АҚШ-тың негізгі үш қор индекстері 14 ақпаннан бері алғаш рет аптаны өсіммен аяқтады

Америкалық Barron’s басылымы жазғандай, S&P 500 төрт апталық төмендеуден кейін аптаны плюспен аяқтап, 14 ақпаннан бері алғаш рет өсім көрсетті. Алайда сарапшылар қор нарығындағы белгісіздік жалғасып жатыр деп есептейді.

Мәліметтер

— S&P 500 индексі жұма күнгі сауда қорытындысы бойынша 0,1% өсіп, 5667 тармақтан жоғары жабылды. Апта бойынша өсімі — 0,5%.

— Nasdaq Composite индексі жұма күні 0,5% өсіп, 17 784 тармаққа жетті. Апта бойынша 0,2% өсім көрсетті.

— Dow Jones Industrial Average индексі 32 тармаққа, яғни 0,08%-ға өсті. Жабылу кезінде 41 985 деңгейінде болды. Апта ішінде 1,2% жоғарылады.

— АҚШ-тың екі жылдық мемлекеттік облигацияларының табыстылығы 3,95%-ға, ал он жылдықтары 4,25%-ға дейін төмендеді.

— Bitcoin жұма күнін тұрақты деңгейде аяқтады — $84,3 мың.

Нарыққа не әсер етті

Жұма күнгі сауда белсенділігі төмен болды: экономикалық күнтізбеде маңызды жаңалықтар болмады, ал трейдерлердің кейбірі March Madness атты студенттік баскетбол турнирінің басталуына көңіл бөлген болуы мүмкін, деп жазды Barron’s. Бұл күн «үштік сиқырлы жұма» (Triple Witching Day) деп аталды: 21 наурызда акцияларға арналған опциондар, индекстерге арналған фьючерстер мен опциондар, сондай-ақ жеке акцияларға арналған фьючерстердің мерзімі бір уақытта аяқталды. Goldman Sachs дерегінше, аяқталған опциондардың жалпы көлемі $4,7 трлн-нан асқан, деп жазды CNBC. Бұл жағдай сауда жабылар алдындағы нарықтағы құбылмалылықты арттырды. Bloomberg жазуынша, жабылуға бес минут қалғанда S&P 500 индексі күн ішіндегі 1%-дан астам төмендеуді толығымен өтеді.

Негізгі индекстер жұма күні АҚШ президенті Дональд Трамптың сауда баждары бойынша «икемділік» болуы мүмкін деген мәлімдемесінен кейін жоғалтуларын жартылай өтеді. Алайда Трамп 2 сәуірге дейін барлық жауап баждары енгізілетінін растады: америкалық тауарларға баж қолданатын елдерге қарсы шаралар қабылданады.

Nike компаниясы 20 наурызда Қытай мен Мексикадан импортқа салынатын баждардың өсуі және қоймадағы тауарларға арналған жеңілдіктер себебінен табыстың әрі қарай төмендейтінін болжады. Соның нәтижесінде компания акциялары жұма күні 5,5%-ға арзандады. FedEx те болашақ пайда болжамын төмендетіп, АҚШ-тың өндірістік экономикасындағы әлсіздік пен белгісіздікті алға тартты. Оның акциялары 6,5%-ға құлдырады.

Жұма күнгі өсуге қарамастан, Roundhill Magnificent Seven ETF аптаны минуспен аяқтады. Бұл қор АҚШ-тың жеті ірі технологиялық компаниясының акцияларының динамикасын қадағалайды. Наурыз басында ол «аюлы нарық» аймағына түсті, деп жазды CNBC. Nvidia акциялары апталық есепте 3,3% жоғалтты. Инвесторлар 18 наурызда GTC конференциясында бас директор Дженсен Хуангтың мәлімдемелерін скептицизммен қабылдады. Tesla акциялары жұма күні 5,3%-ға өсті, себебі Илон Маск компания қызметкерлеріне акцияларын сатпауға кеңес берді. Дегенмен апталық қорытынды бойынша бұл қағаздар 0,5% жоғалтты.

Mizuho аналитигі Дэниел О’Риган жұма күні кейбір инвесторлар бұған дейін артта қалған ірі технологиялық компаниялар бойынша қысқа позицияларын жапқан болуы мүмкін деп болжайды.

Нарық сәуірді күтуде

Verdence Capital Advisors инвестициялар жөніндегі директоры Меган Хорнеманның айтуынша, қор нарығындағы құбылмалылық 2025 жылдың соңына дейін жалғасуы мүмкін, ал акцияларға қысым арта түседі. Бұл Трамптың 2 сәуірге дейін баждардан босату мерзімін аяқтауына байланысты.

«Қазіргі экономикалық жағдай тым белгісіз. Тіпті 2 сәуірден кейін баждар бойынша мәселе анықталса да, оның экономикаға қандай жанама әсері болатынын әлі білмейміз», — деді Хорнеман CNBC арнасына берген сұхбатында. — «Бұл бір реттік инфляциялық әсер бола ма, әлде ұзақ мерзімді баға қысымына әкелетін жаңа толқын ба — ол да беймәлім».

Barclays сарапшыларының пікірінше, баждарға қатысты алаңдаушылық кем дегенде 2 сәуірге дейін нарық өсімін тежейді.

«Акциялар артық сатылған деңгейлерден секірді, бірақ баждар төңірегіндегі белгісіздік 2 сәуірге дейін өсу әлеуетін шектейді», — деді Barclays-тің еуропалық акциялар жөніндегі стратегi Эммануэль Коу CNBC келтірген жазбасында.

Ол сондай-ақ Трамптың баж енгізу күнін «босану күні» деп атауы, нарықтар үшін теріс сценарий тәуекелін арттыратынын атап өтті — әсіресе 25%-дық әмбебап баждар енгізілсе.

Morgan Stanley-дің АҚШ акциялары бойынша бас стратегi Майкл Уилсонның пікірінше, американдық нарықтағы құбылмалылық кем дегенде жылдың екінші жартысына дейін жалғасады. Bloomberg жазуынша, акциялар бағасы ақпандағы шарықтау шегінен төмен деңгейде қалады. Оның ойынша, кез келген қысқа мерзімді өсім уақытша болады және сапасы төмен компаниялар есебінен жүреді, өйткені корпоративтік және экономикалық өсім перспективалары бұлдыр күйде қалып отыр.

«Бұл — баяу қалпына келу болады, бұл — менің ең шынайы болжамым», — деді Уилсон. — «Жаңа рекордтық көрсеткіштерге жету — биылғы жылдың бірінші жартысында екіталай».