KindlyMD криптобизнеспен бірігеді: акциялар 250%-ға өсті

Медицина саласында қызмет көрсететін шағын KindlyMD клиника желісінің акциялары 12 мамыр, дүйсенбі күнгі саудада 250%-дан аса өсті. Компания Трамптың криптовалюта бойынша кеңесшісі саналатын Дэвид Бейли негізін қалаған ұйыммен бірігетінін хабарлады. Біріккен құрылым жалпы сомасы $710 млн инвестиция тартты.

KindlyMD акциялары 12 мамырда Nasdaq биржасында 251%-ға қымбаттап, $13,69 деңгейінде жабылды. Бұл — компания 2024 жылы IPO-ға шыққалы бері тіркелген ең жоғары баға. Сауда кезінде акциялар бағасы $31,45-ке дейін жетіп, алдыңғы жабылу бағасынан сегіз есе жоғары болды. 13 мамыр, сейсенбі күнгі таңертеңгі саудада котировкалар шамамен 18%-ға төмендеді.

Акциялардың күрт өсуіне себеп — KindlyMD компаниясының биткоин жобасы Nakamoto Holdings-пен бірігетіні туралы мәлімдемесі. Бұл жобаны кәсіпкер Дэвид Бейли құрған, ал CNBC оны АҚШ президенті Дональд Трамптың криптовалюталар бойынша негізгі кеңесшісі деп атайды. Келісім аяқталғаннан кейін Бейли жаңа біріккен компанияның басшысы болады. KindlyMD негізін қалаушы және бас директоры Тим Пикетт медициналық бизнесті басқаруды жалғастырады.

Біріккен компания жалпы $710 млн инвестиция тартты. Оның ішінде $200 млн – борыштық бағалы қағаздар арқылы, ал $510 млн – шектеулі инвесторлар тобына акцияларды жеке орналастыру (PIPE) арқылы жиналған. Бұл инвесторлар акциялардың бір данасын $1,12 бағамен сатып алған.

Жеке инвестициялау раундына 200-ден астам инвестор қатысты. Олардың қатарында Zoom және Canva-ға алғашқы кезеңде қаржы салған Actai Ventures қоры мен Perplexity AI іздеу жүйесіне инвестициялаған Arrington Capital бар. CNBC атап өткендей, жеке инвесторлардың тізімі криптоәлемдегі ең ықпалды адамдарға ұқсайды. Олардың арасында — Coinbase криптобиржасының бұрынғы техникалық директоры Баладжи Шринивасан, Bitmain майнинг жабдықтарын өндірушінің тең құрылтайшысы Джихан Ву және биткоиннің қызу жақтаушысы, мексикалық миллиардер Рикардо Салинас бар.

Бейли басқаратын жаңа компанияның негізгі мақсаты — биткоин сатып алып, сақтау. Бірақ олар жай ғана криптовалютаны алып қоймайды: әрбір капитал нарығында биткоинмен жұмыс істейтін компанияларды құрып немесе сатып алатын болады, деді Бейли CNBC-ге берген сұхбатында. Болашақта компанияның биржадағы тикері өзгереді, ал денсаулық сақтау саласы қаржы құрылымында кішігірім рөл атқаратын болады.

KindlyMD — опиоидтық тәуелділікпен күресетін науқастарға көмектесетін медициналық компания. Ол 2019 жылы құрылған, табысты болмаған және соңғы жылдары қаржылық қиындықтарға тап болған. 2023 және 2024 жылдардағы есептерінде компания қызметін жалғастыру үшін қосымша капитал қажет екенін айтқан. 8 мамырда, бірігу туралы хабарға дейін, KindlyMD бірінші тоқсанның қаржылық есебін жариялады: табыс 30%-ға азайып, таза шығын 268%-ға артқан.

Дэвид Бейли — LinkedIn парақшасындағы мәліметке сәйкес, криптовалюта саласында 11 жылдан бері жұмыс істейді. Ол — медиа мен іс-шараларды ұйымдастырумен айналысатын BTC Inc компаниясының тең құрылтайшысы және бас директоры. Бұл холдинг құрамына Bitcoin Magazine журналы кіреді — бұл криптовалюта жаңалықтарына арналған алғашқы басылым, оны Бейли Ethereum негізін қалаушылар Михай Алиси мен Виталик Бутериннен сатып алған.

Бейли жай ғана кәсіпкер емес: CNBC және The Information деректеріне сүйенсек, ол — Трамптың криптовалюталар бойынша басты кеңесшісі. Трамп президенттік қызметке екінші рет кіріскелі бері Бейли кемінде алты рет Ақ үйге барған. Өзі бұл қарым-қатынасты былай сипаттайды: «Мені кеңес сұрағанда, мен ең жақсы кері байланыс беруге тырысамын немесе биткоин бойынша кеңес айтамын».

Nakamoto Holdings жобасының құрылғаны 7 мамырда белгілі болды. The Information басылымының дереккөзіне сүйенсек, Бейли бұл криптоинвестициялық жобаны 2025 жылдың қаңтарынан бері дайындаған. Компания атауы — биткоин жасаушысының бүркеншік есімі Сатоши Накамотоның құрметіне қойылған. Ақпарат көзі бойынша, Nakamoto Holdings Бразилия, Таиланд және Оңтүстік Африка сияқты елдердегі компанияларды сатып алып, оларға биткоинмен инвестиция салуды жоспарлап отыр.