Пауэллдің сөзі қарсаңында АҚШ акциялары бесінші күн төмендеп жатыр
Уолл-стриттегі басты индекстер бейсенбі күнгі сауда-саттықты төмендеумен бастады. Инвесторлардың тәуекелге деген тәбеті ФРЖ-ның Джексон-Хоулдағы симпозиумы жақындаған сайын азаюда — онда реттеуші басшысы Джером Пауэлл жұма күні сөз сөйлейді. Көңіл-күйді жақсартуға Walmart ритейлерінің тоқсандық есебі де сеп болмады, оның пайдасы күткеннен төмен болды, деп жазады Reuters.
Кең нарық индексі S&P 500 сауда басында 0,4% төмендеді. Бұл — индекстің қатарынан бесінші күн құлауы. Ал Dow Jones Industrial Average 0,7% төмендеді. Nasdaq Composite 0,4% азайып, қатарынан үшінші күн төмендеуін жалғастырды.
VIX индексі, яғни Уолл-стриттің «қорқыныш индексі», шамамен 7% өсіп, 17 пункт деңгейіне жетті.
Қысымның себебі неде?
Инвесторлар ФРЖ төрағасы Джером Пауэллдің сөзін күтуде, ол пайыздық мөлшерлемелер бойынша болашаққа қатысты көзқарасын айқындауы мүмкін. CME FedWatch құралына сәйкес, трейдерлер қыркүйектегі келесі отырыста ФРЖ мөлшерлемені төмендету ықтималдығын 80%-ға жуық бағалап отыр, деп жазады CNBC.
RGA Investments инвестициялар жөніндегі директоры Рик Гарднер: «Джексон-Хоул симпозиумына дейін акция бағалаулары тым жоғары, ал инвесторлар Пауэлл қыркүйекте мөлшерлемені төмендететініне ишара береді деп күтуде. Егер бұл орындалмаса, ойыншылар тамыздағы сауда белсенділігінің төмендігін және демалыс алдындағы тәуекел алғысы келмейтінін ескеріп, пайданы бекітіп алуы мүмкін».
Бейсенбіде акцияларға қысым көрсеткен тағы бір фактор — Walmart-тың екінші тоқсандағы көңілден шықпайтын нәтижелері. Ритейлердің пайдасы Уолл-стрит күтулерін ақтамады, бұл 2022 жылдың мамырынан бергі алғашқы жағдай, деп хабарлайды CNBC. Walmart акциялары 4,4% арзандады.
Сонымен қатар, АҚШ Еңбек министрлігінің бейсенбіде жариялаған жұмыссыздық деректері де инвесторлардың көңілін көтермеді. 16 тамызда аяқталған аптада жұмыссыздық бойынша алғашқы өтінімдер саны 235 мыңға жетті, ал экономистер 225 мың болады деп болжаған. Бір апта бұрын бұл көрсеткіш 224 мың еді, деп жазады The Wall Street Journal.
ФРЖ-ның шілдедегі отырысының хаттамасы да жарияланды. Ол реттеуші шенеуніктердің еңбек нарығы мен инфляцияға алаңдаулы екенін көрсетті, бірақ көпшілігі ставкаларды әзірге төмендетуге ерте деп санады. Басқарушылар кеңесінің мүшелері Кристофер Уоллер мен Мишель Боуман ставканы өзгертпей сақтап қалуға қарсы шықты — бұл 1993 жылдан бері алғаш рет бірден екі мүшенің ашық келіспеуі болды.
«Егер компаниялар баж салығын тұтынушыларға жүктей бастаса, ФРЖ инфляцияның күшеюінен қауіптенеді. Хаттама Пауэллдің өткен отырыстағы қатаң пікірлеріне сай келеді. Бұқалы көңіл күй Джексон-Хоулда су сепкендей басылуы мүмкін», — деп атап өтті TradeStation компаниясының жаһанды нарықтар стратегиясының басшысы Дэвид Рассел.
