады. Мұндай салымдардың үлесі 2%-дан 4%-ға дейін өсті. Биыл портфель құрылымын өзгертуді жоспарлап отырғандар бұл көрсеткішті 5%-ға жеткізбек.
UBS бағалауынша бұл бағыттағы табыстылық жылына 9–12% аралығында. Бұл облигациялар нарығындағы тұрақсыздық пен инфляциялық күтулердің белгісіздігі аясында өте өзекті. Жекеменшік несие инвесторларға пайыздық мөлшерлемелердің күрт ауытқуына қарсы портфельдің тұрақтылығын сақтауға мүмкіндік береді.
Балама стратегиялар берік орнын сақтауда
Жекеменшік несиелермен қатар, отбасылық кеңселер баламалы инвестициялық стратегияларды — әсіресе, тікелей инвестицияларды (private equity) белсенді пайдалануды жалғастыруда. UBS деректеріне сәйкес баламалы активтер әлем бойынша отбасылық кеңселер портфелінің орта есеппен 44%-ын, ал АҚШ-та – 54%-ын құрайды.
Респонденттердің үштен бірі келесі бес жылда тікелей инвестицияларды – қорлар арқылы да, тікелей де – арттыруды жоспарлап отыр. UBS өкілі Дэниел Скансароли атап өткендей, бұл сегмент соңғы онжылдықта жоғары табыс алып келген, бірақ сонымен қатар тәуекелі де жоғары болған жеке нарықтарға тән.
Болашақ салаларға бетбұрыс
Отбасылық кеңселер ұзақмерзімді өсім әкелуі мүмкін салаларды белсенді зерттеуде. UBS деректеріне сүйенсек, олар табыстылықты арттыратын, технологиялық жаңғырумен және портфельді әртараптандырумен байланысты ұзақмерзімді трендтерге байланған ашық және жекеменшік компанияларға салымдарын арттырып жатыр.
Басты назарда денсаулық сақтау мен фармацевтика, электрлендіру, генеративті жасанды интеллект және таза энергияға көшу салалары.
UBS көптеген отбасы бұл салаларды әлі толық зерттеп үлгермегенін айтады: «Инвестициялық стратегиялар біртіндеп қалыптасуда». Есепте сонымен қатар: «Жалпы алғанда, отбасылық кеңселер бұл бағыттарға инвестициялаудың қыр-сырын енді ғана түсіне бастады», — делінген.
Сауда тәуекелдері күшейіп келеді
2025 жылдағы басты қауіп ретінде инвесторлардың 70%-ы жаһандық сауда соғысын атап өтті. Сауалнама қаңтар мен 4 сәуір аралығында жүргізілді — бұл кезең Дональд Трамптың жаңа импорттық баж салығын жариялауы мен оның нарықтағы әсерімен тұспа-тұс келді.
Ұзақмерзімді қауіптердің қатарында: ықтимал рецессия (53%) мен қарыз дағдарысы (50%). Сонымен қатар, 52% респондент 2025 жылы ірі геосаяси қақтығыстың орын алуын, ал 61% — бес жыл ішінде болуы мүмкіндігін болжайды.
UBS пікірінше отбасылық кеңселер сауда шектеулерінен бұрын, олардың жанама салдарынан — нарықтағы құбылмалылық, инфляциялық қысым мен несиелеу шарттарының өзгеруінен қауіптенуде.
АҚШ активтері: қауіпсіз айлақтан қауіп көзіне дейін
АҚШ-тағы отбасылық кеңселер инвестицияларын ішкі нарыққа шоғырландыруда, олардың 86%-ы Солтүстік Америкаға тиесілі (2020 жылы бұл көрсеткіш 74% болған). Бұл — барлық елдер арасындағы ең жоғары «отандық бейімділік». Сауалнамаға қатысушылардың ішінде бұл өңірге салымдардың үлесі – 53%, бұл ең алдымен америкалық технологиялық акциялардың өсуіне байланысты.
Зерттеуге қатысушылардың бірі мұны бірқатар себептермен түсіндірді: көптеген отбасылар капиталдарын АҚШ-қа қайтарып, бұл елді жоғары өсу әлеуеті бар өңір деп бағалаған. Кейбір шетелдік инвесторлар да қорған ретінде АҚШ активтеріне бағытталған — оларды корпоративтік табыстың өсуі мен капитал нарықтарының тереңдігі қызықтырған.
«Бірақ соңғы айларда жағдай күрт өзгерді, енді инвесторлар келесі аптада, келесі жылы, келесі онжылдықта әлем қандай болатынын түсінуге тырысуда. Барлығы өте тұрақсыз, меніңше, енді кері бұрылыс басталады», — деді ол.
