Екі small-cap жиһаз өндіруші бірігетінін хабарлады. Акциялары күрт өсті
6 тамызда жиһаз өндіруші MasterBrand компаниясының котировкасы 9%-дан, ал оның бәсекелесі Woodmark-тың котировкасы 14%-дан астамға өсті. Инвесторларды екі компанияның бірігетіні туралы жаңалық қуантты. Бірігу нәтижесінде экономикалық циклдерге тәуелділігі төменірек, қаржылық жағынан әлдеқайда мықты компания құрылады, деп санайды Noble Capital Markets брокер-дилер.
Егжей-тегжейлі
Екі small-cap жиһаз өндіруші MasterBrand пен American Woodmark 6 тамызда бірігуді жоспарлап отырғандарын хабарлады. Бұл жаңалық олардың акция бағасының өсуіне түрткі болды.
— Капитализациясы $1,6 млрд болатын MasterBrand акциялары 9,3% қымбаттап, соңғы үш айдағы максимумды жаңартты. 7 тамыз таңертеңгі сауда басталған сәтте олар тағы 2% өсті.
— Капитализациясы $899,9 млн болатын American Woodmark қағаздары 14,2% күрт өсіп, $62,05 деңгейіне жетті. Бұл – ақпан айының соңынан бергі максимум.
Жоспар бойынша мәміле аясында American Woodmark акционерлері MasterBrand акцияларын алады, ал біріктірілген компанияда олардың үлесі 37%-ды құрайды. Қалған 63% MasterBrand инвесторларына тиесілі болады. Компаниялар бұл бірігу нәтижесінде құны шамамен $2,4 млрд болатын, бренд портфелі кең, географиялық ауқымы зор әрі операциялық икемділігі жоғары компания құрылатынын мәлімдеді. American Woodmark пен MasterBrand бірігу жүзеге асқаннан кейін үш жылдың соңына дейін шамамен $90 млн үнемдеуге болатынын есептеп отыр.
Мәмілені 2026 жылдың басында аяқтау жоспарланған. Оны екі компанияның директорлар кеңесі мақұлдағанымен, әлі де акционерлер мен реттеуші органдардың келісімі қажет.
Мәміле компаниялар үшін не білдіреді?
Бірігу нәтижесінде қаржылық тұрғыдан мықтырақ компания құрылмақ, деп жазады Noble сарапшылары. MasterBrand 2025 жылдың екінші тоқсанын 8% өскен таза сатылыммен аяқтады — $730,9 млн, алайда таза пайдасы 18% азайып, $37,3 млн болды. Түзетілген EBITDA бір жыл ішінде өзгеріссіз қалып, $105,4 млн деңгейінде қалды.
American Woodmark әзірге тек алдын ала деректерді ұсынды — оның 2026 қаржы жылындағы бірінші тоқсаны 31 шілдеде аяқталған. Компанияның таза сатылымы $400–406 млн аралығында, таза пайдасы — $12,5–14,5 млн, ал түзетілген EBITDA көрсеткіші — $41,75–43,75 млн шамасында болды.
Noble мәліметінше, қаржылық көрсеткіштердің жақсаруы еркін ақша ағынын арттырып, нарық циклдеріне төзімділікті күшейтеді және даму, автоматтандыру мен технологияға инвестицияны ұлғайтуға мүмкіндік береді.
2022 жылдан бері құрылыс саласын жоғары пайыздық мөлшерлемелер тежеп келген — олар құрылыс компаниялары мен үй иелері үшін қарыз алуды қымбаттатып жіберді, деп жазады Reuters. Алайда ФРЖ пайыздық мөлшерлемені төмендетеді деген үміт күшейіп келеді. Бұл тұрғын үй мен жөндеу жұмыстарына деген сұранысты жандандыруы мүмкін: Zillow риелтор компаниясының шілде айындағы дерегінше, АҚШ-та тұрғын үй тапшылығы рекордтық деңгейге жетуде.
