«Апаттық» есеп: аналитик ІІ-компания C3.ai акцияларын сатуға кеңес берді
D.A. Davidson талдаушысы жасанды интеллектке (ІІ) арналған бағдарламалық қамтамасыз етуді әзірлейтін C3.ai компаниясының акциялары бойынша рейтингті төмендетіп, іс жүзінде оларды сатуға кеңес берді. Ол компания құнының 40%-дан астамға төмендеуін күтуде. Мұндай шешімге өткен тоқсандағы алдын ала жарияланған түсім көрсеткіштері себеп болды – олар болжамнан айтарлықтай нашар шыққан. Алайда Уолл-стритте C3.ai акцияларымен не істеу керектігіне қатысты пікірлер әлі де екіге бөлініп отыр. Мысалы, Wedbush талдаушысы компанияға қалпына келуге уақыт беріп, акцияны «сатып алу» кеңесін сақтап қалды.
Егжей-тегжейлі
D.A. Davidson талдаушысы Лаки Шрайнер CNBC-ке берген мәліметінде C3.ai акцияларының рейтингін бейтарап деңгейден Underperform («нарықтан нашар») деңгейіне дейін түсіргенін айтты, бұл іс жүзінде оларды сатуға шақырумен тең. Сондай-ақ ол компания акцияларының мақсатты бағасын бірден $25-тен $13-ке дейін қысқартты. Бұл 8 тамыз, жұма күнгі жабылу бағасынан 41%-дан астам төмендеу деген сөз.
Рейтингтің төмендеуіне 2026 қаржы жылының 1-тоқсаны (31 шілдеде аяқталды) бойынша алдын ала нәтижелер себеп болды. Investing.com дерегінше D.A. Davidson бұл көрсеткіштерді «апаттық» деп атады. C3.ai жұма кешінде алдын ала түсімді $70,3 млн деңгейінде жариялады, бұл Уолл-стрит болжамынан шамамен $34 млн-ға аз, деп жазады CNBC. Шрайнердің айтуынша бұл – компания тарихындағы «ең үлкен артта қалу». Нақты себебі белгісіз, бірақ «мұндай жоспар орындалмауын ескерсек, компанияның дұрыс бағытқа қайта оралуына әлі ұзақ уақыт керек екені анық», деді талдаушы. D.A. Davidson мұның бір бөлігі сату және қызмет көрсету бөлімдерінің қайта құрылымдалуына байланысты болуы мүмкін екенін де жоққа шығармады. Бұл өзгерістер аясында компания жаңа аймақтық басшыларды жұмысқа алған.
«Бұған дейін біз C3.ai түсімінің өсу тұрақтылығына бір реттік түсімдерге тәуелділіктің артуына байланысты күмән келтіріп келгенбіз, ал қазір алдын ала нәтиже осы үрдісті растап отыр», – деді Шрайнер, CNBC келтірген жазбасында. Оның айтуынша компания бизнесі қалпына келмес бұрын, әлі де нашарлауы мүмкін. Сондай-ақ D.A. Davidson бұған дейін ықтимал болып көрінген ІІ-сектордағы мәмілелер аясында C3.ai-дың басқа компанияға сатылу сценарийі енді бірнеше тоқсан бойы қаржылық көрсеткіштер тұрақтанбайынша екіталай екенін атап өтті. Бұған қоса, компания акцияларының бағасы бәсекелестеріне қарағанда әлі де жоғары деңгейде тұр.
D.A. Davidson 2026 қаржы жылындағы C3.ai түсімінің өсім болжамын өткен жылмен салыстырғанда 26%-ға дейін төмендетті. Талдаушының пікірінше алғашқы тоқсаннан кейін бұл көрсеткіштің таза өсімі жыл бойы «минималды» болады. Дегенмен оның есебінше, C3.ai қолма-қол шамамен $711 млн-ға ие, бұл қазіргі шығын деңгейінде төрт жылдай жұмыс істеуге жеткілікті.
Акциялардың реакциясы
11 тамыздағы саудада C3.ai акциялары 33,5%-ға құлдырап, $14,7-ге түсті. Бұл – 2023 жылғы қаңтардан бергі ең төменгі деңгей. Осы құлдыраудан кейін 2021 жылы ІІ-нарықтың жұлдызы саналған компанияның нарықтық құны 2025 жылдың басынан бері 50%-дан астамға қысқарды.
Басқа пікірлер
Wedbush талдаушысы Дэн Айвз жағдайды сәл оптимистік тұрғыда бағалайды. Ол C3.ai акцияларының мақсатты бағасын $35-тен $23-ке дейін төмендетті (жұма күнгі жабылудан 4% жоғары), бірақ «сатып алу» (Outperform) рейтингін сақтап қалды. «Біз Outperform рейтингін сақтаймыз және компанияға сатылымдағы теріс трендті бірнеше тоқсанда өзгертуге мүмкіндік береміз», – деді Айвз. Дегенмен, «егер компания жағдайды өзгерте алмаса, алда одан да қиын кезеңдер күтіп тұр», деп қосты ол Investing.com келтірген сөзінде.
UBS талдаушысы да мақсатты бағаны $27-ден $23-ке дейін түсіріп, бейтарап рейтингті сақтап қалды, деп хабарлайды Investing.com. UBS-тің дерегінше өткен тоқсандағы C3.ai түсімінің шамамен жартысы – $51 млн – бір реттік лицензия сатудан және бағдарламаны енгізу мен баптауға байланысты Professional Engineering Services (PES) қызметінен түскен. Инвестбанк талдаушысының айтуынша, бұл компания кірісінің тұрақсыздығын айқын көрсетеді. Негізгі түсім көздерінің айқын болмауы – бейтарап рейтингті сақтаудың басты себебі.
MarketWatch-тың дерегінше барлығы 17 аналитик C3.ai акцияларына рейтинг берген. Олардың бесеуі – сатып алуға, алтауы – ұстауға, тағы алтауы – сатуға кеңес береді. Консенсус мақсатты баға $28,3 деңгейінде, бұл жұма күнгі жабылудан шамамен 28% жоғары.
